Napampanunotmo kadin a basaen ti Biblia ngem dimo inaramid ta nariknam ti maysa kadagiti naibaga iti ngato? Para iti adu, kasla nagrigat ti agbasa iti Biblia. Ngem no ngay maammuam a makatulong ti Biblia tapno naragragsak ti biagmo? Ken no ngay matakuatam nga adda gayam dagiti pamay-an tapno agbalin a mas makapainteres ti panagbasam? Kayatmo kadi nga ammuen ti maitulong ti Biblia kenka?

Kitaem ti sumagmamano a komento dagidiay nakarikna a makagunggona ti panagbasa iti Biblia idi rinugianda dayta.

Kuna ni Ezekiel, a nasurok bassit a 20 ti tawenna: “Dati, kaslaak la agmanmaneho iti lugan nga awan ti pampanunotenna a papanan. Ngem ti panagbasak iti Biblia ti nakatulong tapno maaddaan iti direksion ti biagko. Naglaon dayta kadagiti balakad a mausarko iti inaldaw.”

Inlawlawag met ni Frieda, nga agtawen iti nasurok a 20: “Nadarasudosak idi. Ngem gapu iti panagbasak iti Biblia, nasursurok a kontrolen ti bagik. Nalaklakadakon a pakibagayan isu nga ad-adun ti gayyemko.”

Imbaga ni Eunice nga agtawen iti nasurok a 50 maipapan iti Biblia: “Dayta ti nakatulong kaniak nga agbalin a nasaysayaat ken mangbaliw kadagiti madi nga ugalik.”

Kas iti naammuan dagitoy nga agbasbasa ken ti minilion a dadduma pay, makatulong ti panagbasa iti Biblia tapno naragragsak ti biagmo. (Isaias 48:17, 18) Kas pagarigan, tulongannaka a (1) makaaramid iti nasayaat a desision, (2) maaddaan iti pudno a gagayyem, (3) mangsango iti stress, ken (4) kangrunaanna, maammuam ti kinapudno maipapan iti Dios. Dagiti balakad ti Biblia ket naggapu iti Dios isu a kanayon a nasayaat dagiti desisionmo no surotem dayta. Saan a pulos a dakes ti ibalakad ti Dios.

Ti napateg ket mairugim. Ania dagiti makatulong tapno nalaklaka ken naragragsak ti panangirugim?

Ania a pamay-an ti makatulong tapno naragsak ti panagbasam iti Biblia ken mas magunggonaanka? Kitaem ti lima a singasing nga epektibo para iti adu.

Agbasaka iti umiso a lugar. Mangbirokka iti naulimek a lugar. Kissayam dagiti makaistorbo tapno makapokuska. No nalawag ken presko ti angin, mabalin a mas magunggonaanka iti basbasaem.

Ikondisionmo ti panunotmo. Ti Biblia ket naggapu iti nailangitan nga Amatayo isu a mas mabenepisiaranka no kas iti ubing ti kababalinmo a sisasagana nga agsursuro iti naayat a nagannak. No adda dagiti negatibo a kapanunotam maipapan iti Biblia, iwalinmo pay laeng dagita tapno maisuronaka ti Dios.—Salmo 25:4.

Agkararagka nga umuna. Naglaon ti Biblia iti pampanunot ti Dios isu a gagangay laeng a kasapulantayo ti tulongna tapno maawatantayo dayta. Ikarkari ti Dios nga itedna ti “nasantuan nga espiritu kadagidiay agdawdawat kenkuana.” (Lucas 11:13) Makatulong ti nasantuan nga espiritu tapno maawatam ti pampanunot ti Dios. Ket daytanto ti manglukat iti panunotmo tapno maawatam “uray pay ti nauneg a bambanag ti Dios.”—1 Corinto 2:10.

Tarusam ti basbasaem. Saan koma a makuna laeng nga adda nalpasmo a basaen. Panunotem a naimbag ti basbasaem. Isaludsodmo ti kas kadagitoy: ‘Ania dagiti makitak a kababalin ti karakter a basbasaek? Kasanok a mayaplikar daytoy?’

Adda koma panggepmo. Tapno magunggonaanka, ti koma panggepmo nga agbasa iti Biblia ket agbirok iti leksion a mangpasayaat iti biagmo. Dagitoy ti mabalin a panggepmo iti panagbasam: ‘Kayatko nga ad-adda pay a maam-ammo ti Dios.’ ‘Kayatko ti agbalin a nasaysayaat a tao, wenno nasaysayaat nga asawa.’ Sa mangpilika kadagiti paset ti Biblia a makatulong kenka iti dayta a banag.a

Makatulong dagitoy a lima a singasing tapno mairugim ti agbasa. Ngem ania ti maaramidam tapno agbalin a mas makapainteres ti panagbasam? Basaem dagiti singasing iti sumaruno nga artikulo.

Makapaturog? Wenno makapagin-awa? Ania ti pangibilangam iti panagbasa iti Biblia? Agdepende dayta iti pamay-am nga agbasa. Kitaentayo no ania ti maaramidam tapno mas makapainteres ken makaparagsak dayta.

Pumilika iti bersion a mapagtalkan ken moderno ti sasao a nausar. Saanmo a matagiragsak ti agbasa no ti piliem a bersion ket napnapno iti narigat wenno kadaanan a sasao a dimo maawatan. Isu nga agbirokka iti Biblia a nalaka a maawatan ti sasaona a mangdanon ken mangtukay iti pusom. Ngem masapul met a naannad ken umiso ti pannakaipatarusna.a

Agusarka iti moderno a teknolohia. Saan laengen a nayimprenta ti Biblia no di ket magun-odan pay iti digital a pormat. Dadduma ti mabasa online wenno mai-download tapno mabasam iti kompiuter, tablet, wenno selpon. Adda met dagiti elektroniko a bersion nga addaan kadagiti kanayonan a tool tapno alistom a makita ti dadduma a bersikulo ti Biblia nga adda koneksionna iti topiko a basbasaem. Mabalinmo pay a pagkokomparaen ti agduduma a patarus. No kaykayatmo ti agdengngeg ngem agbasa, adda met audio a pormat ti Biblia. Maragragsakan ti adu nga agdengngeg bayat nga addada iti pangpasahero a lugan, aglablabada, wenno dadduma pay nga aktibidad a mabalinda ti agdengngeg. Apay a dimo padasen ti pamay-an a maibagay iti kasasaadmo?

Agusarka kadagiti katulongan iti panagadal iti Biblia. Makatulong dagita tapno mas magunggonaanka iti panagbasam. Addada mapa ti dagdaga iti Biblia a makatulong tapno mabirokam dagiti lugar a nadakamat iti basbasaem ken mailadawam ti kasasaad. Dagiti artikulo kas kadagiti adda iti daytoy a magasin wenno iti seksion a “Pannursuro ti Biblia” iti website a jw.org/ilo ket makatulong iti panangadalmo iti kaipapanan ti adu a paset ti Biblia.

Agduduma koma ti pamay-am. No kasla nagrigat a basaen ti Biblia sigun iti panagsasaruno dagiti libro, apay a dimo irugi iti paset a kaykayatmo tapno mariing ti interesmo? No kayatmo nga am-ammuen ti maysa a nalatak a karakter ti Biblia, basaem dagiti paset a nagparanganna. Makitam ti sampol dayta a pamay-an iti kahon nga “Adalem ti Biblia Babaen iti Panangam-ammom Kadagiti Karakterna.” Wenno baka kayatmo a basaen ti Biblia depende iti topiko wenno panagsasaruno dagiti pasamak. Mayat no padasem ti maysa kadagita a pamay-an.

Saan nga ordinario a libro ti Biblia. Naglaon dayta iti balakad ti Namarsua. (2 Timoteo 3:16) Mabalin a dakkel ti impluensia ti mensahena kadatayo. Kinapudnona, kuna ti Biblia: “Ti sao ti Dios nabiag ken adda bilegna.” (Hebreo 4:12) Kabaelanna a pasayaaten ti biagtayo iti dua a nagpateg a pamay-an—idalanna ti inaldaw a biagtayo ita ken tulongannatayo a mangammo iti maipapan iti Dios ken kadagiti karina.—1 Timoteo 4:8; Santiago 4:8.

Mapasayaatna ti biagmo ita. Makatulong ti Biblia iti personal a biagmo. Mangted daytoy iti makatulong a balakad maipapan kadagiti sumaganad.

• Relasionmo iti sabsabali.—Efeso 4:31, 32; 5:22, 25, 28, 33.

• Emosional ken pisikal a salun-atmo.—Salmo 37:8; Proverbio 17:22.

• Moral a prinsipio.—1 Corinto 6:9, 10.

• Panangasikaso iti material a kasapulan.—Proverbio 10:4; 28:19; Efeso 4:28.a

Naapresiar unay ti agkabannuag nga agassawa a taga-Asia ti pateg ti balakad ti Biblia. Kas iti adu a kakaskasar, nagproblemada iti komunikasionda ken narigatanda a makibagay iti personalidad ti maysa ken maysa. Ngem inyaplikarda ti nabasada iti Biblia. Ania ti resultana? Kuna ni Vicent: “Nakatulong ti nabasak iti Biblia tapno mapagballigianmi dagiti problemami nga agassawa iti naayat a pamay-an. Naragsak ti panagasawami ta sursurotenmi dagiti prinsipio ti Biblia.” Immanamong ni baketna nga Annalou: “Nakatulong ti panangbasami kadagiti karakter iti Biblia. Naragsak ken kontentoakon iti panagasawami ken kadagiti planomi iti biag.”

Maam-ammom ti Dios. Malaksid iti imbagana maipapan iti panagasawa, kuna pay ni Vicent: “Nasingsingedak itan ken Apo Jehova gapu iti panagbasak iti Biblia.” Ipakita ti komentona ti nagpateg a punto—makatulong ti Biblia tapno maam-ammom ti Dios. No aramidem dayta, saanka laeng a mabenepisiaran iti balakadna no di ket maam-ammom pay isuna kas gayyem. Ket makitamto nga impakaammona dagiti detalye maipapan iti nagsayaat a masanguanan, maysa a tiempo a matagiragsaktayo ti “pudpudno a biag” nga agpaut iti agnanayon. (1 Timoteo 6:19) Awan dayta iti sabali a libro.

No rugiam a basaen ti Biblia ken itultuloymo dayta, masagrapmo met dagita a pagimbagan—sumayaat ti biagmo itan ken maam-ammom ti Dios. Ngem bayat a basbasaem ti Biblia, mabalin nga adu ti saludsodmo. No kasta, laglagipem ti nagsayaat a pagwadan ti Etiope nga opisial a nagbiag 2,000 a tawenen ti napalabas. Nakaad-adu ti saludsodna maipapan iti Biblia. Idi napagsaludsodan no maaw-awatanna ti basbasaenna, insungbatna: “Pudno unay, kasano koma a maawatak, malaksid no adda nangidalan kaniak?”b Naragsakan a nangawat iti tulong ti maikari a mangisuro iti Biblia a ni Felipe a maysa a nagkauna nga adalan ni Jesus. (Aramid 8:30, 31, 34) Kasta met, no kayatmo a maammuan ti ad-adu pay maipapan iti Biblia, awisendaka a mangipasa iti kiddawmo online nga agadal iti Biblia iti www.jw.org/ilo wenno agsuratka iti kaasitgan nga adres a nailista iti daytoy a magasin. Mabalinmo met a kontaken dagiti Saksi ni Jehova iti lugaryo wenno bisitaen ti Kingdom Hall nga asideg kenka. Apay a dimo basaen ti Biblia ita nga aldaw ket bay-am nga iturongnaka iti nasaysayaat a biag?