nga edision ti magasin a naiyimprenta iti Aleman. Ngem sa la nagparang manen ti Watch Tower iti Aleman idi 1897 sa nagtultuloyen nga awan ressat a naipablaak. Idi 1916 naiyimprentan iti pito a pagsasao​—Aleman, Danes-Norwego, Ingles, Pinlandes, Polaco, Pranses, ken Sueko. Idi a gimmanetget unay ti panangikasaba iti naimbag a damag idi 1922, nagbalin a 16 ti bilang dagiti pagsasao a nakaipablaakan ti magasin. Idi 1993, nupay kasta, regularen a mapatpataud iti 112 a pagsasao​—dagidiay us-usaren ti dakkel a paset ti populasion toy daga. Ramanenna daytoy saan laeng a dagiti pagsasao a kas iti Ingles, Español, ken Hapones, a kadagita minilion a kopia ti maiyimprenta kada ruar, no di pay ket ti Palauan, Tuvaluan, ken dadduma pay a sumagmamano la a gasut ti maibumbunong.

Iti las-ud ti adu a tawen Ti Pagwanawanan namatmatan kas magasin nga ad-adda para iti “bassit nga ipastoran” dagiti konsagrado a Kristiano. Medio limitado idi ti sirkulasionna; idi 1916, 45,000 laeng a kopia ti maiyim-imprenta. Ngem nangrugi idi 1935, naulit-ulit a naipaganetget kadagiti “Jonadab,” wenno “dakkel a bunggoy,” a regular nga alaen ken basaenda Ti Pagwanawanan. Idi 1939, idi a ti akkub ti magasin intampokna ti Pagarian, naitukon iti publiko ti panagsuskribeda iti Pagwanawanan bayat ti uppat a bulan nga internasional a kampania. Kas resultana, ti listaan dagiti nagsuskribe dimmanon iti 120,000. Iti sumuno a tawen regularen a naitukon kadagiti tattao Ti Pagwanawanan kadagiti kalsada. Bigla nga immadu ti sirkulasionna. Idi rugrugi ti 1993, 16,400,000 ti maiyim-imprentan kada ruarna iti amin a pagsasao.

Ti liwliwa nga intukon ti magasin, nupay kasta, ket daydiay makaallukoy laeng kadagiti addaan pudpudno a panagayat iti kinapudno.

Iti ruar ti Agosto 22, 1946, naaramaten ti paulo nga Agriingkayo! Naigunamgunam ti panangriing kadagiti tattao iti kaiyulogan dagiti sangalubongan a paspasamak. Inusar ti magasin dagiti kadawyan a gubuayan ti damag, ngem addaan met kadagiti bukodna a koresponsal iti intero a globo. Ti balanse, praktikal, makasukisok nga artikulo ti Agriingkayo! a mangsalaysay iti nalawa a sakup dagiti tema a mangparegta kadagiti managbasa tapno amirisenda ti kaskenan a mensahe ti magasin, nga isu daytoy, a dagiti sangalubongan a pasamak tungtungpalenda dagiti padto ti Biblia, a mangipakita nga agbibiagtayon iti maudi nga al-aldaw ket din agbayag ti Pagarian ti Dios iyegnanton ti agnanayon a pagimbagan kadagidiay mangadal ken mangaramid iti pagayatan ti Dios. Daytoy a magasin nagbalin nga epektibo nga instrumento iti sangalubongan a panangiwaragawag iti naimbag a damag ti Pagarian ti Dios ken nagserbi a rangtay kadagiti naun-uneg nga artikulo nga adalen a nailanad iti Pagwanawanan ken liblibro.

Idi rugrugi ti 1993, maiyim-imprentan ti Agriingkayo! iti 67 a pagsasao, 13,240,000 a kopia kada ruar.