LOT
Apoko ni Tare ken anak ti kabsat ni Abraham (Abram) a ni Haran; ngarud isu ket kaanakan ni Abraham.—Ge 11:27.
Ti ama ni Lot a ni Haran ket natay idiay Ur dagiti Caldeo, isu a nakikadua ni Lot kada Tare, Abram, ken Sarai manipud Ur a napan iti siudad ti Haran, a sadiay a natay ti apongna a ni Tare. (Ge 11:28, 31, 32) Kalpasanna, nagdaliasat ni Lot nga agturong iti Canaan a kadua da Abram ken Sarai, ket idi agangay kimmuyog kadakuada a napan idiay Egipto sada nagsubli met laeng. (Ge 12:4, 5; 13:1) Gapu ta immadun ti naurnong a sanikua da Lot ken Abram, idi nagsublida iti Canaan saanen nga umanay ti daga a mangsustento kadakuada. Kasta met, timmaud ti riri iti nagbaetan dagiti pumapastorda. (Ge 13:5-7) Yantangay saan a kayat a makita ni Abram nga agtultuloy ti riri, insingasingna nga agsinada, a pinalubosanna ti kaanakanna nga agpili iti kayatna a daga. Pinili ni Lot ti nasayaat-pannakapadanumna a lugar, ti intero a distrito ti Makimbaba a Jordan. Inyakarna ti pakarsona iti daya ket idi agangay imbangonna ti toldana iti asideg ti Sodoma. (Ge 13:8-12) Ngem ni Lot ket saan a nagbalin a kas kadagiti Sodomita. Pinaneknekanna nga isu ket “nalinteg a tao” a “babaen iti nakita ken nangngegna bayat a makipagnanaed iti tengngada iti inaldaw-aldaw ket matutuok idi ti nalinteg a kararuana maigapu iti nakillo nga ar-aramidda.”—2Pe 2:8.
Idi a ti lima nga ar-ari iti dayta a lugar, agraman ti ari ti Sodoma, ket inabak ti uppat a nagkakappon nga ar-ari a rimmaut, ti siudad ket sinamsaman dagiti nangabak ken kinautiboda ni Lot. Idi naammuan ni Abram ti napasamak ken Lot, inurnongna ti 318 nga adipen, pinarmekda dagiti nangkautibo, binawida ti amin a sanikua, sada inispal ni Lot.—Ge 14:1-16.
Sinarungkaran Dagiti Anghel. Kalpasanna, idi asidegen a madadael ti Sodoma, pinadagus ni Lot ti dua nga anghel a simmarungkar kenkuana. Ngem dagiti lallaki ti siudad pinalikmutanda ti balay ket kinalikagumanda a mairuar kadakuada dagiti sangaili tapno penneken ti imoral a tarigagayda. Inkagumaan ni Lot a salakniban dagiti sangailina nga intukonna payen ti dua nga annakna a birhen iti bunggoy dagiti managderraaw. Gapu iti pungtot ti bunggoy dagiti managderraaw indupirda ni Lot, isu nga inyuneg dagiti sangailina nga anghel sada binulsek dagiti nadangkes a Sodomita.—Ge 19:1-11.
Naispal manipud Sodoma. Kalpasanna, impakaammo dagiti anghel ken Lot a pimmigsa iti sanguanan ni Jehova ti ikkis maibusor kadagiti agnanaed iti Sodoma isu nga imbaonna ida tapno dadaelenda ti siudad. Kas iti naibilin, pinakdaaran ni Lot dagiti agbalinto a manugangna, a nalawag a panggepda pay laeng nga asawaen ti annakna a babbai. (Idiligyo ti Ge 19:8, 14.) Nupay kasta, saan nga impangag dagiti manugangna ti imbagana. (Ge 19:12-14) Idi agbannawagen, dinagdag ida ti dua nga anghel a pumanawda a dagus, ket tapno nadardaras pay iniggamanda dagiti ima ni Lot, ima ti asawana, ken ti ima ti dua nga annakna. Kas panangikabilangan iti kiddaw ni Lot, pinalubosan dagiti anghel nga agkamang iti siudad ti Zoar nga adda iti asideg. Idi nakagteng sadiay ni Lot, dinadael ni Jehova ti Sodoma ken Gomorra babaen ti apuy. Nupay kasta, ti asawa ni Lot (a saan a nainaganan iti Kasuratan) ket sisusukir a “nangrugi a tumaliaw manipud likudan[na],” nalabit mailalaan iti bambanag a napanawanna. Gapu iti dayta nga inaramidna, “nagbalin nga adigi nga asin.”—Ge 19:15-26.
Idi agangay, immakar ni Lot manipud iti Zoar ket nagnaed iti maysa a rukib iti kabambantayan a rehion. Nalawag a natay idiay Sodoma dagiti agbalin koma a manugang ni Lot, isu nga awanen ti nangasawa kadagiti annak ni Lot. Impamuspusanda a makidenna kadakuada ni amada a saanna a napupuotan bayat a nakainum iti arak. Inaramidda daytoy tapno mataginayon ti kaputotan nga agtaud ken amada. Kas resultana, nagpasngay dagiti annak ni Lot iti saggaysa nga anak a lallaki, a nagtaudan dagiti Moabita ken dagiti Ammonita.—Ge 19:30-38; De 2:9, 19.
Maysa a Pakdaar. Pinaneknekan ni Jesu-Kristo nga umiso ti salaysay ti Kasuratan maipapan ken Lot. Impakitana nga “iti kaaldawan ti Anak ti tao,” wenno bayat ti kaaddana, dagiti kasasaad ket kas iti daydi kaaldawan ni Lot, a dagiti tattao ket saanda nga inkankano ti paspasamak ta mangmangan, umin-inum, gumatgatang, aglaklako, agmulmula, ken agibangbangon agingga a nagtudo iti apuy ken asupre manipud langit ket dinadaelna ida amin. Impakita ni Kristo nga iti dayta a tiempo iti masanguanan, saan a rumbeng a sublian dagiti tattao dagiti bambanag a pinanawanda, ken nangipaay iti nalawag a pagarigan tapno ipakitana dagiti nakas-ang a pagbanagan ti panangaramid iti kasta, idi kinunana: “Laglagipenyo ti asawa ni Lot.”—Lu 17:26-32.