Inaramidda ti Pagayatan ni Jehova

Pammakawan a Nangiwaya iti Pannakaisalakan

ADDA nakaam-amak a palimed dagiti sangapulo nga annak a lallaki ni Jacob a sitatakder iti saklang ti primero ministro ti Egipto. Adu a tawen sakbayna, inlakoda a kas adipen ni Jose a kabsatda iti ama, a pinanggepda nga ibaga ken tatangda a ni Jose ket pinatay ti atap nga animal.​—Genesis 37:18-35.

Ita, agarup 20 a tawen kalpasanna, adda nakaro a bisin ket napilitan dagitoy sangapulo a lallaki a napan sadi Egipto tapno gumatangda iti taraon. Ngem saan a naannayas dagiti bambanag. Ti primero ministro, nga agserserbi met kas administrador ti taraon, pinabasolna ida nga espiada. Pinaibaludna ti maysa kadakuada ket pinagawidna dagiti dadduma sada agsubli nga ikuyogda ti inaudi a kabsatda a ni Benjamin. Idi inaramidda dayta, nangiwayat ti primero ministro iti plano tapno maaresto ni Benjamin.​—Genesis 42:1–44:12.

Nagpakpakaasi ni Juda, maysa kadagiti annak ni Jacob. ‘No agawidkami a saanmi nga ikuyog ni Benjamin, awan duadua a matay ni tatangmi,’ kinunana. Pagammuan, adda napasamak a di ninamnama ni Juda wenno ti asinoman kadagiti kaduana a nagbiahe. Imbilin ti primero ministro kadagiti amin nga adda iti siled, malaksid kadagiti annak ni Jacob, a pumanawda pay laeng. Kalpasanna, nagsangit iti napigsa. Idi nagkalman, kinunana: “Siak ni Jose.”​—Genesis 44:18–45:3.

Pammakawan ken Pannakaisalakan

“Sibibiag pay la ni amak?” insaludsod ni Jose kadagiti kakabsatna iti ama. Saanda a nakasungbat. Wen, saan nga ammo dagiti kakabsat ni Jose no ania ti ibagada. Rumbeng kadi a maragsakanda, wenno agbuteng? Inlakoda ngamin idi daytoy a tao kas adipen, 20 a tawen sakbayna. Adda pannakabalin ni Jose a mangipaibalud kadakuada, mangpagawid kadakuada nga awan awitda a taraon, wenno​—ti kadaksan a mapanunotda a mabalin nga aramidenna​—mangipapatay kadakuada! Nainkalintegan laeng a dagiti kakabsat ni Jose iti ama “dida nakasungbat kenkuana; gapu ta nariribukda iti sanguananna.”​—Genesis 45:3.

Pinagtanang a dagus ni Jose dagitoy a lallaki. “Dawatek kadakayo, Umasidegkayo kaniak,” kinunana. Nagtungpalda. Kalpasanna, kinunana: “Siak ni Jose a kabsatyo, nga inlakoyo a naipan ditoy Egipto. Ket ita saankayo nga agladingit, dikayo met agpungtot kadagiti bagbagiyo ta inlakodak ditoy: ta imbaonnak ti Dios nga inyuna kadakayo tapno mamabiagak.”​—Genesis 45:4, 5.

Adda pakaibatayan ti panangngaasi ni Jose. Napaneknekanna a nagbabawidan. Kas pagarigan, idi pinabasol ni Jose dagiti kakabsatna nga espiada, naallingagna ida a nagkuna iti maysa ken maysa: “Pudno a nakabasoltayo iti maikaniwas ken kabsattayo . . . Isu ti gapuna a lak-amentayo daytoy a pagel.” (Genesis 42:21) Maysa pay, imbaga ni Juda nga isu laengen ti agbati a kas adipen imbes a ni Benjamin tapno maisubli ti baro ken ni tatangna.​—Genesis 44:33, 34.

No kasta, nainkalintegan ti panangngaasi ni Jose. Kinapudnona, nabigbigna a mabalin a pakaisalakanan ti intero a pamiliana ti panangaramidna iti kasta. Gapuna, imbaga ni Jose kadagiti kakabsatna iti ama nga agsublida ken Jacob nga amada ket kunaenda kenkuana: “Kastoy ti kuna ni anakmo a Jose, Ti Dios inkabilnak nga apo iti amin nga Egipto: sumalogka kaniak, dika agtaktak; ket agnaedkanto iti daga a Gosen, ket agtaengkanto iti asideg kaniak, siak, ken dagiti annakmo, ken dagiti annak dagiti annakmo, ken dagiti an-animalmo a babassit ken dadakkel, ken amin nga adda kenka: ket siak taraonankanto sadiay.”​—Genesis 45:9-11.

Ti Natantan-ok a Jose

Maawagan ni Jesu-Kristo iti Natantan-ok a Jose, ta adda napatak a pagpadaan dagitoy dua a lallaki. Kas ken Jose, ni Jesus ket inrurumen dagiti kakabsatna, dagiti padana a kaputotan ni Abraham. (Idiligyo ti Aramid 2:14, 29, 37.) Ngem agpada a nabaliktad ti kasasaadda. Idi agangay, ni Jose a dati nga adipen, nagbalin a primero ministro, maikadua laeng ken ni Faraon. Umasping iti dayta, pinagungar ni Jehova ni Jesus ket intan-okna iti nangatngato a saad “iti makannawan nga ima ti Dios.”​—Aramid 2:33; Filipos 2:9-11.

Kas primero ministro, mabalin ni Jose ti mangilako iti taraon kadagiti amin nga umay gumatang iti taraon sadi Egipto. Iti kaaldawantayo, us-usaren ni Natantan-ok a Jose ti klase matalek ken masirib nga adipen ditoy daga a mangipaay iti naespirituan a taraon “iti umiso a tiempo.” (Mateo 24:45-47; Lucas 12:42-44) Kinapudnona, dagidiay umay ken Jesus “saandanto nga agbisinen wenno mawaw iti uray kaanoman . . . agsipud ta ti Kordero, nga adda iti tengnga ti trono, ipastorannanto ida, ket idalannanto ida kadagiti ubbog ti dandanum ti biag.”​—Apocalipsis 7:16, 17.

Ti Maadaltayo

Nangipaay ni Jose iti nagsayaat nga ulidan iti asi. No ipakat ti nainget a hustisia, dusaenna koma dagidiay nangilako kenkuana a kas adipen. Iti kasumbangirna, ti sentimiento mabalin a tinignayna koma ni Jose a mangpalabas iti basolda. Ngem saan nga inaramid ni Jose ti aniaman kadagitoy. Sinubokna ketdi ti panagbabawi dagiti kakabsatna. Ket idi makitana a napudno ti panagladingitda, pinakawanna ida.

Mabalintay a tuladen ni Jose. No makitatayo a pudno a nagbalbaliwen ti maysa a tao a nakabasol kadatayo, nasken a pakawanentayo. Siempre, pulos a ditay koma ikidem dagiti matatayo iti nadagsen a basol gapu iti sentimiento. Iti sabali a bangir, ditay koma ikidem dagiti matatayo kadagiti aramid a pakakitaan iti pudno a panagbabawi gapu iti sakit ti nakem. No kasta, “itultuloy[tayo] nga anusan ti maysa ken maysa ken sibubulos a pakawanen ti maysa ken maysa.” (Colosas 3:13) No aramidentay dayta, tultuladentayo ni Jehova a Diostayo, a ‘sisasagana a mamakawan.’​—Salmo 86:5; Mikias 7:18, 19.