GOSEN

1. Rehion iti Egipto a nagnaedan dagiti Israelita iti 215 a tawen (1728-1513 K.K.P.). (Ge 45:10; 47:27) Nupay saan a masinunuo ti eksakto nga ayan ti Gosen, agparang a nagsaad dayta iti makindaya a paset ti Delta ti Nilo, ti pagserkan iti mismo nga Egipto. Pudno daytoy agsipud ta idi naggapu ni Jose iti pagnanaedanna iti Egipto, idiay Gosen ti nagsabtanda ken amana a nagdaliasat manipud Canaan. (Ge 46:28, 29) Ipamatmat dagiti patarus ti Griego a Septuagint a ti Gosen adda iti aglikmut ti Wadi Tumilat.

Adda an-animal nga impaaywan ni Faraon idiay Gosen, ket impastor met sadiay dagiti Hebreo ti ar-arban ken pangpangen ti an-animalda. (Ge 47:1, 4-6; 50:8) Ti pannakailadawan ti rehion kas ‘ti kasayaatan unay iti daga ti Egipto’ ket nalabit relatibo a termino a tumukoy iti kadam-egan a pagpastoran a daga, a mayataday unay iti partikular a kasapulan ti pamilia ni Jacob. Ti Gosen mabalin nga isu met laeng ti “daga ti Rameses.” (Ge 47:6, 11) Mangrugi iti maikapat a didigra iti Egipto, espesipiko a pinili ni Jehova a saan a madangran ti “Gosen.”​—Ex 8:22; 9:26.

2. Maysa a siudad iti kabambantayan ti Juda. (Jos 15:20, 48, 51) Ti sumagmamano nga eskolar ipapanda nga isu dayta ti Edh Dhahiriya, agarup 18 km (11 mi) iti abagatan a laud ti Hebron. Ti “daga ti Gosen” a natukoy iti Josue 10:41 ken 11:16 ket nalabit maysa a distrito iti asideg ti Edh Dhahiriya. Daytoy a distrito mabalin a saklawenna ti kabambantayan iti nagbaetan ti Hebron ken ti Negeb.