PANANGPUTOL (ITI ULO)

Maysa a kita ti kadagsenan a dusa a saan nga imbilin ti Mosaiko a Linteg. Daytoy ket maysa a pamay-an ti panangpapatay nga ar-aramiden idi ti kaaduan a nasion. No maputolan idi ti ulo ti maysa a tao idiay Israel, kadawyanna a naaramid dayta kalpasan a napapatayen ti tao ken gagangay a naisayangkat tapno maimatangan ti publiko ti ipapatayna kas umsi wenno kas pakaammo iti publiko maipapan iti panangukom wenno pammakdaar.

‘Inngato ni Faraon ti ulo’ ti panguluen a panaderona, kayatna a sawen, pinutolanna ti ulo dayta. (Ge 40:19) Kalpasan a pinasag ni David ti higante a ni Goliat babaen iti maysa a bato manipud pallatibongna, innalana ti kampilan ni Goliat ket “siniguradona a pinapatay” babaen ti panangputolna iti ulo dayta iti sanguanan dagiti buyot ti Israel ken dagiti Filisteo. Daytoy ti namagbuteng unay iti buyot dagiti Filisteo ket nagbanag iti dakkel a pannakariribukda. (1Sm 17:51, 52) Pinuted dagiti Filisteo ti ulo ni Saul kalpasan ti ipapatayna, sa imbitinda ti bagina agraman dagiti bagi ti annakna iti pader ti siudad ti Bet-san. (1Sm 31:9, 12) Dagiti nadangkes a lallaki a da Recab ken Baanah pinapatayda ti anak ni Saul a ni Is-boset ket pinugotanda tapno iyegda ken David ti ulona, nga impagarupda a magun-odda ti pabor ni David. Maigapu itoy, pinapapatay ida ni David. (2Sm 4:5-12) Dagiti umili ti siudad ti Abel ti Bet-maaca impangagda ti pammatigmaan ti maysa a masirib a babai ket gineppasda ti ulo ni Sheba nga anak ni Bicri tapno maispalda ti siudadda, nga impalladawda ti ulo iti bangir ti pader maipaay ken Joab. Saan a naibaga no napapatay ni Sheba sakbay a napugotan. (2Sm 20:15, 21, 22) Dagiti laklakay ken mabigbigbig a lallaki ti Samaria ginudasda ti 70 nga annak ni Acab ket inlabbada dagita nga ulo ken impatulodda ken Jehu idiay Jezrael, a sadiay a naigabsuon dagita iti dua a bunton iti ruangan ti siudad kas pammaneknek iti kaitungpalan ti panangukom ni Jehova a sinao ni Elias.​—2Ar 10:6-10; 1Ar 21:20-22.

Inlanad ti Biblia a pinaputolan ni Herodes Antipas ti ulo ni Juan a Manangbautisar iti uneg ti pagbaludan kas kiddaw ti anak a babai ni Herodias. (Mt 14:8-11; Mr 6:24-28; Lu 9:9) Iti maysa a sirmata, ‘nakita ni Juan dagiti kararua dagidiay napapatay babaen ti wasay gapu iti panangsaksida ken Jesus ken gapu iti panagsao maipapan iti Dios.’​—Apo 20:4; kitaenyo ti KRIMEN KEN DUSA.