Panagpasiar Idiay Mongolia

NI Genghis Khan, maysa a nakaturtured a mannakigubat idi 1100’s, ti nangipasdek iti nalawa nga Imperio ti Mongolia. Sangkabassit laeng a paset ti imperio ti nagbalin a moderno a Mongolia nga adda iti nagtengngaan ti Russia ken China. Maysa pay ketdi ti Mongolia kadagiti nasion a kabassitan ti populasionna.

Idiay Mongolia, makita dagiti karayan, waig, nangato a bambantay, turturod, ken nalawa a patad a karuotan. Iti abagatan a pasetna, masarakan ti Gobi Desert a popular gapu kadagiti iskeleton dagiti dinosaur a napreserba sadiay. Adda ti Mongolia iti kangato nga agarup 1,580 a metro manipud iti patar ti baybay (sea level). Aw-awagan dayta dagiti lumugar kas “Land of Blue Sky” (Daga ti Asul a Tangatang). Apag-isu unay dayta nga awagda ta idiay Mongolia, agin-init iti nasurok a 250 nga aldaw iti uneg ti makatawen!

Nakaro a pudot ken lamiis ti klima idiay Mongolia. No tiempo ti pudot, umabot iti 40°C ti kapudotna, ngem no tiempo ti lamiis, umabot met iti -40°C ti kalamiisna. Dandani kakatlo idiay Mongolia ti agbibiag kas nomad wenno dagitay agakar-akar iti pagyanan. Rugianda ti aldaw iti pananggatas kadagiti kalding, baka, kamelio, ken kabalio. Kaaduanna a dagiti produkto a naaramid manipud iti gatas ti kankanen dagiti Mongol. Magusgustuanda met ti karne, ngem karne ti karnero ti paboritoda.

Managpadagus dagiti Mongol. Baybay-anda a nakalukat dagiti nagtimbukel a mayakar-akar a kasla tolda a balayda nga aw-awaganda iti ger. Iti kasta, mabalin a mapan aginana dagiti aglabas ken mangan kadagiti imbati dagiti bumalay. Kaaduanna a maidasar met kadagiti bisita ti napudot a tsaa nga adda gatasna a naikkan iti bassit nga asin.

Budista ti kaaduan a taga-Mongolia ita. Adda met dagiti miembro ti shamanismo, Islam, ken Kristianidad. Ngem adu ti awan relihionna. Nasurok metten a 350 a Saksi ni Jehova idiay Mongolia ti mangisursuro iti Biblia iti nasurok a 770 a tattao.