TUMENG, AGPARINTUMENG

Daytoy a nagsuopan iti saka ket napateg maipaay iti pannakasuporta ti intero a bagi. Ngarud, ti agkalogkalog wenno aglulupoy a tumtumeng iladawanda ti kinakapuy; ket dagiti agtintinnim-og a tumeng iladawanda ti panagbuteng.​—Job 4:4; Sal 109:24; Isa 35:3; Da 5:6; Heb 12:12.

Kadagiti 10,000 a lallaki ni Gideon, isuamin malaksid ti 300 ket nagparintumengda nga uminum, a mabalbalin nga inyasidegda dagiti rupada iti danum. No adda kellaat a dumarup, saanda a makapagalibtak ken nakasagana iti kastoy a posision. Ti panangpedped iti wawda ti ad-adda a pakaseknanda ngem iti peggad a pakaipasanguanda. Iti sabali a bangir, nagtalinaed a sitatakder ti 300, a nangalada iti danum babaen kadagiti imada ket dinildilanda dayta, a siaalibtak, sisisiput, ken sisasaganada. Gapuna, napagawid dagidiay 9,700 a di naannad.​—Uk 7:3, 5-8.

Iti piguratibo nga anag, ti ubing a ‘naipasngay iti rabaw dagiti tumeng’ ti maysa a tao a saan a ti inana, iti kasta tagtagiragsakenna ti pabor ken panangaywan dayta a tao, ket maibilang a kas anak wenno kaputotan dayta a tao, kas iti anak ni Bilha a naibilang kas anak ni Raquel.​—Ge 30:3-6; idiligyo ti Ge 50:23.

Inkari ni Jehova ti pannakaisubli maipaay iti ilina, ket inyaspingna ida iti annak ti Sion wenno Jerusalem, a ‘masappuyot iti rabaw dagiti tumeng,’ kayatna a sawen, mataripato a naimbag ken maisubli iti naparaburan a kasasaad.​—Isa 66:12, 13.

Panagparintumeng. Posible a maymaysa a ramut a sao ti nagtaudan ti Hebreo a sao maipaay iti “agparintumeng” (ba·rakhʹ) ken ti Hebreo a sao maipaay iti “bendision,” a mangipasimudaag nga adda dagiti gundaway a dagiti pamendision ket naited kadagiti tattao bayat a nakaparintumengda.

Bayat ti panangipakaasi iti parabur. Mabalin nga agparintumeng ti maysa a tao kas panangipakita iti panagraem wenno tapno ipakaasi ti parabur, kas idi a ti “panguluen ti limapulo” a nangibagi ken Ari Ocozias nagparintumeng iti sanguanan ni Elias tapno agpakaasi maipaay iti biagna ken iti biag ti lallaki a naikuyog kenkuana. (2Ar 1:13, 14) Sipaparintumeng a nagpakaasi ken Jesus ti maysa nga agkukutel tapno madalusan.​—Mr 1:40-42; kasta met ti Mr 10:17-22.

Bayat ti panagkararag. Masansan nga agparintumeng dagiti pudno a managdaydayaw no agkararagda iti Dios, yantangay daytoy a postura ket mayanatup a mangipasimudaag iti kinapakumbabada. (Esd 9:5; Ara 9:36, 40; 21:3-6) Nakaparintumeng ni Solomon iti sanguanan ti kongregasion ti Israel bayat ti panagkararagna idi maidedikar ti templo. (2Cr 6:13) Iti laksid ti bilin ti ari nga iti 30 nga aldaw, ni laeng Ari Dario ti rebbeng a pagdawatan, nagparintumeng ni Daniel nga agkararag ken Jehova mamitlo iti maysa nga aldaw, nga inar-aramidna dayta a dagiti tawa ti siledna iti pangatepan silulukatda a sumango idiay Jerusalem. (Da 6:6-11) Ni Jesu-Kristo a mismo nangipaay iti ulidan iti nakaparintumeng a panagkararag ken Jehova. Idiay minuyongan ti Getsemani idi rabii a pannakaliputna, ni Jesus “nagparintumeng ket nangrugi nga agkararag.”​—Lu 22:41.

Dagiti mangal-alagad iti ulbod a relihion nagparintumengda iti sango dagiti idolo ti pagdaydayawanda a didios. Ngem idi kaaldawan ni Elias, adda pay laeng 7,000 a matalek a tattao iti Israel, “amin dagiti tumeng a saan a nagparintumeng ken Baal.”​—1Ar 19:18; Ro 11:4.

Panagruknoy wenno panangbigbig iti nangato a saad. Ti panagparintumeng mabalin a mangipasimudaag iti panagruknoy wenno panangbigbig iti nangato a saad ti maysa a natan-ok. Nagparintumeng dagiti soldado iti sanguanan ni Jesus ket nagruknoyda kenkuana, ngem inaramidda dayta kas pangrabrabak.​—Mt 27:27-31; Mr 15:16-20.

Ni Jehova impaayanna ti matalek a napagungar a ni Jesu-Kristo iti nangatngato a saad ken iti nagan a nangatngato ngem iti tunggal sabali pay a nagan, “tapno iti nagan ni Jesus agparintumeng koma ti tunggal tumeng dagidiay adda sadi langit ken dagidiay adda ditoy daga ken dagidiay adda iti uneg ti daga.” Amin dagidiay gumun-od iti biag masapul nga agparintumengda nga agdaydayaw ken Jehova iti nagan ni Jesu-Kristo, ket isu bigbigenda kas Apo a pakaipadayagan ti Dios. Ramanen daytoy “dagidiay adda iti uneg ti daga,” nabatad a mangipakita a dagidiay napagungar manipud tanem masapul met a tungpalenda daytoy a makalikaguman.​—Fil 2:9-11; Jn 5:28, 29; Efe 1:9, 10.

Kangrunaanna, ti panangbigbig iti kinatan-ok ken kinasoberano ni Jehova ket makalikaguman kadagidiay agtartarigagay iti anamong ti Dios. Indeklara ni Jehova: “Iti kabukbukodak nagsapataak . . . a tunggal tumeng agparintumengto kaniak.” (Isa 45:23; Ro 14:10-12) Mayanatup ngarud ti napasnek a panangidagadag ti salmista kadagiti padana nga Israelita: “O sumrekkayo, agdayaw ken agruknoytayo; agparintumengtayo iti sanguanan ni Jehova a Nangaramid kadatayo.”​—Sal 95:6; kitaenyo ti POSTURA KEN TIGTIGNAY.