EFRAIM
[Nagdoble a Kinabunga].
1. Anak ni Jose babaen ken asawana nga Asenat, ti anak ni Potifera a padi ti On. Ni Efraim, adingen ni Manases, ket nayanak idiay Egipto sakbay a nangrugi ti pito-tawen a bisin. Pinanaganan ni amana iti Efraim “agsipud ta, kas panangadaw [ken Jose], ‘Ti Dios pinagbalinnak a nabunga iti daga ti kinapimpimanko.’”—Ge 41:50-52.
Idi matmatayen ni Jacob, kasla pinagbalinna nga annakna dagiti appokona a da Efraim ken Manases ket imbilangna a kapadpada dagiti mismo nga annakna. (Ge 48:5) Ni amada a Jose, nga immawat iti kalintegan kas inauna kadagiti annak ni Jacob, ket immawat iti dua a kapaset ti tawid manipud ken amana babaen ti tawid ti tribu nga agpaay kada Efraim ken Manases. (1Cr 5:1; idiligyo ti Ge 48:21, 22; De 21:17; Jos 14:4.) Idi binendisionanna da Efraim ken Manases, ad-adda a pinaraburan ni patriarka Jacob ni Efraim ket babaen iti padto impasimudaagna nga agbalinto a dakdakkel.—Ge 48:13-20.
Ipaay ti 1 Cronicas 7:20-27 ti listaan ti kapuonan ti annak ni Efraim ken dagiti naud-udi a kaputotanna, a nagpatingga ken Josue, a nangidaulo kadagiti Israelita iti panagturongda iti Naikari a Daga. Da Ezer ken Elead, nalabit annak ni Efraim, ket pinapatay dagiti lallaki ti Gat. Sumagmamano a tiempo kalpasan ti ipapatay dagitoy nga annak, ni Efraim pinutotna ni Berias.
2. Ti nagan nga Efraim ket agaplikar met iti tribu a nagtaud kenkuana. Agarup makatawen kalpasan ti Ipapanaw iti Egipto, ti 40,500 a mannakidangadang a lallaki ti Efraim nga agtawen iti 20 nga agpangato ket ad-adu iti 8,300 ngem iti bilang dagiti makabael a lallaki ti Manases. (Nu 1:1-3, 32-35) Ngem idi agpatingga ti 40 a tawen a panagallaalla idiay let-ang, dagiti naipasalista a lallaki ti Efraim nagdagupda laeng iti 32,500, wenno basbassitda iti 20,200 ngem kadagiti lallaki ti Manases. (Nu 26:34, 37) Nupay kasta, naipadto nga agbalin a dakdakkel ti Efraim. Idi bembendisionanna dagiti Israelita, naimpadtuan a dinakamat ni Moises maipapan “ti pinullo a ribu ni Efraim,” ngem “ti rinibu ni Manases.”—De 33:17.
Idiay let-ang naituding dagiti Efraimita nga ipangpanguluan ni Elisama nga agpakarsoda iti makinlaud a sikigan ti tabernakulo, a kaduada dagiti tribu ti Manases ken Benjamin. Daytoy tallo a tribu a benneg ti maikatlo iti urnos ti panagmartsa.—Nu 2:18-24.
Teritoria ti Tribu. Ti teritoria a naituding iti tribu ti Efraim saklawenna ti makintengnga a paset ti Canaan, iti laud ti Jordan. Addaan met ti tribu kadagiti naipasngat a siudad iti teritoria ti Manases. Ti Manases ti kabeddeng ti Efraim iti amianan, ket ti Benjamin ken Dan iti abagatan. (Jos 16:1-9) Nupay kabambantayan ken katurturodan daytoy a rehion, nabaknang ken nadam-eg ti dagana ken napuskol ti kakaykaywanna idi kadaanan a tiempo. (Jos 17:15, 17, 18) Nagserbi ni panguluen Quemuel kas dinutokan ti Dios a pannakabagi ti Efraim idi nabingbingay ti Naikari a Daga kas binglay a tawid.—Nu 34:18, 24.
Ti tabernakulo ket naisaad idiay Silo, nga adda iti Efraim. (Jos 18:1) Malaksid iti Siquem, a maysa a siudad a pagkamangan, adu a sabsabali pay a siudad dagiti Levita ti masarakan met iti teritoria ti Efraim. (Jos 21:20-22; 1Cr 6:66-69) Dagiti Efraimita saanda a pinagtalaw dagiti Canaanita manipud Gezer a maysa kadagiti siudad dagiti Levita, no di ket pinagbalinda ida nga adipen maipaay iti pinuersa a panagtrabaho.—Jos 16:10; Uk 1:29.
Ti Efraim Manipud ken Josue Agingga ken David. Iti teritoria ti Efraim ti nakaaramidan iti adu a naisangsangayan a pasamak. Idiay Siquem ti nangummongan ti Efraimita a ni Josue a suno ni Moises, kadagiti tribu ti Israel ket kiniddawna kadakuada nga agserbida a simamatalek ken Jehova. (Jos 24:1, 14, 15) Kasta met, ditoy Siquem ti nakaitabonan dagiti tulang ni Jose idi agangay, ket agpadpada a naitabon ni Josue ken ti anak ni Aaron a ni Eleazar iti kabambantayan a rehion ti Efraim. (Jos 24:29-33) Idi agangay, ni Ukom Ehud a Benjamita inummongna dagiti Israelita iti kabambantayan a rehion ti Efraim tapno makirupakda kadagiti Moabita. (Uk 3:26-30) Kalpasan ti ipapatay ni Ehud, ni mammadto Debora nga agnanaed idi iti kabambantayan a rehion ti Efraim, pinaayabanna ni Barak kas intuding ni Jehova a mangispal iti Israel manipud panangirurumen ni Ari Jabin. Iti kinanta da Barak ken Debora a kanta ti panagballigi, Efraim ti immuna a tribu a nadakamat. (Uk 4:1-7; 5:14) Iti naud-udi a tiempo, ni Tola iti tribu ti Isacar nagserbi kas ukom iti Israel iti 23 a tawen bayat ti panagnaedna idiay Samir iti kabambantayan a rehion ti Efraim. (Uk 10:1, 2) Ni mammadto Samuel iti tribu ni Levi ket nayanak idiay Rama iti kabambantayan a rehion ti Efraim, ket impasdekna sadiay ti pagtaenganna idi nataenganen.—1Sm 1:1, 2, 19, 20; 7:15-17.
Ti kinapannakkel dagiti Efraimita ken ti aglablabes a panagtarigagayda iti kinatan-ok ti makagapu a narigatanda unay a makilangen iti dadduma a tribu. Idi pay laeng tiempo ti uk-ukom, madlawen ti kastoy nga ugalida. Kas pagarigan, pinadas dagiti Efraimita ti makiriri ken Gideon gapu ta saanna nga inayaban ida iti daydi pannakirupakna iti Midian. Nupay kasta, naliklikan ti panagraranget gapu iti kinataktika ni Gideon iti dayta a gundaway. (Uk 8:1-3) Idi agangay, nupay saan a pinatgan dagiti Efraimita ti damo a panagpatulong ni Jefte, nasair ti riknada idi saannan nga inayaban ida a makirupak kadagiti Ammonita. Nakigubatda ken Jefte ket naglak-amda iti nakababain a pannakaabak; rinibu ti napapatay kadagiti pagballasiwan ti Jordan, ta sadiay nailasin nga Efraimitada gapu ta ti pagilasinan a sao a “Shibboleth” ket imbalikasda a “Sibboleth.” —Uk 12:1-6; kitaenyo met ti 2Cr 25:10.
Kalpasan ti ipapatay ni Ari Saul, adda 20,800 a lallaki ti Efraim a karaman kadagiti immay idiay Hebron a mangyawat ti kinaari ken David.—1Cr 12:23, 30.
Kangrunaan a Tribu iti Makin-amianan a Pagarian. Kas kalatakan ken kaimpluensiaan a tribu iti nagbalin a makin-amianan a pagarian, dakesen ti pakasarsaritaan ti Efraim nanipud idi nabingayen ti pagarian kabayatan ti panagturay ni Rehoboam. (Os 13:1) Ti immuna nga ari a ni Jeroboam a maysa nga Efraimita ket nangipasdek iti panagdayaw iti kigaw a baka idiay Dan ken Bethel. (1Ar 11:26; 12:25-30) Saandan a pulos nakalung-aw iti daytoy a pannakairarem iti idolatria.
Kas kangrunaan a tribu iti makin-amianan a pagarian, ti Efraim inrepresentarna ti intero a sangapulo-tribu a pagarian. (2Cr 25:7; Jer 7:15) Gapuna, iti Efraim ti nangiturongan da mammadto Oseas ken Isaias dagiti nakaro a panangkondenarda. Kinondenar ni Oseas ti Efraim gapu iti pannakikadkaduana kadagiti nasion, panangsursurona kadagiti aramidda, ken panagserbina kadagiti idoloda. Impadisna ti Efraim iti nagbukel a tinapay a saan a naibalikid, naluto wenno nakset pay ketdi ti makimbaba a pasetna ngem saan a naluto ti makinngato. (Os 7:8; idiligyo ti Sal 106:35, 36; Os 4:17; 12:14.) Nupay dagiti ganggannaet ti nangibus iti bileg ti Efraim, nagpatulong pay laeng iti Egipto ken nakitulag iti Asiria imbes nga agsubli ken Jehova. Isu a ti Efraim ket kas iti maysa nga ampapaok a kalapati a saanna a maliklikan ti pannakasilona iti iket.—Os 7:9-12; 8:9; idiligyo ti 2Ar 17:4; Os 12:1.
Ni mammadto Isaias nagsao a mismo maipapan kadagiti ‘napannakkel a managbarbartek iti Efraim.’ Ti isisinada manipud pagarian ti Juda ken dagiti pannakialiansada iti Siria ken dadduma pay a nasion ket dakkel ti epektona kadakuada kas iti makabartek nga inumen. Nupay kasta, dumtengto kadakuada ti didigra.—Isa 7:1, 2, 5-9, 17; 9:9-12; 17:3; 28:1-3.
Nupay kasta, impadto met dagiti mammadto ni Jehova nga agpatingganto ti panagimon ken panagbinnusor ti Efraim (ti sangapulo-tribu a pagarian) ken ti Juda (ti dua-tribu a pagarian). (Isa 11:13; Jer 31:6) Agkaykaysanto ti Juda ken Efraim, ket maisublinto ti Efraim iti anamong ti Dios.—Jer 31:18-20; 50:19; Eze 37:16-19; Zac 10:7.
Nupay nakaaramid iti dakes a pakasarsaritaan ti tribu ti Efraim, adda dagiti indibidual iti dayta a tribu a nangsurot iti nalinteg a dana. Kas pagarigan, bayat ti panagturay ni Ari Asa ti Juda, dimmasig kenkuana ti adu nga Efraimita idi nakitada nga adda kenkuana ni Jehova. (2Cr 15:9) Idi agangay, adda met dagiti Efraimita idiay Jerusalem a timmabuno iti pannakarambak ti Paskua idi umuna a tawen ti panagturay ni Ezekias ket kalpasanna nakiramanda iti panangdadael kadagiti nabatbati a ramit ti idolatria. (2Cr 30:18; 31:1) Nupay kasta, ti adu a tattao iti Efraim, Manases, ken Zabulon ket rinabrabak ken inuy-uyawda dagiti tumataray ni Ezekias imbaonna ida a mangawis kadagiti Israelita manipud amianan nga umayda iti Paskua. Kinapannakkel ti nanglapped kadagitoy a mangipakumbaba iti bagbagida ken mapan iti Jerusalem maipaay iti Paskua.—2Cr 30:10, 11.
3. Ti siudad a kadawyan a maibilbilang nga isu met laeng ti Efrain a kinautibo ni Abias nga ari ti Juda manipud ken Jeroboam nga ari ti Israel. (2Cr 13:19) Idi umuna a siglo K.P., napan ni Jesu-Kristo idiay Efraim iti pagilian nga asideg iti let-ang a kaduana dagiti adalanna, idi nagnunumuan dagiti panguluen ti relihion ti panangpapatayda kenkuana. (Jn 11:53, 54) Ti kadawyan a maikunkuna a disso nga ayan daytoy a siudad isu ti purok ti et-Taiyiba, agarup 6 km (3.5 mi) iti daya nga amianan-a-daya ti Bethel ken 3 km (2 mi) iti daya nga abagatan-a-daya ti naikuna nga ayan ti Baal-hasor. (2Sm 13:23) Sigun iti Judio a historiador a ni Josephus, ti Efraim ket pinarmek ti Romano a heneral a ni Vespasian bayat ti panagmartsana maibusor iti Jerusalem.—The Jewish War, IV, 551 (ix, 9).
4. Ti “bakir ti Efraim” ket maysa a lugar iti makindaya a deppaar ti Jordan a sadiay a nakidangadang ti buyot ni Ari David iti rebelioso nga anakna a ni Absalom. (2Sm 18:6-8) Saan nga ammo ti aktual nga ayan ti bakir ti Efraim iti daga ti Galaad, ngem nalabit nga adda laeng iti Mahanaim.—2Sm 17:22, 24, 26.