Nasnasion nga Agnanaed iti Daga nga Inted ti Dios iti Israel

IDI inted ni Jehova iti Israel ti daga nga inkarina ken Abraham, pagnanaedan dayta dagiti nasion a nalulok iti moral. Silalawag nga ibaga ti Biblia nga imbilin ti Dios a madadael dagidiay a nadangkes a nasnasion, ket dagiti Israelita ti dinutokanna a mangdadael kadakuada. (De 7:2) Adu a tattao ti nangbabalaw iti dayta. Sipapakumbaba met nga aklonen ti dadduma a di pulos mayanatup kadagiti imperpekto a tattao a pagbalinenda ti bagbagida kas uk-ukom ti Dios. (Idiligyo ti Eze 18:29.) Kayatda a matarusan no apay a kasta ti inaramid ti Dios. Ania ngay ti maadalda?

Silalawag nga ipakita daytoy a rekord nga amin a tattao a mangibagbaga a mamatida kenkuana wenno saan ket manungsungbatda iti Namarsua iti tao, ni Jehova a Dios. Daytoy ti mangipakita a naanus ti Dios ngem saanna a kayat a sawen a kidemanna ti dakes nga aramidda. (Ge 15:16) Kayat a sawen daytoy nga intuding ni Jehova a responsabilidad dagiti nagannak ti annakda; saanna nga ikkaten kadakuada dayta a pagrebbengan, nga ipapanda a saan a maapektaran dagiti annakda kadagiti tignayda. (De 30:19; Jos 10:40) Ipakita met daytoy nga amin nga agbaw-ing manipud dakes a danada ken agdaydayaw ken Jehova ket maispal iti pannakadadael.​—Jos 6:25; 9:3–10:11.

Silalawag a tukoyen ti Biblia ti dakes nga ar-aramid a nakaigameran dagiti agnanaed iti Canaan. Kastoy ti kunaen ti Halley’s Bible Handbook (1964, p. 161): “Pakasdaawan dagiti arkeologo a nagkabakab kadagiti rebba dagiti siudad ti Canaan no apay a saan a nasapsapa a dinadael ida ti Dios.” Nalawag ti leksion: Saan nga agnanayon nga ipalubos ni Jehova nga agtultuloy ti kinadakes.