MUKOD
Ti makinlikud a paset ti saka iti baba ti palaypalay. Daytoy a kameng ti bagi ti tao ket masansan a natukoy iti Biblia iti piguratibo a pamay-an. Ti panangiggem wenno panangdangran iti mukod ti maysa a tao ket panangigawid, wenno pananglapped kenkuana. Ginammatan ni Jacob ti mukod ti kasinginna a ni Esau bayat ti iruruarda iti aanakan ni inada. (Ge 25:26) Maigapu itoy, isu ket napanaganan iti Jacob, a kaipapananna “Daydiay Manggamgammat iti Mukod; Mananggamsaw,” nga addaan naimpadtuan a kaipapanan. (Ge 27:36; Os 12:2, 3) Idi bendisionan ni Jacob, a maysa nga ulo ti pamilia, ti maikalima nga anakna a ni Dan, nagsayaat nga impadtona maipapan ken Dan, nga agbalinto a kasla serpiente nga agpadpadaan iti igid ti dalan ken mangkagat kadagiti mukod ti kabalio, a mangitinnag iti nakasakay iti dayta. (Ge 49:17; kitaenyo ti KARASAEN, NAGSARA A.) Ti tribu ni Dan ket “pannakamukod” kas guardia iti likudan ti Israel bayat ti panagdaliasatda idiay let-ang, tapno mangdangran kadagiti kabusor ti Israel.—Nu 10:25.
Iti padto, ti di matalek a Jerusalem ket nayarig iti maysa a dakes ti pakasarsaritaanna a babai, a madusa babaen ti ‘sidadawel a pannakatrato’ dagiti mukodna, kayatna a sawen, pilitenda a papagnaen iti lasonglasong, a nakasaksakit kadagiti mukodna; napasamak daytoy idi a ti Jerusalem ket naidestiero idiay Babilonia idi 607 K.K.P.—Jer 13:22.
Nagsao ni Ari David maipapan iti traidor a kaduana a ni Ahitofel iti piguratibo a pamay-an, a kunkunana: “Inngatona ti mukodna a maibusor kaniak.” (Sal 41:9) Naaddaan daytoy iti naimpadtuan a kaitungpalan ken Judas Iscariote, nga isu ti tinukoy ni Jesus iti teksto, a kunkunana: “Ti agtartaraon idi iti tinapayko inkusayna ti mukodna a maibusor kaniak.” (Jn 13:18) Gapuna, panangliput ti ipasimudaag daytoy a sasao, a dayta ket panangipangta a dangran ti maysa a tao, a ‘pangingatuan’ wenno ‘pangikusayan’ iti mukodna.
Naipakpakauna iti kaunaan a nailanad a padto iti Genesis 3:15 a ti “serpiente” dunorenna ti mukod ti ‘bin-i ti babai.’ Nupay nasakit, ti dunor iti mukod ket saan a manayon ti itdenna a panagsagaba. Ti “bin-i” (Ga 3:16) a ni Jesus ket pinapatay dagiti naindagaan a paspasurot ti dakkel a Serpiente, ni Satanas a Diablo (Apo 12:9), ngem iti maikatlo nga aldaw immimbag ti ‘dunorna iti mukod’ idi pinagungar ni Jehova nga Amana.—Ara 2:22-24; 10:40.