LEKSION 44
Maragsakan Kadi ti Dios iti Amin a Selebrasion?
Kayat ni Jehova a naragsaktayo ken kayatna met nga agselebrartayo sagpaminsan. Ngem maragsakan ngata ni Jehova iti amin a selebrasion ken okasion? Maipapan iti daytoy a banag, kasanotayo a maipakita ti ayattayo ken Jehova?
1. Apay nga adu a selebrasion ti kagura ni Jehova?
Mabalin a makigtotka a makaammo nga adu a selebrasion ti saan a naibatay iti Biblia wenno adda koneksionna iti ulbod a relihion. Mabalin pay a konektado dayta iti espiritismo wenno iti ideya a saan a matay ti kararua. Dadduma a selebrasion ket naggapu iti kadaanan a pampammati wenno iti panamati iti suerte. (Isaias 65:11) Imbilin ni Jehova kadagiti agdaydayaw kenkuana: “Suminakayo ken isardengyo a sagiden ti narugit a banag.”—2 Corinto 6:17.a
2. Ania ti marikna ni Jehova kadagiti selebrasion a nalabes a mangpadayaw kadagiti tattao?
Pakpakdaarannatayo ni Jehova a saantayo koma nga “agtalek kadagiti tattao laeng.” (Basaen ti Jeremias 17:5.) Dadduma a selebrasion ti mangpadayaw kadagiti agtuturay wenno soldado. Selebraran met ti dadduma ti pannakawayawaya ti nasionda wenno dagiti simbolo ti nasionda. (1 Juan 5:21) Dadduma met a selebrasion ket para kadagiti organisasion a konektado iti politika wenno iti dadduma pay nga organisasion ti komunidad. Ania ti marikna ni Jehova no sobra ti panangpadayawtayo iti maysa a tao wenno organisasion, lalo no maikontra dagiti ideyada iti panggepna?
3. Ania dagiti maar-aramid kadagiti selebrasion a saan a kayat ti Dios?
Ibaga ti Biblia a dakes ti “panagbarbartek, nalabes a panagragragsak, [ken] nalabes a panaginum iti arak.” (1 Pedro 4:3) Iti dadduma a selebrasion, saanen a makontrol dagiti tattao ti bagbagida ken agaramiddan iti immoral a bambanag. Tapno agtalinaedtayo a gayyem ni Jehova, masapul nga adaywantayo dagita a narugit nga ar-aramid.
AMMUEM TI AD-ADU PAY
Ammuem no kasanom a maparagsak ni Jehova babaen kadagiti desisionmo maipapan kadagiti okasion ken selebrasion.
4. Saanka a makiraman kadagiti selebrasion a kagura ni Jehova
Basaen ti Efeso 5:10, sa pagsaritaan dagitoy a saludsod:
Ania ti masapul a siguraduentayo no agdesisiontayo no selebrarantayo ti maysa nga okasion?
Ania dagiti selebrasion a popular iti lugaryo?
Panagkunam, maragsakan ngata ni Jehova kadagita a selebrasion?
Kas pagarigan, napampanunotmo kadin no ania ti marikrikna ti Dios iti panagselebrar iti birthday? Awan a pulos ti mabasa iti Biblia nga agdaydayaw ken Jehova a nagselebrar iti birthday, ngem adda ibagana a dua a nagselebrar iti birthday a saan nga agserserbi Kenkuana. Basaen ti Genesis 40:20-22 ken Mateo 14:6-10. Kalpasanna, pagsaritaan dagitoy a saludsod:
Ania ti pagpadaan dagita a dua a selebrasion ti birthday?
Base kadagita a salaysay ti Biblia, panagkunam, ania ti marikrikna ni Jehova maipapan iti birthday?
Ngem baka mapanunotmo latta, ‘Talaga kadi a napateg ken Jehova no agselebrarak iti birthday wenno iti dadduma a selebrasion a saan a naibatay iti Biblia?’ Basaen ti Exodo 32:1-8. Kalpasanna, i-play ti VIDEO, sa pagsaritaan dagiti sumaruno a saludsod.
Apay a masapul a siguraduentayo no ania ti awaten ni Jehova?
Kasano a maaramidtayo dayta?
No kasano a maammuan no ti maysa a selebrasion ket kagura ti Dios
Naibatay kadi dayta kadagiti sursuro a saan nga anamongan ti Biblia? Tapno maammuam, i-research-mo no kasano a nangrugi dayta.
Sobra kadi ti panangpadayawna kadagiti tattao, organisasion, wenno simbolo ti nasion? Ni Jehova ti kangrunaan a padayawantayo ken agtalektayo nga isu laeng ti makasolbar kadagiti problema ti lubong.
Maikontra kadi kadagiti estandarte ti Biblia dagiti kaugalian ken dagiti maar-aramid iti dayta? Masapul a kanayon a nadalustayo iti moral.
5. Tulongam ti dadduma a mangrespeto iti patpatiem
Mabalin a marigatanka nga agsaan no pilitendaka ti dadduma a makiraman iti selebrasion a saan a kayat ni Jehova. Naanus ken nataktika koma ti panangilawlawagmo iti desisionmo. Tapno makitam no kasanom nga aramiden dayta, i-play ti VIDEO.
Basaen ti Mateo 7:12, sa pagsaritaan dagitoy a saludsod:
Base iti daytoy a teksto, masapul kadi nga ibagam kadagiti saan a Saksi a kapamiliam a saanda koma a selselebraran ti maysa nga okasion?
Ania ti mabalinmo nga aramiden tapno maipariknam kadagiti kapamiliam nga uray no saanka a makipagselebrar kadakuada, ay-ayatem ken ipatpategmo latta ida?
6. Kayat ni Jehova a naragsaktayo
Kayat ni Jehova a ma-enjoy-tayo ti makikadua kadagiti kapamilia ken gagayyemtayo. Basaen ti Eclesiastes 8:15, sa pagsaritaan daytoy a saludsod:
Kasano nga ipakita daytoy a teksto a kayat ni Jehova a naragsaktayo?
Kayat ni Jehova a naragsak dagiti agdaydayaw kenkuana ken ma-enjoy-da ti agkakadua. I-play ti VIDEO tapno makitam no kasano nga agpayso dayta kadagiti internasional a kombension.
Basaen ti Galacia 6:10, sa pagsaritaan dagitoy a saludsod:
Masapul kadi a selebrarantayo dagiti popular nga okasion tapno maaramidtayo ti “naimbag” iti dadduma?
Ania ti mas mangparagsak kenka—no obligadoka a mangted gapu ta adda okasion wenno no mangtedka gapu ta kayatmo?
Adu a Saksi ti sagpaminsan a mangiplano iti espesial a banag para kadagiti annakda ken sorpresaenda pay ketdi ida kadagiti regalo. No adda annakmo, ania dagiti espesial a banag a mabalinmo nga aramiden wenno ited kadakuada?
KUNA TI DADDUMA: “Saan nga importante no ania ti nangrugian ti maysa nga okasion. Ti importante ket naragsakkayo nga agkakadua nga agkakapamilia ken aggagayyem.”
Ania ti ibagam?
SUMARIO
Kayat ni Jehova a naragsaktayo nga agkakadua nga agkakapamilia ken aggagayyem. Ngem kayatna met a liklikantayo dagiti selebrasion a kagurana.
Rebiu
Ania dagiti saludsod a panunotentayo tapno maammuantayo no ti maysa a selebrasion ket kayat ni Jehova wenno saan?
Ania ti mabalintayo nga aramiden tapno maawatan dagiti kapamilia ken gagayyemtayo ti desisiontayo maipapan kadagiti selebrasion?
Kasanotayo nga ammo a kayat ni Jehova a naragsaktayo ken ag-enjoy-tayo?
AGDISKOBREKA PAY
Ammuem dagiti okasion a saan a selselebraran dagiti Kristiano.
“Apay a Saan a Selselebraran Dagiti Saksi ni Jehova ti Dadduma nga Okasion?” (Artikulo iti website)
Kitaem ti uppat a rason no apay a saan a kayat ti Dios a selebrarantayo ti birthday.
“Apay a Saan nga Agselselebrar iti Birthday Dagiti Saksi ni Jehova?” (Artikulo iti website)
Kitaem no kasano a dagiti ubbing a mangay-ayat ken Jehova kayada a paragsaken isuna bayat dagiti holiday.
Minilion a Kristiano ti saan nga agkriskrismas. Ania ti mariknada iti desisionda?
“Nabirokanda ti Nasaysayaat a Banag” (Ti Pagwanawanan, Disiembre 1, 2012)