MIZRAIM

Nailista kas maikadua nga anak ni Ham. (Ge 10:6) Ni Mizraim ti nagtaudan dagiti tribu nga Egipcio (kasta met ti dadduma pay a tribu a saan nga Egipcio), ket nagbalin nga agkaarngi ti kaipapanan ti Mizraim ken Egipto. (Ge 10:13, 14; 50:11) Ngarud, ti sao nga “Egipto” ket pakaipatarusan no dadduma ti Hebreo a Mits·raʹyim (wenno Ma·tsohrʹ iti sumagmamano a kaso, 2Ar 19:24; Isa 19:6; 37:25; Mik 7:12). Iti Amarna a Taptapi a naisurat iti Akkadiano, tukoyen dagiti Canaanita ti Egipto kas Misri, nga umasping iti Arabiko a nagan ita dayta a daga (Misr).

Patien ti adu nga eskolar a ti Mizraim ket nagkadua a porma a mangirepresentar iti nagkadua nga Egipto (kayatna a sawen, ti Makinngato ken Makimbaba nga Egipto), ngem panangipapan laeng daytoy. (Kitaenyo ti EGIPTO, EGIPCIO.) Nabatad a ti nagnagan dagiti kaputotan ni Mizraim ket pangadu ti pormada: Ludim, Anamim, Lehabim, Naftuhim, Patrusim, Casluhim, ken Caftorim. (Ge 10:13, 14; 1Cr 1:11, 12) Gapu itoy, kadawyan a maikunkuna a tumukoy iti nagnagan dagiti tribu imbes nga indibidual nga annak. Nupay posible daytoy, paliiwen koma nga adda met sabali pay a nagan a kasla nagkadua wenno pangadu ti pormada, kas iti Efraim, Apaim, Diblaim (Ge 41:52; 1Cr 2:30, 31; Os 1:3), ngem tunggal maysa ket nakalawlawag a maysa laeng a tao ti tuktukoyenna.