EL-BETHEL

[Ti Dios ti Bethel].

Ti nagan nga inyawag ni Jacob iti disso a nangipatakderanna iti maysa nga altar kas panagtulnogna iti bilin ti Dios. (Ge 35:1, 7) Patien ti sumagmamano nga eskolar a “Ti Dios ti Bethel” ket saan a mabalin a nagan ti maysa a lugar, ken imutektekanyo ta kadagiti bersion ti Griego a Septuagint, Latin a Vulgate, Syriac a Peshitta, ken Arabiko naikkat ti “El” iti rugi. Nupay kasta, laglagipen koma a napnuan kaipapanan ken Jacob ti lugar iti aglawlaw ti Bethel. Nasurok a 20 a tawen a nasaksakbay, ditoy idi nga impalgak ti Dios ti bagina ken Jacob iti maysa a tagtagainep, nga inkarina a salaknibanna ni Jacob. Iti daydi metten a tiempo a natignay ti patriarka a mangikuna, “Pudno unay a ni Jehova adda itoy a disso.” (Ge 28:10-22) Gapu ta kasta ti napasamak, idi pinanaganannan dayta a lugar ti altar, arigna kinuna ni Jacob, ‘Ti Dios adda iti Bethel.’​—Idiligyo ti Ge 33:20.