SETRO

Baton wenno sarukod nga ig-iggaman ti maysa nga agturay kas simbolo ti naarian nga autoridad. No dadduma ti “setro” maar-aramat iti piguratibo a kaipapanan a mangirepresentar iti ar-ari (Eze 19:10, 11, 14) wenno autoridad (Zac 10:11), nangnangruna iti naarian nga autoridad.

Iti kadaanan a Persia, ti asinoman a dumatag iti sanguanan ti ari idinto ta saan a naawis ket mapapatay, malaksid no iyunnat ti monarka nga iturong kenkuana ti nabalitokan a setro.​—Est 4:11; 5:2; 8:4.

Ti naimpadtuan a sasao ni Jacob a ‘ti setro saan a sumina ken Juda’ impatuldona a ti kinaari tagikuaen ti tribu ni Juda ket nagtalinaed a kasta agingga nga immay ti Silo. (Ge 49:10; kitaenyo ti SARUKOD TI KOMANDANTE.) Sinigsiglo kalpasanna, dagiti taga Babilonia a nagakem kas mangpapatay a “kampilan” ni Jehova dinadaelda ti pagarian ti Juda ket kinautiboda ti arina. Imparipirip daytoy ti sasao ni Jehova babaen ken Ezequiel: “Maysa a kampilan, maysa a kampilan! Napatademen, ken kasta met a napasileng. . . . Laklaksidenna kadi ti setro ti bukodko nga anak, kas iti aramidenna iti tunggal kayo? . . . Ta naaramiden ti panangsukimat, ket ania ngarud dayta no laklaksidenna met ti setro?” (Eze 21:9, 10, 13) Gapuna ti “kampilan” trinatona ti “setro” ni Juda iti Davidiko a dinastia a kas iti tunggal kayo (a mapukan) wenno kas iti sabsabali pay nga ar-ari wenno pagpagarian a dinadaelna.

Ti Salmo 2, maysa a padto nga inaramat ni Pedro a tumukoy ken Jesu-Kristo (Ara 4:25-27), impakitana a daydiay pinulotan ni Jehova agaramat iti setro a landok a pangburakburakna kadagiti nasion. (Sal 2:2, 6, 9; idiligyo ti Apo 12:5; 19:15.) Yantangay kanayon nga umiso ti panangaramat ni Jesu-Kristo iti naarian nga autoridadna, ti setrona ket setro ti kinapalungdo.​—Sal 45:6, 7; Heb 1:8, 9.

Kunaen ti Salmo 125:3 a “ti setro ti kinadangkes saanto nga agtultuloy nga agsaad iti bingay dagidiay nalinteg.” Ipasigurado dagitoy a sasao a ti nalinteg saanto a kanayon nga irurumen dagidiay mangar-aramat iti autoridadda iti nadangkes a pamay-an.