MAHANAIM

[Dua a Pakarso].

Maysa a lugar iti daya ti Jordan a sadiay a nasabet ni Jacob ti maysa a bunggoy dagiti anghel, kalpasan a simmina ken Laban. Iti kasta, inawagan ni Jacob dayta a disso iti “Mahanaim.” (Ge 32:1, 2) Ti kaipapanan daytoy a nagan (“Dua a Pakarso”) mabalin nga iparipiripna ti “pakarso ti Dios,” kas inrepresentar dagiti anghelna, ken ti pakarso ni Jacob. Mabalbalin nga iti maysa a tiempo kalpasanna, maysa a siudad ti naibangon iti dayta a disso. Idi maika-15 a siglo K.K.P., dagiti Gadita ti immuna a nakaitudingan daytoy a siudad, ket kalpasanna dagiti Levita a Merarita.​—Jos 13:24, 26; 21:34, 38.

Bayat ti panagturay ni David manipud Hebron, nagpaay ti Mahanaim kas kabesera ti kasalisal a pagarian ni Is-boset nga anak ni Saul ken simmukat kenkuana iti trono. Ipasimudaag daytoy a nasarikedkedan dayta a lugar ken nasayaat ti nagsaadanna. (2Sm 2:8-11, 29) Nabatad a napapatay ni Is-boset iti daytoy a siudad. (2Sm 4:5-7) Idi agangay, iti panagtalawna manipud rebelioso nga anakna a ni Absalom, dimteng ni David iti Galaad a sadiay siaasi a naawat idiay Mahanaim. Nagtalinaed sadiay kas kiddaw dagiti manangsuportana ket saan a nakipaset iti bakal a naan-anay a namagpatingga iti gandatna a mangagaw iti trono. (2Sm 17:24–18:16; 19:32; 1Ar 2:8) Bayat ti panagturay ni Solomon nga anak ni David, ti Mahanaim ket masakupan ti diputado a ni Ahinadab.​—1Ar 4:7, 14.

Iti Kanta ni Solomon 6:13, ti “sala ti dua a pakarso” mabalin met a maipatarus a “sala ti Mahanaim” (AS) wenno “sala a Mahanaim.” (AT) Nalabit ti matuktukoy isu ti panagsasala a nainaig iti maysa a kita ti piesta a naangay idiay Mahanaim.​—Idiligyo ti Uk 21:19, 21.

Saan a masigurado ti eksakto nga ayan ti Mahanaim, ngem masarakan dayta iti daya ti Jordan ken nabatad nga iti amianan ti Jaboc. (2Sm 2:29; Ge 31:21; 32:2, 22) Adda dagiti agkuna nga isu ti Khirbet Mahneh (wenno, Mihna), agarup 19 km (12 mi) iti amianan ti Jaboc ken agarup iti kasta met laeng a kaadayo iti daya ti Jordan, ngem adu dagiti mangipagarup nga adayo unay ti ayanna iti amianan ti Jaboc. Kunaen ni Yohanan Aharoni a ti Mahanaim isu ita ti Tell edh-Dhahab el-Gharbi, iti amianan nga igid ti Jaboc, agarup 12 km (7.5 mi) iti daya ti Jordan.​—The Land of the Bible, impatarus ken inurnos ni A. Rainey, 1979, p. 314, 439.