Dagiti Saludsod Manipud Kadagiti Agbasbasa

Adu kadagiti Saksi ni Jehova ti mangramrambak iti anibersario ti kasarda. Ti kasangay ket maysa nga anibersario iti aldaw a pannakayanakyo. Gapuna, apay a di mabalin a selebraran dagiti panagkasangay idinto ta mabalin a selebraran dagiti anibersario ti kasar?

Kinapudnona, agpada a saan a nasken a selebraran ti maysa a Kristiano dagitoy. Ngem dina kayat a sawen nga agpadada iti pateg wenno masapul a matmatan dagiti Kristiano dagiti anibersario ti kasar kas iti panangmatmatda kadagiti kasangay.

Kas nadakamaten, mabalin a maikuna nga agpadada nga anibersario gapu ta ti “anibersario” ket ‘tinawen a petsa a mangtanda iti maysa a pasamak.’ Mabalin nga anibersario dayta ti aniaman a pasamak​—ti aldaw a pannakaaksidentem iti lugan, pannakaimatangmo iti eklipse ti bulan, panaglalangoyyo a sangapamilian, ken dadduma pay. Nabatad a saan a pagbalinen dagiti Kristiano a naisangsangayan nga aldaw wenno agpadaya iti tunggal “anibersario” tapno lagipenda dayta. Masapul nga usigenyo dagiti aspeto ti maysa a pasamak sayo ikeddeng ti maitutop nga aramidenyo.

Kas pagarigan, espesipiko nga imbilin ti Dios kadagiti Israelita a selebraranda a tinawen ti aldaw ti ilalabas ti anghelna kadagiti balay dagiti Israelita sadi Egipto ken ti ipapanaw ti ilina idi 1513 K.K.P. (Exodo 12:14) Idi a dagiti Judio, a pakairamanan ni Jesus, sinelebraranda ti anibersario dayta a pasamak, inaramidda dayta kas panangtungpal iti bilin ti Dios, ngem saanda a nangangay iti padaya wenno nagsisinnagut. Dagiti Judio imbilangda met ti pannakaidedikar manen ti templo kas naisangsangayan nga anibersario. Nupay saan a naibilin iti Biblia ti pananglagip iti daytoy historikal a pasamak, ipasimudaag ti Juan 10:22, 23 a di binabalaw ni Jesus dayta. Kamaudiananna, adda naisangsangayan a panagtataripnong dagiti Kristiano iti anibersario ti ipapatay ni Jesus. Siempre, maar-aramid daytoy kas panagtulnog iti nabatad a bilin a masarakan iti Sao ti Dios.​—Lucas 22:19, 20.

Komusta met ngay ti panangselebrar kadagiti anibersario ti kasar? Iti dadduma a pagilian, gagangay ti panangrambak dagiti agassawa iti anibersario ti iseserrekda iti estado a naasawaan, maysa nga urnos nga impasdek ti Dios. (Genesis 2:18-24; Mateo 19:4-6) Awan duadua a nasayaat ti panangmatmat ti Biblia iti panagasawa. Uray ni Jesus ket nakiboda ken timmulong a namagbalin iti dayta a pasken a naragsak.​—Juan 2:1-11.

No kasta, saan a karkarna no iti anibersario ti kasarda kayat dagiti agassawa a lagipen ti kinaragsakda iti dayta nga okasion ken pabaruenda ti determinasionda nga agtinnulong iti panagballigida kas agassawa. Isudan ti mangeddeng no rambakanda daytoy naragsak nga okasion iti pribada, kas agassawa, wenno kaduada ti sumagmamano a kakabagian wenno nasinged a gagayyem. Ti okasion saan koma nga isut’ panggapuan a mangangay iti dakkel a sosial a taripnong. Iti dayta a pasken, nalabit kayat dagiti Kristiano ti agpaidalan kadagiti prinsipio nga agaplikar iti inaldaw a panagbiagda. Gapuna, personal a pangngeddeng ti maysa no rambakanna man wenno saan ti anibersario ti kasar.​—Roma 13:13, 14.

Ngem ti ngay panangrambak iti kasangay? Adda kadi mabasa iti Biblia maipapan iti kasta nga anibersario?

Bueno, idi apagtapog daytoy a siglo, dagiti Estudiante ti Biblia, kas awag idi kadagiti Saksi ni Jehova, rinambakanda dagiti kasangay. Adu kadakuada ti addaan kadagiti babassit a libro a maawagan Daily Heavenly Manna. Naglaon dagitoy iti maysa a teksto ti Biblia iti inaldaw, ket adu a Kristiano ti nangipigket kadagiti babassit a retrato dagiti padada nga Estudiante ti Biblia kadagiti binulong iti aldaw a nakaibatogan ti kasangayda. Kasta met, naisalaysay iti Pebrero 15, 1909 a ruar ti The Watch Tower, nga iti maysa a kombension idiay Jacksonville, Florida, E.U.A. impanda iti entablado ni Kabsat Russell, agdama idi a presidente ti Sosiedad. Apay? Bueno, inikkanda iti sumagmamano a kahon ti lukban, pinia, ken kahel kas sorpresa a sagut iti panagkasangayna. Pataldiap kadatayo dayta maipapan iti napalabas. Makapainteres a lagipen ta iti dayta a tiempo, rinambakan met dagiti Estudiante ti Biblia ti Disiembre 25 kas anibersario ti pannakayanak ni Jesus, wenno kasangayna. Ugalida pay ketdi idi nga adda naisangsangayan a panangrabii iti Krismas idiay hedkuarter ti Brooklyn.

Siempre, rimmang-ayen iti adu a benneg iti naespirituan ti ili ti Dios sipud idi. Idi dekada 1920, ti rimmaniag a lawag ti kinapudno tinulonganna ida a mangtarus kadagiti sumaganad:

Saan a nayanak ni Jesus iti Disiembre 25, ti petsa nga adda nakainaiganna iti pagano a relihion. Naibilin kadatayo iti Biblia a lagipentay ti petsa a pannakatay ni Jesus, saan a ti anibersario ti pannakayanakna wenno pannakayanak ti asinoman. Ti panangaramid iti dayta ket maitunos iti Eclesiastes 7:1 ken iti kinapudno a napatpateg ti pagbanagan ti biag ti matalek a tao ngem iti aldaw ti pannakayanakna. Awan nailanad iti Biblia a matalek nga adipen a nangselebrar iti kasangayna. Inlanadna dagiti panagkasangay dagiti pagano, nga innaigna dagitoy iti kinadangkok. Usigentayo ti nagtaudan dagidiay nga anibersario ti kasangay.

Ti umuna isu ti kasangay ni Faraon idi kaaldawan ni Jose. (Genesis 40:20-23) Kuna ti Encyclopædia of Religion and Ethics ni Hasting iti artikulona maipapan iti panagkasangay: “Ti kannawidan a pananglagip iti aldaw ti pannakayanak, agraman ti pannakarambak, panangkuenta ti panawen, ken kaipapananna ket adda pakainaiganna kadagiti narelihiosuan a prinsipio idi ugma.” Di nagbayag, inadaw ti encyclopedia ti insurat ti Egyptologist a ni Sir J. Gardner Wilkinson: “Nakapatpateg iti tunggal Egipcio ti aldaw, ken uray ti oras ti pannakayanakna; ket mabalin a kas idiay Persia, rinambakan ti tunggal maysa ti kasangayna buyogen ti adu a panagragragsak, linglingayenna dagiti gagayyemna iti amin a kita ti pagpalpaliwaan ti kagimongan, ken mangidasar iti aglaplapusanan nga agkakaimas a putahe.”

Ti sabali pay a selebrasion ti kasangay a nailanad iti Biblia isu ti panagkasangay ni Herodes, nga iti dayta naputolan ni Juan a Mammautisar. (Mateo 14:6-10) Kastoy ti panangilawlawag ti The International Standard Bible Encyclopedia (1979 nga edision): “Dagiti Griego sakbay ti panawen Helenistiko sinelebraranda ti kasangay dagiti didiosenda ken mabigbigbig a tattao. Iti Griego, genéthlia ti awag kadagitoy a selebrasion, idinto ta ti genésia kaipapananna ti selebrasion a panglagip iti kasangay ti pimmusay a nalatak a tao. Iti 2 Mac[abeo] 6:7, mabasatayo ti maipapan iti binulan a genéthlia ni Antiochus IV, nga iti dayta nga okasion mapilit dagiti Judio a ‘makiraman kadagiti naidaton.’ . . . Idi a nagkasangay ni Herodes, rinambakanna dayta maitunos iti Helenistiko a kaugalian; awan ebidensia nga agselselebrar dagiti Israelita kadagiti kasangay sakbay ti panawen Helenistiko.”

Agpayso a di makumikom dagiti pudno a Kristiano ita kadagiti puon ken posible a nagkauna a narelihiosuan a nakainaigan ti tunggal aramid wenno kannawidan, ngem dida met agduyos a mangyaleng-aleng kadagiti ipaspasimudaag ti Sao ti Dios. Ramanen daytoy ti banag a dagiti laeng pagano ti nairekord iti Biblia a nangrambak kadagiti kasangay ken nainaig kadagiti kinadangkok. Gapuna, nabatad a saan a nasayaat ti panangmatmat ti Kasuratan iti panangrambak iti kasangay, banag a saan a laglag-anen dagiti napasnek a Kristiano.

Ngarud, nupay bukod a pangngeddeng dagiti Kristiano no selebraranda ti anibersario ti kasarda, adda dagiti nainkalintegan a rason a di rambakan dagiti nataengan a Kristiano dagiti kasangay.