DINA

[Naukom [kayatna a sawen, naabsuelto; naalangon]].

Anak a babai ni Jacob babaen ken Lea. Mabalin nga agarup innem ti tawen ni Dina idi nagsubli ni Jacob idiay Canaan ken nagyan idiay Succot, yantangay nayanak ni Dina idiay Haran idi agnanaed sadiay ni amana.​—Ge 30:21, 22, 25; 31:41.

Idi tiempo nga agnanaed ni Jacob ken ti pamiliana kadagiti tolda iti ruar ti siudad ti Siquem, di nainsiriban nga ugali ni agtutubo a Dina ti sumarungkar iti babbalasang a Canaanita sadiay. Iti maysa kadagitoy nga isasarungkar, isu ket pinilit ni Siquem nga anak ti Heveo a panguluen a ni Hamor. Nagayat kenkuana ni Siquem, ket ni Dina nagtalinaed iti pagtaengan ni Siquem agingga a naibalesan da Simeon ken Levi a kakabsatna iti ama ken ina. (Ge 34:1-31) Iruprupir ti dadduma a ni Dina ket maysa laeng nga ubing idi napilit. Nupay kasta, laglagipen koma a sakbay a napan ni Jacob idiay Siquem, nangibangon iti balay ken kadagiti abong-abong idiay Succot, a mangipasimudaag a nagnaed sadiay iti sumagmamano a tiempo. (Ge 33:17) Idiay Siquem, gimmatang iti maysa a benneg ti daga ken nalawag nga adda tiempo a nagtalinaed sadiay. Amin dagitoy, agraman ti kinapudno a ni Siquem nagayat ken Dina, ti “balasang,” patalgedanda a ni Dina, nupay agtutubo pay idi, ket saan a maysa nga ubing laeng idi tiempo a nakitimtimpuyog ken Siquem.​—Ge 33:18, 19; 34:12.

Adu a tawen kalpasanna, ni Dina, agraman ti dadduma pay a kameng ti sangakabbalayan ni Jacob, napan idiay Egipto iti awis ni Jose.​—Ge 46:7, 15.