HUPPIM

Anak, wenno kaputotan, ni Benjamin a nairaman iti listaan dagidiay dimteng iti Egipto a naikuyog iti sangakabbalayan ni Jacob idi 1728 K.K.P. wenno nayanak sadiay bayat ti panagbiag ni Jacob. (Ge 46:8, 21) Isingasing ti dadduma pay a teksto a mabalin nga isu ket apoko wenno apoko iti tumeng babaen kada Bela ken Iri. (1Cr 7:6, 7, 12; nalawag a naawagan Huram iti 8:1-5.) Gistay saan nga ipalubos ti tiempo a maaddaan ni Benjamin iti appoko idi simrek iti Egipto, ngem ti Genesis 46:8 matarusan nga ipasimudaagna nga amin dagitoy a kararua ket nayanaken bayat a sibibiag pay idi ni Jacob idiay Egipto, a saanna a kanayon a kayat a sawen a nayanakda sakbay a napan sadiay ni Jacob ken ti sangakabbalayanna. (Kitaenyo ti BENJAMIN Num. 1.) Ti pamilia nga imbangon ni Huppim (naawagan met iti Hufam), a naawagan Hufamita, ket naibilang a karaman iti tribu ni Benjamin idi naaramid ti maikadua a pannakasensus dagiti Israelita idiay let-ang. (Nu 26:1-4, 38, 39) Nadakamat met ni Huppim iti 1 Cronicas 7:14, 15 kas nainaig ken Manases, ngem saan a nalawag no ania ti relasionda.