ELIEZER

[Ti Diosko ket Katulongan].

1. Maysa a lalaki ti Damasco ken ti manamnama nga agtawid koma iti awanan anak a ni Abraham. Tinukoy ni Abraham kas “maysa nga anak iti sangakabbalayak.” (Ge 15:2, 3) Mangted iti impormasion dagiti nakabakab iti arkeolohia, kas kadagiti tapi manipud Nuzi, no apay a ni Abraham imbilangna ni Eliezer a pagtawidenna. Masansan nga agampon dagiti awan anakna nga agassawa tapno adda mangasikaso kadakuada inton lumakay ken bumaketdan ken adda mangitabon kadakuada inton matayda, ket isunton ti agtawid iti sanikuada. Nupay kasta, adda tulagan a no aganak ti agassawa kalpasan ti panangamponda, ti pudpudno nga anak ti kangrunaan nga agtawid.

Nalabit ni Eliezer daydiay nadakamat a kalakayan nga adipen ni Abraham ken mangimatmaton iti sangakabbalayanna, nga imbaon ni Abraham a mapan iti sangakabbalayan ni Nacor idiay makinngato a Mesopotamia tapno iyawidanna ni Isaac iti asawa. Kas ken apona nga Abraham, nagpaiwanwan ni Eliezer ken Jehova ken binigbigna ti panangidalanna.​—Ge 24:2, 4, 12-14, 56.

2. Ti ub-ubing kadagiti dua nga annak a lallaki ni Moises, a pinanaganan ni Moises iti kasta a nagan agsipud ta ti Dios idi ti katulonganna ta inispalna ni Moises manipud kampilan ni Faraon. (Ex 18:4) Maymaysa ti anak ni Eliezer, ni Rehabias, nga isu ti nagtaudan ti adu a kaputotan. Idi kaaldawan ni David, ti maysa kadagitoy a kaputotanna a ni Selomot, agraman ti kakabsatna, ket nadutokan nga agaywan iti amin a bambanag a napagbalin a nasantuan.​—1Cr 23:17; 26:25, 26, 28.

3. Anak a lalaki ni Bequer ken kaputotan ni Benjamin.​—1Cr 7:6, 8.

4. Maysa kadagiti pito a papadi a mangpagpaguni iti napigsa kadagiti trumpeta iti sanguanan ti lakasa ni Jehova idi impaisang-at dayta ni David idiay Jerusalem manipud iti balay ni Obed-edom.​—1Cr 15:24.

5. Anak ni Zicri ken panguluen iti tribu ni Ruben bayat ti panagturay ni David.​—1Cr 27:16.

6. Anak ni Dodavahu ti Maresa; mammadto a nangipakpakauna a rebbaento ni Jehova dagiti aramid ni Ari Jehosafat maipapan iti pannakisugponna ken nadangkes nga Ari Ocozias nga agaramid iti barko.​—2Cr 20:35-37; 1Ar 22:48.

7. Maysa kadagidiay pannakaulo dagiti destiero a nagsubli iti Jerusalem a kadua ni Esdras.​—Esd 8:16.

8. Maysa a padi kadagiti “annak ni Jesua” a karaman kadagidiay nangannurot iti pammagbaga ni Esdras ken nangikari a pagtalawenda ti ganggannaet nga assawada.​—Esd 10:18, 19.

9. Maysa a Levita a karaman kadagiti lallaki a nangpapanaw iti ganggannaet nga assawada, kas panangannurot iti pammagbaga ni Esdras.​—Esd 10:23, 44.

10. Kaputotan ni Harim a karaman kadagidiay nangipangag iti sasao ni Esdras a papanawenda ti ganggannaet nga assawada.​—Esd 10:31, 44.

11. Inapo ti natauan nga ina ni Jesus a ni Maria.​—Lu 3:29.