JABOC, NAAPRES A GINGET TI

Maysa kadagiti kangrunaan a naapres a ginget, wenno karayan, iti daya ti Jordan, a damo a nadakamat iti Kasuratan mainaig iti ibaballasiw ni Jacob iti “pagballasiwan ti Jaboc” a kaduana ti sangakabbalayanna. Kasta met nga iti asideg daytoy a pagballasiwan, nakigabbo ni Jacob iti maysa nga anghel.​—Ge 32:22-30.

Nupay ti kangrunaan a dandanum ti Jaboc ket aggubuay iti asideg ti ʽAmman (kadaanan a Rabba), ti dandanum ti karayan ket aggapu iti nagduduma a di maab-abbatan a waig ken adu nga ayus iti kalam-ekna sakbay nga agayus iti Jordan a 39 km (24 mi) iti amianan ti Natay a Baybay. Agarup 40 km (25 mi) laeng ti kaadayona ti gubuayan ti naapres a ginget ken ti pagpatinggaanna, ngem ti nagsikko nga ayus ti Jaboc ket addaan kaatiddog nga agarup 100 km (62 mi). Ti moderno-aldaw nga Arabiko a naganna a Wadi Zarqa ket literal a kaipapananna ti “Naapres a Ginget ti Asul.” Nalabit daytoy a nagan ket naala iti dapuen nga asul a maris ti Jaboc no kitaen manipud iti adayo. Nakaad-adu ti babassit nga ikan iti ababaw ken maballasiw a dandanumna.

Naitaratar iti nauneg ken nadam-eg a ginget a pagay-ayusan ti Jaboc dagiti mulmula nga adelfa ken adu a kita ti babassit a kayo. Daytoy a ginget nga addaan kadagiti narangkis a sikigan ti nagserbi kas nainkasigudan a beddeng. (De 3:16) Ti umuna a paset ti naapres a ginget nga aglayon manipud abagatan nga agpaamianan ket sigud a beddeng dagiti Ammonita ken dagiti Amoreo (Nu 21:24), idinto ta ti pasetna nga aglayon manipud laud nga agpadaya ti manggudua iti Galaad ken daytoy idi ti beddeng dagiti pagturayan dagiti Amoreo nga ar-ari a da Sihon ken Og. (De 2:37; Jos 12:2; Uk 11:13, 22)Daytoy met laeng a ginget ti maysa kadagiti kasayaatan ita a ruta a pangballasiwan iti Jordan manipud iti aw-awaganda idi iti Galaad.