ATAD

[Siitsiitan].

Naawagan iti “pagirikan ti Atad” ti maysa a lugar a di masigurado ti ayanna idiay rehion ti Jordan. Bayat ti panagdaliasatda manipud Egipto nga agturong iti rukib ti talon ti Macpela idiay Canaan, nagsardeng sadiay ti pannagna dagiti mapan mangitabon ken Jacob, maipaay iti pito nga aldaw a panagleddaang. Ti Atad ket mabalin a maysa a tao, ngem agparang a ti nagan a mismo ket awag iti maysa a lugar. Karaman kadagiti nakipamumpon dagiti adipen ni Faraon kasta met dagiti lallakay ti Egipto, ket idi nakita dagiti Canaanita dagiti seremonia ti panagleddaang, inyebkasda: “Nakaro daytoy a panagleddaang kadagiti Egipcio!” Gapuna, ti lugar naawagan Abel-mizraim, a kaipapananna ti ‘Panagleddaang dagiti Egipcio.’​—Ge 50:7-13.

“Labes ti Jordan” ti inaramat ti nadumaduma a patarus (kas pagarigan, ti AS, AT, RS) iti Genesis 50:10, 11, ket ipapan ti dadduma a ti pagirikan ti Atad adda iti daya ti Karayan Jordan. Kaipapanan daytoy a saan a nagdiretso ti ruta ti pamumpon no di ket naglikaw iti likmut ti Natay a Baybay, nalabit tapno saanda a masabet dagiti Filisteo. Nupay kasta, ti Hebreo a sao a beʽeʹver a naipatarus a “labes” ket mabalin a tumukoy iti maysa a rehion iti daya wenno laud ti Jordan. Manipud iti disso nga ayan ni Moises iti daga ti Moab idi tiempo ti pannakaileppas ti Pentateuko, ti “labes ti Jordan” mabalin a kayatna a sawen ti laud ti karayan. Nupay kasta, amin a di umiso a pannakatarus ket narisut ti Baro a Lubong a Patarus, ta siuumiso nga impatarusna ti Hebreo a teksto kadagitoy a bersikulo kas “adda iti rehion ti Jordan.”