Panagpasiar Idiay Honduras

ITI Espaniol, “Kinaadalem” ti kaipapanan ti Honduras. Dayta a sao ti mabalin nga inusar ni Christopher Columbus a pangdeskribir iti danum a sakup ti Atlantic Ocean a nangtaraigid iti dayta a lugar. Kuna ti dadduma a dayta ti naggapuan ti nagan ti Honduras.

Napateg unay kadagiti taga-Honduras ti kinadekket ken panagtitinnulong ti agkakapamilia. Kas pagarigan, agkadua ti agassawa nga agaramid kadagiti dadakkel a desision—kas iti paggastuan ti pamilia wenno edukasion ti annak.

Mestiso ti kaaduan a taga-Honduras gapu iti pannakiasawa dagiti Europeo kadagiti katutubo. Adda pay laeng ti dadduma kadagita a katutubo a grupo, kas iti Chortí. Sabali met ti nagtaudan ti dadduma a katutubo a taga-Honduras, kas kadagiti Garifuna.

Nagtaud dagiti Garifuna kadagiti Africano ken Carib Indian a nagnaed iti isla ti St. Vincent. Idi agarup 1797, nakadanon dagiti Garifuna iti Islas de la Bahía (Bay Islands). Idi agangay, nagnaedda iti igid ti baybay ti Caribbean iti Central America. Kalpasanna, nagwaras dagiti Garifuna iti nadumaduma a paset ti Central ken North America.

Magusgustuan dagiti Garifuna dagiti naparagsit a sala a maigiddan iti uni ti tambor a naaramid iti natangken a kayo. Karaman met iti kulturada dagiti narangrang ti kolorna a tradisional a bado, panagiinnestoria, ken taraon a kas iti ereba (dakkel ken naingpis a kankanen a naaramid iti kamoteng kahoy).

Agarup 400 ti kongregasion dagiti Saksi ni Jehova iti Honduras. Maang-angay dagiti gimong iti Espaniol, kasta met iti Garifuna, Honduras Sign Language, Ingles, Mandarin Chinese, ken Miskito.