MACPELA

[nagtaud iti sao a kaipapananna ti “doble,” mabalin nga ipasimudaagna a ti rukib ket addaan doble a pagserkan wenno dua a nalmeng a paset wenno siled].

Ti nagan ti talon ken rukib iti asideg ti Hebron a ginatang ni Abraham manipud ken Efron a Heteo iti 400 a siklo a pirak (a. $880). Ti rukib nagserbi kas lugar a nakaitabonan ni Sara nga asawa ni Abraham ken ti di kumurang a lima a sabsabali pay: da Abraham, Isaac, Rebecca, Jacob, ken Lea. (Ge 23:14-19; 25:9; 49:30, 31; 50:13) Dayta a nagan ket nabatad a tumukoy met iti lugar iti aglikmut.—Ge 23:17.

Gagangay a maikunkuna a dayta a rukib ket isu ita ti Meʽarat HaMakhpela, masarakan iti agdama-aldaw a Hebron iti sirok ti maysa a moske dagiti Muslim, iti las-ud ti pader a naawagan Haram el-Khalil.

Iti Genesis 23:17, ti termino iti Hebreo a mangipatuldo iti nagsaadan ti rukib ti Macpela mainaig iti Mamre ket nadumaduma ti pannakaipatarusna kas “daya ti” (RS), “sanguanan” (AS), “asideg” (BE), “batog” (JB), ken “iti sango ti Mamre” (NW). No umiso ti ayan ti Mamre (er-Ramat el-Khalil) sigun iti nabayagen a patpatien ti kaaduan, saan a maikanatad ti patarus a “daya ti Mamre,” yantangay agarup 3 km (2 mi) iti kaadayo daytoy a disso iti amianan ti agdama-aldaw a Hebron. Ti sasao a “Mamre, kayatna a sawen, Hebron” (Ge 23:19), mabalin a kaipapananna nga adda idi ti Mamre iti distrito ti Hebron.