Nangted ni Jehova iti Garantia a Matungpal ti Inkarina a Paraiso a Daga

1. Ania idi ti mensahe ni propeta Isaias kadagiti padana nga Israelita?

NI PROPETA Isaias dineskribirna ni Jehova kas “ti pudno a Dios.” Ti sao a naipatarus kas “pudno” literal a kaipapananna ti “amen.” (Isa. 65:​16, ftn.) Ti “Amen” kaipapananna ti “sapay koma,” wenno “sigurado.” No mausar ti sao nga “amen” iti Biblia para kada Jehova wenno ken Jesus, garantia dayta a pudno ti maysa a banag. Nalawag ngarud ti mensahe ni Isaias kadagiti padana nga Israelita: Kanayon a mapagtalkan ti ipakpakauna ni Jehova. Pinaneknekanen ni Jehova a pudno dayta ta tungtungpalenna ti tunggal karina.

2. Apay a makapagtalektayo kadagiti kari ni Jehova para iti masanguanantayo, ken ania dagiti saludsod nga usigentayo?

² Makapagtalektayo met kadi kadagiti kari ni Jehova para iti masanguanantayo? Dandani 800 a tawen kalpasan ti tiempo ni Isaias, inlawlawag ni apostol Pablo no apay a kanayon a mapagtalkan dagiti kari ti Dios. Imbaga ni Pablo: “Imposible nga agulbod ti Dios.” (Heb. 6:18) Panunotem daytoy: No ti ubbog ket makapataud laeng iti natamnay a danum, saanto a pulos a makapataud iti naapgad a danum. Kasta met, gapu ta ni Jehova ti Ubbog ti kinapudno, saan a pulos nga agulbod. Naan-anay a makapagtalektayo ngarud iti amin nga ibagbaga ni Jehova, agraman ti amin a karina para iti masanguanantayo. Iti daytoy nga artikulo, usigentayo dagitoy a saludsod: Ania ti inkari ni Jehova a masakbayantayo? Ken ania ti inted ni Jehova a garantia a tungpalenna ti inkarina?

ANIA TI INKARI NI JEHOVA?

3. (a) Ania a kari ti magusgustuan unay dagiti agserserbi iti Dios? (Apocalipsis 21:​3, 4) (b) Ania ti reaksion ti dadduma no ipakaammotayo kadakuada dayta a kari?

³ Usigentayo ti kari a magusgustuan unay dagiti agserserbi ken Jehova iti intero a lubong. (Basaen ti Apocalipsis 21:3, 4.) Inkari ni Jehova ti tiempo nga “awanton ni patay. Awanto metten ti panagladingit wenno panagsangit wenno ut-ot.” No mangaskasabatayo, adu kadatayo ti mangus-usar iti dayta a makaparagsak a teksto ti Biblia maipapan iti biag iti Paraiso. Ania ti reaksion ti dadduma no ipakaammotayo kadakuada dayta a kari? Mabalin nga ibagada, “Kasla imposible dayta.”

4. (a) Ania ti ammo ken nasaksakbay a nakita ni Jehova? (b) Malaksid a nagkari ni Jehova, ania pay ti inaramidna?

⁴ Siempre, idi inwanwan ni Jehova ni apostol Juan a mangisurat iti daytoy a kari maipapan iti biag iti Paraiso, ammona nga ipakaammotayo ita daytoy a namnama no ikasabatayo ti mensahe ti Pagarian. Nasaksakbay met a nakita ni Jehova nga adu ti marigatan a mamati iti daytoy a kari a “baro a bambanag.” (Isa. 42:9; 60:2; 2 Cor. 4:​3, 4) Kasanotayo ngarud nga ipasigurado iti sabsabali—ken iti bagitayo—a matungpalto dagiti bendision a nadakamat iti Apocalipsis 21:​3, 4? Saan laeng nga inkari ni Jehova daytoy a makaparagsak a namnama no di ket nangipaay pay kadagiti makakombinsir a rason a makapagtalektayo iti dayta. Ania dagita a rason?

NANGTED NI JEHOVA ITI GARANTIA A TUNGPALENNA TI KARINA

5. Ania dagiti rason a makapagtalektayo iti Paraiso nga inkari ti Dios, ken kadagiti ania a bersikulo a masarakantayo dagita?

⁵ Adda dagiti rason a makapagtalektayo iti Paraiso nga inkari ni Jehova kadagitoy a bersikulo. Mabasatayo: “Imbaga Daydiay nakatugaw iti trono: ‘Kitaem! Pabpabaruek ti amin a bambanag.’ Kunana pay: ‘Isuratmo, ta mapagtalkan ken pudno dagitoy a sasao.’ Imbagana kaniak: ‘Natungpal dagitan! Siak ti Alfa ken ti Omega, ti pangrugian ken ti pagpatinggaan.’”—Apoc. 21:​5, 6a.

6. Apay a dagiti pammasiguro a mabasa iti Apocalipsis 21:​5, 6 patibkerenda ti panagtalektayo iti kari ti Dios?

⁶ Apay a dagitoy a teksto ti Biblia pabilgenda ti panagtalektayo iti kari ti Dios? Kuna ti libro nga Apocalipsis Tampokna maipapan kadagita a bersikulo: “Arigna a pinirmaan a mismo ni Jehova ti maysa a garantia, wenno papeles ti titulo, a mangpatalged iti pannakatungpal dagitoy a masanguanan a bendision para iti matalek a sangatauan.”b Mabasa ti kari ti Dios iti Apocalipsis 21:​3, 4. Ngem iti bersikulo 5 ken 6, makitatayo ti arig pirma ni Jehova kas garantia a pudno ti karina. Kitaentayo a naimbag ti sasao nga inusar ni Jehova iti intedna a garantia.

7. Asino ti nangrugi nga agsao iti bersikulo 5, ken apay nga espesial dayta?

⁷ Ti garantia nga inaramid ti Dios ket mangrugi kadagitoy a sasao: “Imbaga Daydiay nakatugaw iti trono.” (Apoc. 21:5a) Espesial dagitoy a sasao ta maysa daytoy iti tallo laeng a gundaway iti libro nga Apocalipsis a ni Jehova a mismo ti nagsao kadagiti sirmata. Isu a daytoy a garantia ket saan nga impaay ti maysa a nabileg nga anghel, wenno uray ti napagungar a ni Jesus, no di ket ni Jehova a mismo! Ipakita daytoy a kinapudno a mapagtalkan ti sumaruno a sasao. Apay a kasta? Gapu ta “saan a mabalin nga agulbod” ni Jehova. (Tito 1:2) Isu a sigurado a pumayso dagiti sasao a mabasatayo iti Apocalipsis 21:​5, 6.

“KITAEM! PABPABARUEK TI AMIN A BAMBANAG”

8. Kasano nga impaganetget ni Jehova a sigurado a pumayso ti karina? (Isaias 46:10)

⁸ Sumaruno, usigentayo ti sao a “Kitaem!” (Apoc. 21:5) Ti Griego a sao a naipatarus kas “kitaem!” ket maulit-ulit a nausar iti libro nga Apocalipsis. Ibaga ti maysa a reperensia a ti nausar nga eksklamasion ket “maysa a pamay-an tapno iturong ti agbasbasa ti atensionna iti sumaruno.” Ania ti sumaruno kalpasan ti eksklamasion? Kinuna ti Dios: “Pabpabaruek ti amin a bambanag.” Wen, ni Jehova ti agsasao maipapan kadagiti panagbalbaliw iti masanguanan. Ngem para kenkuana, dayta a kari ket sigurado a matungpal ta ibagbagana dagitoy a panagbalbaliw a kas man la mapaspasamaken dagita.​—Basaen ti Isaias 46:10.

9. (a) Ti sasao a “pabpabaruek ti amin a bambanag” ket tumukoy iti ania a dua nga ar-aramiden ni Jehova? (b) Ania ti mapasamak iti agdama a “langit” ken “daga”?

⁹ Usigentayo ti sumaruno a sasao a masarakan iti Apocalipsis 21:5: “Pabpabaruek ti amin a bambanag.” Iti daytoy a kapitulo ti Biblia, dayta a sasao ket tumukoy iti dua nga ar-aramiden ni Jehova—panangsukat ken panangisubli. Umuna, ania ti sukatan ni Jehova? Iti Apocalipsis 21:​1, mabasatayo: “Naglabasen ti immuna a langit ken ti immuna a daga.” “Ti immuna a langit” ket tumukoy kadagiti napolitikaan a gobierno nga im-impluensiaan ni Satanas ken dagiti demoniona. (Mat. 4:​8, 9; 1 Juan 5:19) Kas nausar iti Biblia, ti “daga” ket mabalin a tumukoy kadagiti tattao nga agnanaed ditoy daga. (Gen. 11:1; Sal. 96:1) Gapuna, “ti immuna a daga” ket tumukoy kadagiti dakes a tattao ita. Saan la a basta tarimnen wenno simpaen ni Jehova ti agdama a “langit” ken “daga”; no di ket naan-anay a dalusanna babaen ti panangsukatna kadagita. Ti agdama a langit ken agdama a daga ket sukatanna iti “baro a langit ken baro a daga”​—kayatna a sawen, ti baro a gobierno a mangituray kadagiti nalinteg a tattao.

10. Ania ti pabaruento ni Jehova?

¹⁰ Iti Apocalipsis 21:​5, sumaruno a mabasatayo ti imbaga ni Jehova maipapan iti panangpabarona kadagiti bambanag. Siputanyo ta saan nga imbaga ni Jehova: “Amin nga aramidek ket baro a bambanag.” Imbes ketdi, imbagana: “Pabpabaruek ti amin a bambanag.” Pabaruento ni Jehova ti amin a bambanag. Iti ania a pamay-an a pabaruento ni Jehova ti amin a bambanag? Paimbagen ni Jehova ti daga ken dagiti tattao tapno agbalinda a perpekto. Kas impadto ni Isaias, agbalinto ti intero a daga a hardin ken parke—sangalubongan nga Eden. Mapabaro, wenno naan-anay a paimbagenna, ti tunggal maysa kadatayo. Mapaimbagto dagiti pilay, bulsek, ken umel ken mapagungarto met dagiti natay.—Isa. 25:8; 35:​1-7.

“MAPAGTALKAN KEN PUDNO DAGITOY A SASAO. . . . NATUNGPAL DAGITAN!”

11. Ania a bilin ken ania a rason ti inted ni Jehova ken Juan?

¹¹ Ania pay ti karaman iti garantia nga inted ti Dios? Imbaga ni Jehova ken Juan: “Isuratmo, ta mapagtalkan ken pudno dagitoy a sasao.” (Apoc. 21:5) Saan la a nangted ni Jehova iti bilin nga “isuratmo.” Nangipaay met iti rason. Imbagana: “Ta mapagtalkan ken pudno dagitoy a sasao”—kayatna a sawen, mapangnamnamaan ken umiso dagiti sasao ti Dios. Agyamantayo ta nagtulnog ni Juan iti bilin nga “isuratmo.” Kas resultana, mabasa ken mautobtayo ti maipapan iti Paraiso nga inkari ti Dios ken mautobtayo dagiti nagsasayaat a bendision nga agur-uray kadatayo.

12. Apay a siuumiso a naibaga ni Jehova: “Natungpal dagitan!”?

¹² Ania ti simmaruno nga imbaga ti Dios? “Natungpal dagitan!” (Apoc. 21:6) Apay nga imbaga ni Jehova a natungpalen dagita a kari? Ngamin, awan ti makalapped kenkuana a mangitungpal iti panggepna. Kalpasanna, iti sumaruno a paset ti intedna a garantia, adda pay imbaga ni Jehova a mangipasigurado kadatayo a talaga a matungpal ti karina. Ania dayta?

“SIAK TI ALFA KEN TI OMEGA”

13. Apay nga imbaga ni Jehova: “Siak ti Alfa ken ti Omega”?

¹³ Kas nadakamaten, namitlo a ni Jehova a mismo ti nagsao kadagiti sirmata ni Juan. (Apoc. 1:8; 21:​5, 6; 22:13) Iti tunggal maysa kadagita a gundaway, imbaga met la ni Jehova: “Siak ti Alfa ken ti Omega.” Ti alfa ti umuna a letra iti Griego nga alpabeto ket ti omega ti maudi a letra. Idi inusar ni Jehova ti deskripsion a “ti Alfa ken ti Omega,” ipapaawatna a no adda irugina, sibaballigi nga ileppasna dayta.

14. (a) Mangted iti pagarigan idi arigna imbaga ni Jehova ti “Alfa” ken no kaano nga arigna ibagananto ti “Omega.” (b) Ania a garantia ti ipakaammo ti Genesis 2:​1-3?

¹⁴ Kalpasan a pinarsua ni Jehova da Adan ken Eva, imbagana ti orihinal a panggepna para kadagiti tattao ken iti daga. Kinuna ti Biblia: “Binendisionan met ida ti Dios, ket kinunana: ‘Agpaadukayo ken punnuenyo ti daga ken kultibarenyo.’” (Gen. 1:28) Iti daydi a kanito, arigna imbaga ni Jehova, “Alfa.” Nalawag nga imbagana ti panggepna: Dumtengto ti tiempo a dagiti perpekto ken natulnog a kaputotan da Adan ken Eva ti mangpunno iti daga ken pagbalinenda dayta a Paraiso. Iti dayta a tiempo, arigna ibaganto ni Jehova, “Omega.” Kalpasan a pinarsua ni Jehova “ti langit ken ti daga ken ti amin nga adda kadagita,” nangted iti garantia. Ipakaammo dayta ti Genesis 2:​1-3. (Basaen.) Pinagbalin ni Jehova a sagrado ti maikapito nga aldaw. Ania ti kayat a sawen dayta? Inlasin ken pinilina ti maikapito nga aldaw tapno itungpalna ti panggepna para kadagiti tattao ken para iti daga. Isu nga idi pinagbalinna a sagrado ti maikapito nga aldaw, kaipapananna a naan-anay a matungpalto ti panggepna iti ngudo dayta nga aldaw.

15. Apay a kasla nalapdan ni Satanas ti pannakatungpal ti panggep ti Dios para iti sangatauan?

¹⁵ Kalpasan a nagrebelde da Adan ken Eva, nagbalinda a managbasol ken naipatawidda ti basol ken ipapatay kadagiti kaputotanda. (Roma 5:12) Kas resultana, kasla nalapdan ni Satanas ti panggep ti Dios a mapno ti daga kadagiti perpekto ken natulnog a tattao. Kasla pinagbalin ni Satanas nga imposible a maibaganto ni Jehova ti, “Omega.” Impagarup siguro ni Satanas a nagbassiten dagiti nabati nga opsion ni Jehova. Ti maysa nga opsion ket patayenna da Adan ken Eva sa mangparsua iti sabali a perpekto nga agassawa a mangitungpal iti panggepna para iti sangatauan. Ngem no inaramid dayta ti Dios, akusaran la ketdi isuna ti Diablo kas ulbod. Apay? Ngamin, kas mabasa iti Genesis 1:​28, imbaga ni Jehova kada Adan ken Eva a mapnonto ti daga kadagiti kaputotanda.

16. Apay a nalabit napanunot ni Satanas a mabalinna nga iyakusar a napaay ni Jehova?

¹⁶ Ania ngata ti sabali pay nga opsion a nalabit impagarup ni Satanas a pilien ti Dios? Baka impagarup ni Satanas nga ipalubos ni Jehova a mangpataud da Adan ken Eva kadagiti imperpekto a kaputotan a saanto a pulos nga agbalin a perpekto. (Ecl. 7:20; Roma 3:23) No mapasamak dayta, iyakusar la ketdi ti Diablo a napaay ni Jehova. Apay? Ngamin, dayta nga opsion ket saan a mangitungpal iti panggep ti Dios a mapno ti Paraiso a daga kadagiti perpekto ken natulnog a kaputotan da Adan ken Eva.

17. Ania ti inaramid ni Jehova a mangsolbar iti panagrebelde ni Satanas ken dagiti immuna a tattao, ket anianto ti resulta dayta? (Kitaen met ti ladawan.)

¹⁷ Sinolbar ni Jehova ti panagrebelde ni Satanas ken dagiti immuna a tattao iti pamay-an a di pulos ninamnama ni Satanas. (Sal. 92:5) Imbes a ni Jehova ti mapaneknekan nga ulbod, napaneknekan ketdi nga isu ti pudno babaen ti panangipalubosna a maaddaan da Adan ken Eva iti annak. Ket imbes a ni Jehova ti mapaneknekan a napaay, napaneknekan ketdi a nagballigi. Siniguradona a matungpal ti panggepna babaen ti panangtedna iti ‘kaputotan’ a mangisalakan kadagiti natulnog a kaputotan da Adan ken Eva. (Gen. 3:15; 22:18) Permi la ketdi ti pannakakellaat ni Satanas iti subbot nga inyurnos ni Jehova! Apay? Gapu ta dayta nga urnos ket naibatay iti di managimbubukodan nga ayat. (Mat. 20:28; Juan 3:16) Awan dayta a kualidad ken Satanas. Ngamin ti la bagina ti pampanunotenna. Ania ngarud ti mapasamakto gapu iti subbot? Inton ngudo ti Sangaribu a Tawen a Turay, dagiti perpekto ken natulnog a kaputotan da Adan ken Eva ti agnaed iti paraiso a daga—kas iti orihinal a panggep ni Jehova. Iti dayta a tiempo, kas man la ibaganto ni Jehova, “Omega.”

NO KASANO A PAUNEGENTAYO TI PANAGTALEKTAYO ITI PARAISO NGA INKARI NI JEHOVA

18. Ania ti tallo a pammasiguro nga inted ti Dios kadatayo? (Kitaen met ti kahon a “Tallo a Rason nga Agtalektayo iti Kari ni Jehova.”)

¹⁸ Iti daytoy nga artikulo, nausigtayo dagiti rason a masiguradotayo a ti daga ket agbalinto a Paraiso. Ania ngarud ti ibagatayo kadagiti agduadua a pumaysonto ti Paraiso nga inkari ti Dios? Umuna, ni Jehova a mismo ti nagkari. Kuna ti libro nga Apocalipsis: “Imbaga Daydiay nakatugaw iti trono: ‘Kitaem! Pabpabaruek ti amin a bambanag.’” Addaan isuna iti sirib, pannakabalin, ken kayatna a matungpal ti karina. Maikadua, sigurado unay a matungpal ti karina ta para ken Jehova, napasamaken dayta. Dayta ti rason nga imbagana: “Mapagtalkan ken pudno dagitoy a sasao. . . . Natungpal dagitan!” Maikatlo, no adda irugi ni Jehova, sibaballigi nga ileppasna dayta, kas patalgedan ti sasao a: “Siak ti Alfa ken ti Omega.” Paneknekanto ni Jehova a ni Satanas ti ulbod ken napaay.

19. No agduadua dagiti tattao iti Paraiso nga inkari ti Dios, ania ti mabalinmo nga aramiden?

¹⁹ Laglagipem a kada ipakaammom kadagiti kaskasabaam ti inted ti Dios a garantia, pabpabilgem ti panagtalekmo kadagiti kari ni Jehova. Isu nga inton ibasam ti makaparagsak a kari maipapan iti asidegen a Paraiso a nadeskribir iti Apocalipsis 21:4 ket adda mangibaga, “Imposible dayta,” ania ti mabalinmo nga aramiden? Ibasam ken ilawlawagmo ti bersikulo 5 ken 6. Ipakitam no kasano a nangted ni Jehova iti garantia a matungpal ti karina, babaen ti arigna panangpirmana iti dayta.​—Isa. 65:16.