Panagbiag a Napaut ti Kinatalged
NO AGGURIGORKA, nalabit agtomarka iti tableta a pangep-ep iti sakit ti ulo ken nalabit agusarka iti ice bag a mangpababa ti gurigormo. Ngem uray no ep-epen ti tableta ken ti ice bag dagiti sintoma, saanda nga agasan ti pakaigapuan ti gurigormo. Ket no nakaro ti sakitmo, masapul nga agpaagaska iti nalaing a doktor.
Agsagsagaba ti sangatauan iti nabayagen a gurigor a kinaawan talged. Siuumiso a mangaramidtayo kadagiti apagbiit nga addang a mangep-ep kadagiti di makaay-ayo a sintoma, ngem ti agas ket mabalin a maipaay laeng ti maysa a makarekonoser a naimbag iti kasasaadtayo. Ket awan ti nasaysayaat ti pannakaammona iti sangatauan no di ti Namarsua kadatayo, ni Jehova a Dios. Ammona nga awan ti kinatalged ti biag gapu kadagiti parikut a mangap-apektar kadatayo.
Napukaw a Naan-anay ti Natalged a Nangrugian
Ilawlawag ti Sao ti Dios a pinarsua ni Jehova a perpekto ti immuna a natauan a pagassawaan ket inkabilna ida iti natalged nga aglawlaw. Awan ti pakadandanaganda. Panggep ti Dios a ti tao agbiag nga agnanayon iti paraiso, nga addaan iti naan-anay a kinatalged. Ti immuna a kasasaad ti sangatauan iramanna ti “amin a kayo a nakaay-ayo a makita ken naimbag a kanen.” Paliiwem a naaywanan ti pisikal a kasapulanda; kasta met ti emosional a kasapulanda, tangay nadeskribir ti aglawlaw a kas “nakaay-ayo a makita.” Awan duadua a daytoy kaipapananna a naikabil ti immuna a pagassawaan iti aglawlaw a nangipanamnama kadakuada iti natalged, awanan-parikut a panagbiag.—Genesis 2:9.
Linaksid da Adan ken Eva ti naayat a panangituray ti soberania ti Dios, iti kasta nangrugi a nariknada ti panagduadua, panagbuteng, panagbain, pannakabasol, ken kinaawan talged iti panagbiagda. Kalpasan a linaksid ni Adan ti Dios, inaminna a ‘mabuteng.’ Inabbongan dagiti immuna a tao ti bagbagida ken linemmenganda ti naayat a Namarsua kadakuada, a nakasagrapanda idi iti nasinged ken makagunggona a relasion.—Genesis 3:1-5, 8-10.
Saan a nagbalbaliw ti orihinal a panggep ni Jehova. Kunaen ti Biblia a naayat a Dios ti Namarsua kadatayo, a mangipaayto iti gundaway kadagiti natulnog a sangatauan a mangisubli iti daga iti naparaisuan a kasasaad ken agbiag a sitatalged iti agnanayon. Babaen ken mammadto Isaias naited ti kari: “Mamarsuaak kadagiti baro a langlangit ken baro a daga; . . . agragsakkayo ken agrag-okayo iti agnanayon.” (Isaias 65:17, 18) Kadagitoy a baro a langlangit ken baro a daga, kuna ni apostol Pedro: “Kadagitoy nga agtaeng ti kinalinteg.”—2 Pedro 3:13.
Kasanonto a maibanag daytoy? Babaen ti maysa a gobierno nga impasdek ni Jehova. Daytoy ti Pagarian nga imbaga ni Jesu-Kristo kadagiti pasurotna nga ikararagda: “Amami nga adda iti langlangit, masantipikar koma ti naganmo. Umay koma ti pagariam. Maaramid koma ti pagayatam, kas sadi langit, kasta met iti rabaw ti daga.”—Mateo 6:9, 10.
Ti Pagarian ti Dios sukatannanto dagiti gobierno ti tao ken siaayat nga ibanagnanto ti panggep ti Dios iti sangalubongan. (Daniel 2:44) Mapukawton ti panagduadua, panagbuteng, panagbain, pannakabasol, ken kinaawan talged a mangsapsaplit iti sangatauan nanipud idi kaaldawan ni Adan. Sigun iti Biblia, asidegen dayta a Pagarian. Uray ita, iti saan a mapangnamnamaan a lubong, adda kinatalged a magun-odan dagidiay mangsegsegga iti Pagarian ti Dios.
Ipangpangrunayo Dagiti Naespirituan a Banag
Ni David ket maysa nga adipen ti Dios a makaammo no ania ti kaipapanan ti panagbuteng ken ti panagdukot. Ngem nagsurat ni David, kas nailanad iti Salmo 4:8: “Sitatalnaak nga agpadpada iti panagiddakto ken iti pannaturogko: ta sika, Jehova, siksika laeng ti mangisaad kaniak iti kinatalged.” Imparikna ni Jehova ken David ti kinatalged, nupay no dadduma, aduan idi ni David kadagiti parikut. Adda aya masursurotayo iti daytoy? Kasano a magun-odantayo ti kinatalged uray pay iti di natalged a lubong?
Amirisem ti salaysay ti Genesis maipapan kada Adan ken Eva. Kaano a napukawda ti pannakarikna iti kinatalged? Idi kanito a linaksidda ti personal a relasionda iti Namarsua ken nagkedkedda nga agbiag a maitunos iti panggepna para iti sangatauan. Gapuna, no baliktadentayo daytoy a proseso babaen ti kaadda ti nasinged a personal a relasion ken Jehova ken padasentay ti agbiag a maitunos iti pagayatanna, uray itatta, masagraptayo ti nataltalged nga amang a biag ngem ti magun-odan iti sabali a pamay-an.
Ti panangammo ken Jehova babaen iti panagadal iti Biblia tulongannatayo a mangtarus iti kaipapanan ti biag. Babaen laeng iti dayta a maawatantayo no siasinotayo ken no apay nga addatayo ditoy. Posible ti natalged a biag no ayatentayo ti Dios, ammuentayo ti panggepna para iti sangatauan, ken tarusantayo no sadino ti pakaibagayantayo. Natakuatan dayta ti maysa a lalaki nga agnagan Paul adu a tawenen ti napalabas.
Naipasngay ken dimmakkel ni Paul iti maysa kadagiti puro nga asideg iti Alemania. Gapu iti napasaran dagiti nagannak kenkuana idi Gubat Sangalubongan II, saan nga interesado ti pamiliana iti relihion. Kuna ni Paul maipapan iti bagina kas agtutubo: “Awan ti patpatiek ken awan ti raraemek. Nairuamak a manglipat kadagiti parikutko babaen iti arak, agbartekak iti mamindua wenno mamitlo iti makalawas. Saan a natalged ti biagko.”
Kalpasanna, nakasarita ni Paul ti maysa kadagiti Saksi ni Jehova. Kasta unay ti pannakisupiat ni Paul, ngem nagpampanunotanna ti maysa a banag nga imbaga ti Saksi kenkuana. “Awan ti agtaud iti awan.” Iti sabali a pannao, adda la ketdi ti Namarsua iti amin a parsua a makitatayo iti aglikmuttayo.
“Sangkapanunotko dayta, ket masapul nga umanamongak.” Isu a nakipagadal ni Paul iti Biblia kadagiti Saksi ni Jehova ket naam-ammona ni Jehova. Inaminna: “Malaksid kadagiti dadakkelko, ni Jehova ti umuna a persona iti biagko nga adda naaramidna kaniak.” Nabautisaran ni Paul kas maysa a Saksi idi 1977 ket kunana: “Ita ammokon no ania ti pudno a panggep ti biag. Maragragsakanak nga agbiag a maitunos iti pagayatan ni Jehova. Mariknak a natalgedak, tangay awan ti mapasamak kaniak wenno iti pamiliak a saan a mailinteg ni Jehova iti masakbayan.”
Ania ti masursurotayo iti daytoy a kapadasan? Pinarmek ni Paul ti kinaawan talged—ti pakadandanagan—babaen ti panangipamaysana kadagiti naespirituan a banag imbes a kadagiti material a banag. Pinatanorna ti nabileg a relasionna iti Namarsua. Minilion a Saksi ni Jehova ti mangtagtagiragsak iti kasta a relasion. Daytoy ti mangted kadakuada iti makin-uneg a bileg a tumulong kadakuada nga agbalin a managsakripisio iti pannakilangenda kadagiti sabsabali. Iti panangsarungkar kadagiti tattao iti pagtaenganda, usaren dagiti Saksi ni Jehova ti tiempoda a tumulong iti sabsabali a tattao a mamagbalin a nataltalged ti panagbiagda babaen ti panangipamaysa kadagiti naespirituan a banag. Ngem saan laeng a mangasaba dagiti Saksi.
“Umawagka ken Jehova a Diosmo”
Idi Hulio 1997, idi linayus ti Karayan Oder ti nalalawa a lugar iti makin-amianan a Europa, nangngeg dagiti Saksi ni Jehova idiay Alemania ti kasasaad dagiti tattao iti kaarrubada a Poland. Ania ti aramidenda? Nangipakita ti tunggal maysa a Saksi iti Berlin ken iti aglawlawna iti nagsayaat a kinamanagparabur babaen ti boluntario a panangidonarda iti nasurok a $116,000 iti las-ud ti sumagmamano nga aldaw.
Dagiti Saksi nga aduan kapadasan iti trabaho a panagibangon ket nagbiahe iti innem nga oras iti kalsada—a bukodda ti gastos—manipud Berlin agingga iti rehion iti aglikmut ti Wrocław, Poland. Iti maysa a bassit nga ili, nakaro ti pannakadadael ti adu a balbalay. Nalayus ti balay ti maysa a pamilia a Saksi iti nasurok a 6 a metro a danum. Plano idi ti balasang ti pamilia ti kumasar iti sumaganad a bulan ken agnaed dita a balay a kadua ti asawana. Ania ti naaramid tapno matarimaan ti pagtaengan ken matulongan ti pamilia, a nakapukaw iti dandani isuamin?
Apaman nga immes-esen ti layus, nagsaludsod ti maysa a kaarruba buyogen ti pananglais: “Apay a dika umawag ken Jehova a Diosmo, ket kitaem no matulongannaka?” Anian ti siddaaw ti kaarruba idi adu a lugan manipud Alemania ti napan iti pagtaengan ti pamilia a Saksi kabigatanna! Dimsaag kadagiti lugan ti maysa a grupo dagiti ganggannaet ket rinugianda a tinarimaan ti balay. “Siasino dagitoy? Siasino ti agbayad kadagiti materiales?” sinaludsod ti kaarruba. Inlawlawag ti pamilia a Saksi a dagitoy dagiti naespirituan a kakabsatda ket dagitoy a bisita ti agbayad kadagiti materiales. Nagpaliiw dagiti umili buyogen iti panagsiddaaw bayat a mapabpabaro ti balay. Iti kasta, naaramid ti kasar iti naiplano a petsa.
Natakuatan daytoy a pamilia a ti pannakaikameng iti internasional a panagkakabsat dagiti Saksi ni Jehova ket mangyeg saan laeng a kadagiti naespirituan a gunggona no di pay ket ti kinatalged iti di natalged a lubong. Saan nga is-isuda ti nakasagrap iti kastoy. Iti intero a nalayus a lugar, natarimaan dagiti balay ken Kingdom Hall dagiti Saksi ni Jehova. Ket saan met a nalipatan dagiti saan a Saksi a kaarruba. Adu met a panangtarimaan ti naaramid kadagiti balayda, a naapresiar unay.
Kinalinteg, Kinaulimek, ken Kinatalged
No awanen ti nakaro a gurigor ken agsublin ti normal a salun-at, anian a panagyamantayo iti doktor a timmulong kadatayo! Inton mapukawen ti gurigor ti kinaawan talged a nanglapunos iti sangatauan—babaen iti Pagarian ti Dios—anian a panagyamantayto iti Namarsua kadatayo! Wen, isu daydiay mangikarkari kadatayo iti biag a buyogen ti “pudno a kinalinteg, kinaulimek ken kinatalged iti awan inggana.” Anian a nagsayaat a namnama!—Isaias 32:17.
[Blurb iti panid 10]
Mabalin a bang-arantayo ti panagdandanag babaen ti panangipamaysa kadagiti naespirituan a banag imbes a kadagiti material a banag
[Ladawan iti panid 8, 9]
Ikarkari ti Dios ti maysa a baro a lubong a sadiay agbiagto ti amin iti napaut a kinatalged