Salsaludsod Dagiti Agbasbasa
Ni kadi Jose, a matalek nga adipen ni Jehova, nagusar iti naisangsangayan a pirak a kopa idi binasana dagiti partaan, kas agparang nga ipasimudaag ti Genesis 44:5?
Awan ti rason a patien a nagusar ni Jose iti aniaman a kita ti panagpadles.
Ti Biblia ti makaibaga no ania ti pudno a pannakaawat ni Jose mainaig iti panagsalamangka tapno maammuan ti masanguanan. Idi un-unana, idi nakiddaw nga ipakaawatna dagiti tagtagainep ni Faraon, inulit-ulit nga imbaga ni Jose a ti laeng Dios ti makabael a ‘mangiwaragawag’ kadagiti pasamak iti masanguanan. Kas resultana, namati a mismo ni Faraon a ti Dios a daydayawen ni Jose—ti pudno a Dios, saan ket a ti pannakabalin ti panagpadles—ti nangipakaammo ken ni Jose iti detalye maipapan iti masanguanan. (Genesis 41:16, 25, 28, 32, 39) Idi agangay, iti Linteg a naited ken ni Moises, imparit ni Jehova ti panagsalamangka wenno panagpadles, ket napasingkedan nga isu laeng ti makaibaga iti mapasamak iti masanguanan.—Deuteronomio 18:10-12.
Apay ngarud nga impasimudaag ni Jose babaen ti adipenna nga isu ket nagusar iti pirak a kopa idi ‘binasana a silalaing dagiti partaan’?a (Genesis 44:5) Nasken nga usigentayo dagiti kasasaad idi naisawang dayta.
Gapu iti nakaro a bisin, dagiti kakabsat ni Jose nagdaliasatda a nagturong idiay Egipto tapno mangalada iti taraon. Nabayag sakbay dayta, dagitoy a kakabsatna ti nangilako kenkuana kas adipen. Ita, dida ammo a ti pagkidkiddawanda iti tulong ket ti mismo a kabsatda, a maysan nga administrador ti taraon idiay Egipto. Saan a nagpabigbig ni Jose kadakuada. Imbes ketdi, inkeddengna a suboken ida. Mayanatup a tarigagayan ni Jose nga ammuen no napudno ti panagbabawida. Kayatna pay a maammuan no ay-ayatenda—ken no kasano kadakkel ti panagayatda—iti kabsatda a ni Benjamin ken ni Jacob nga amada, a maay-ayatan unay ken ni Benjamin. Gapuna, sinubok ida ni Jose.—Genesis 41:55–44:3.
Binilin ni Jose ti maysa kadagiti adipenna tapno makargaan iti taraon dagiti supot dagiti kakabsatna, maisubli iti uneg ti supot ti kuarta ti tunggal maysa, ken ti pirak a kopa ni Jose maikabil iti supot ni Benjamin. Kabayatan amin daytoy, nagtignay ni Jose a kasla latta iti maysa nga administrador ti pagano a pagilian. Imbagayna ti bagina, dagiti tignayna, ken ti panagsasaona iti kinatao ti kasta nga administrador, a pagarupen dagiti di nakadlaw a kakabsatna.
Idi kinasao ni Jose dagiti kakabsatna, intultuloyna ti nagpammarang, nga inyimtuodna kadakuada: “Saanyo kadi nga ammo a ti maysa a lalaki kas kaniak kabaelanna ti agbasa a silalaing kadagiti partaan?” (Genesis 44:15) Gapuna, ti kopa ket nalawag a paset dayta a panangsubok. Nagpammarang laeng ni Jose iti panangusarna iti kopa idi binasana dagiti partaan, no kasano a pammarang laeng ti pammabasol a panangtakaw ni Benjamin iti dayta.
[Footnote]
a Iti panangdeskribirna iti daytoy a nagkauna nga aramid, inlawlawag ti The Holy Bible, With an Explanatory and Critical Commentary, nga inedit ni F. C. Cook: “Aramidenda dayta babaen ti panangitinnagda iti balitok, pirak, wenno saniata, iti danum, sada amirisen ti langana; wenno babaen laeng ti panangkitada iti danum a kasla kumitkitada iti maysa a sarming.” Kuna ti komentarista ti Biblia a ni Christopher Wordsworth: “No dadduma, ti kopa ket punuenda iti danum, sada ited ti sungbat babaen ti ladawan a patauden ti init iti danum nga adda iti kopa.”