Marigatan ti adu a mangayat iti Dios. Para kadakuada ti Dios ket di matarusan, saan a maseknan, wenno naulpit. Usigem ti kuna ti dadduma:

• “Nagkararagak iti Dios a tulongannak ngem mariknak a nakaad-adayo kaniak. Panagkunak, saan a maysa a persona nga addaan rikna.”​—Marco, Italy.

• “Talaga a kayatko ti agserbi iti Dios ngem kasla nakaad-adayo kaniak. Ipagarupko a naulpit ti Dios a mangdusa laeng kadatayo. Diak patien nga ay-ayatennatayo.”​—Rosa, Guatemala.

• “Idi ubingak pay, patiek a biddut laeng ti sapsapulen ti Dios, a nakasagana a mangdusa kadatayo no nakabasoltayo. Idi agangay, impapanko a saan a maseknan. Ti Dios ket kas iti presidente a mangmanmandar kadagiti iturayanna, ngem talaga a saan a maseknan.”​—Raymonde, Canada.

Sika ngay? Narigat kadi nga ayaten ti Dios? Adu a tawenen nga isalsaludsod dayta dagiti Kristiano. Kinapudnona, bayat ti 500 agingga iti 1500 C.E., kaaduan a miembro ti Kakristianuan saanda pay ketdi nga agkararag iti Mannakabalin-amin a Dios. Apay? Mabutengda ngamin kenkuana. Kastoy ti komento ti historiador a ni Will Durant: “Kasano a maitured ti maysa a managbasol ti agkararag iti nakaam-amak ken saan a maseknan a Dios?”

Apay nga ibagada a “nakaam-amak ken saan a maseknan” ti Dios? Ania a talaga ti isursuro ti Biblia maipapan iti Dios? Ti kadi panangadal iti kinapudno maipapan iti Dios ket makatulong kenka a mangayat kenkuana?

TI PATPATIEN TI ADU

“Saankami nga agtutunos no adda nagan ti Dios, ken no adda man, ania dayta a nagan.”​—Propesor David Cunningham, Theological Studies.

TI KINAPUDNO MANIPUD ITI BIBLIA

Kuna ti Dios: “Siak ni Jehova. Dayta ti naganko.” (Isaias 42:8) Ti Jehova ket Hebreo a nagan a kaipapananna “Pagbalinenna.”​—Genesis 2:4, Kitaem ti Baro a Lubong a Patarus, Apendise 1, parapo 1.

Kayat ni Jehova nga usarentayo ti naganna. “Umawagkayo iti naganna,” kuna ti Biblia. “Ipakaammoyo kadagiti ili dagiti pannakilangenna. Dakamatenyo a ti naganna naitan-ok.”​—Isaias 12:4.

Inusar ni Jesus ti nagan ti Dios. Kinunana iti kararagna ken Jehova: “Impakaammok kadakuada [kadagiti adalan ni Jesus] ti naganmo ket ipakaammokto dayta.” Apay nga impakaammo ni Jesus ti nagan ti Dios kadagiti adalanna? Kinunana: “Tapno ti ayat a pinangayatmo [ti Dios] kaniak maadda koma kadakuada ken siak a maikaykaysa kadakuada.”​—Juan 17:26.

NO APAY A NAPATEG

“Ti tao a saan a makaammo iti nagan ti Dios, saanna a talaga nga am-ammo ti Dios,” kinuna ti teologo a ni Walter Lowrie, “ken saanna a maayat no ti ammona ket maysa laeng a puersa saan a persona.”

Dinomingo a makimisa ni Victor, ngem talaga a saanna a marikna nga am-ammo ti Dios. Kinunana: “Idi naammuak a Jehova ti nagan ti Dios, kasla personal a nayam-ammoak kenkuana. Panagriknak, naam-ammokon Daydiay adu ti nadamdamagkon maipapan kenkuana. Ammok nga isu ket pudpudno a Persona a mabalinko a pakigayyeman.”

Suminged ni Jehova kadagiti tattao a mangus-usar iti naganna. Maipapan “kadagidiay mangpampanunot iti naganna,” inkari ti Dios: “Ipakitakto ti panangngaasi kadakuada, no kasano a ti maysa a tao ipakitana ti panangngaasi iti anakna nga agserserbi kenkuana.” (Malakias 3:16, 17) Gunggonaan met ti Dios dagidiay umawag iti naganna. Kuna ti Biblia: “Tunggal maysa nga umawag iti nagan ni Jehova maisalakanto.”​—Roma 10:13.

TI PATPATIEN TI ADU

Kadagiti Kristiano a relihion, “ti Romano Katoliko, Eastern Orthodox, ken Protestante, bigbigenda ti Dios a tallo a Persona: Dios Ama, Dios Anak, ken Dios Espiritu Santo. Sigun iti Kristiano a doktrina, dina kaipapanan dayta ti tallo a dios, no di ket dagitoy tallo a persona ket maymaysada.”​—The New Encyclopædia Britannica.

TI KINAPUDNO MANIPUD ITI BIBLIA

Pulos a di imbaga ti Anak ti Dios a ni Jesus nga agpadada ken Amana. Imbes ketdi kinunana: “Mapanak iti Ama, agsipud ta ti Ama dakdakkel ngem siak.” (Juan 14:28) Kinunana pay kadagiti adalanna: “Umuliak ken Amak ken Amayo ken iti Diosko ken Diosyo.”​—Juan 20:17.

Ti nasantuan nga espiritu ket saan a persona. Dagiti nagkauna a Kristiano ket ‘napnoda iti nasantuan nga espiritu,’ ken kinuna ni Jehova: “Mangiparukpokakto iti espirituk iti tunggal kita ti lasag.” (Aramid 2:1-4, 17) Saan a paset ti Trinidad ti nasantuan nga espiritu. Dayta ket aktibo a puersa ti Dios.

NO APAY A NAPATEG

Inlawlawag dagiti Katoliko nga iskolar a da Karl Rahner ken Herbert Vorgrimler a ti Trinidad ket “saan a mabalin a maammuan no saan a maipakaammo, ken uray naipakaammon dayta saan latta a maawatan.” Mabalinmo kadi nga ayaten ti maysa a dimo am-ammo wenno dimo maawatan? Ngarud, ti doktrina a Trinidad ket makalapped iti panangammo ken panangayat iti Dios.

Kasta ti kuna ni Marco a nadakamat iti immuna nga artikulo. Kinunana: “Pagarupko nga ilemlemmeng ti Dios ti kinasiasinona isu nga ipapanko a saan a maseknan, misterio, ken narigat nga asitgan.” Ngem kuna ti Biblia a ti Dios “saan nga adayo iti tunggal maysa kadatayo.” (Aramid 17:27) Saanna nga ilemmeng ti kinasiasinona kadatayo. Kayatna a maam-ammotayo. Kinuna ni Jesus: “Agdaydayawkami iti am-ammomi.”​—Juan 4:22.

Kuna ni Marco: “Idi naammuak a ti Dios ket saan a paset ti Trinidad, naaddaanak met laengen iti personal a relasion kenkuana.” No ibilangtayo ni Jehova kas maysa a Persona imbes a misterio, nalaklaka nga ayaten. Kuna ti Biblia: “Ti saan nga agayat saanna a naam-ammo ti Dios, agsipud ta ti Dios ket ayat.”​—1 Juan 4:8.

TI PATPATIEN TI ADU

“Ti kararua dagiti nakaro ti kinadakesda ket mapan a dagus idiay impierno kalpasan a matayda, a sadiay matutuokda iti ‘agnanayon nga apuy.’” (Catechism of the Catholic Church) Kuna ti dadduma a lider ti relihion a dagidiay adda iti impierno ket interamente a naisina iti Dios.

TI KINAPUDNO MANIPUD ITI BIBLIA

“Ti kararua nga agbasbasol​—dayta a mismo matayto.” (Ezequiel 18:4) Dagiti natay “saanda a pulos sipapanunot iti aniaman.” (Eclesiastes 9:5) No matay ti kararua ken awan puotna, kasano nga agsagaba iti “agnanayon nga apuy” wenno matutuok gapu ta interamente a naisina iti Dios?

Iti Biblia, ti Hebreo ken Griego a sasao a masansan a maipatarus kas “impierno” ket tumukoy iti tanem. Kas pagarigan, idi agsagsagaba ni Job gapu iti sakitna, inkararagna: “O sapay coma ta ilemmengnac idiay tanem [“iti impierno,” Douay-Rheims Version].” (Job 14:13, Ti Biblia, PBS) Kayat ni Job ti aginana iti tanem, saan ket nga iti lugar a pagtutuokan wenno naisina iti Dios.

NO APAY A NAPATEG

No naulpit ti Dios, ditay umadani kenkuana. “Sipud kinaubingko, naisuro kaniak ti doktrina nga umap-apuy nga impierno,” kuna ni Rocío a taga-Mexico. “Kabutengko ti Dios ken diak pagarupen nga adda naimbag a galadna. Impagarupko a nauyong ken saan a nadungngo.”

Nagbaliw ti panangmatmat ni Rocío iti Dios gapu iti nalawag nga ibaga ti Biblia maipapan iti panangukom ti Dios ken ti kasasaad dagiti natay. “Urayak la nabang-aran,” kunana. “Mamatiak itan a kayat ti Dios ti kasayaatan para kadatayo, ay-ayatennatayo, isu a mabalinko nga ayaten. Kayariganna ti maysa nga ama a mangkibkibin iti annakna ken kayatna ti kasayaatan para kadakuada.”​—Isaias 41:13.

Adu ti nangikagumaan nga agbalin a relihioso gapu ta mabutengda iti umap-apuy nga impierno. Ngem saan a kayat ti Dios nga agserbika kenkuana gapu iti buteng. Imbes ketdi, kinuna ni Jesus: “Masapul nga ayatem ni Jehova a Diosmo.” (Marcos 12:29, 30) Kasta met, no mabigbigtayo a nalinteg ti Dios, agtalektayo met a nalinteg ti panangukomna iti masanguanan. Maikunatayo ti kas iti kinuna ti gayyem ni Job a ni Eliu: “Wen, iti kinapudnona, ti met laeng Dios saan nga agtignay a sidadangkes, ket ti met laeng Mannakabalin-amin saanna a ballikugen ti panangukom.”​—Job 34:12.

Naminsan, idi adda ni Jesus idiay Jerusalem, impakaammona ti maipapan ken Amana a ni Jehova, ken imbutaktakna dagiti ulbod a panguluen ti relihion idi kaaldawanna. (Juan 8:12-30) Ti imbagana iti dayta a gundaway, isurona kadatayo ita no kasano a mailasin no pudno wenno saan ti patpatien ti kaaduan maipapan iti Dios. Kinuna ni Jesus: “No agtalinaedkayo iti saok, pudno a dakayo dagiti adalak, ket maammuanyonto ti kinapudno, ket ti kinapudno wayawayaannakayto.”​—Juan 8:31, 32.

“Agtalinaedkayo iti saok.” Imbaga ditoy ni Jesus ti pagalagadan tapno maammuantayo no “pudno” dagiti sursuro ti relihion. No adda mangngegmo maipapan iti Dios, isaludsodmo iti bagim, ‘Maitunos kadi daytoy iti sasao ni Jesus ken iti dadduma a sursuro iti Nasantuan a Kasuratan?’ Tuladem dagidiay dimngeg iti sasao ni apostol Pablo ken ‘dagidiay siaannad a nangsukimat iti Kasuratan iti inaldaw no agpayso dagiti nasursuroda.’​—Aramid 17:11.

Da Marco, Rosa, ken Raymonde a nadakamat iti umuna nga artikulo daytoy a magasin, sinukimatda a naimbag dagiti patpatienda babaen ti pannakipagadalda iti Biblia kadagiti Saksi ni Jehova. Ania ti naammuanda?

Marco: “Ti nangyadal kadakami ken baketko, inusarna ti Biblia a nangsungbat iti amin a saludsodmi. Immuneg ti panagayatmi ken Jehova ken simmingedkami nga agassawa!”

Rosa: “Idi damo, impagarupko a ti Biblia ket maysa laeng a libro maipapan iti kapanunotan ti tao a mangilawlawag maipapan iti Dios. Ngem in-inut a sinungbatan ti Biblia dagiti saludsodko. Ita, pudpudnon kaniak ni Jehova ken mabalinkon a pagtalkan.”

Raymonde: “Nagkararagak iti Dios a tulongannak a mangam-ammo kenkuana. Di nagbayag, nagadalkamin ken lakayko iti Biblia. Naammuanmi met laengen ti kinapudno maipapan ken Jehova! Maragsakankami a makaammo no ania a kita ti Dios ni Jehova.”

Saan laeng nga ibutaktak ti Biblia dagiti kinaulbod maipapan iti Dios; ipalgakna pay ti kinapudno maipapan kadagiti agkakaimbag a galadna. Tulongannatayo ti naipaltiing a Saona tapno “maammuantayo ti bambanag a siaasi nga impaay kadatayo ti Dios.” (1 Corinto 2:12) Apay a dimo sukimaten a mismo ti sungbat ti Biblia kadagiti masansan a maisaludsod maipapan iti Dios, ti panggepna, ken ti masanguanantayo? Basaem dagiti sungbat ti dadduma kadagitoy a saludsod iti “Pannursuro ti Biblia > Sungbat Dagiti Saludsod Maipapan iti Biblia” iti www.jw.org/ilo. Mabalinmo met ti agkiddaw iti panagadal iti Biblia iti dayta a Web site wenno iti maysa kadagiti Saksi ni Jehova. Masiguradomi a no aramidem dayta, maammuam a nalakam nga ayaten ti Dios ngem iti impagarupmo.