12. Ania ti masursurotayo iti ulidan dagiti kerubin a nagbantay idiay Eden?

¹² Dagiti kerubin. Makasursurotayo iti ulidan ti dadduma a kaunaan nga espiritu a parsua a nagparang kadagiti tattao no kasano ti agibtur no adda narigat nga annongentayo. “Insaad [ni Jehova a Dios] iti daya ti minuyongan ti Eden dagiti kerubin ken ti dumardarang a tadem ti maysa a kampilan nga agtultuloy nga agpuspusipos tapno bantayanda ti dalan nga agturong iti kayo ti biag.”^[2] (Gen. 3:24) Saan a naparsua dagiti kerubin a mangaramid iti dayta nga annongen! Ngamin, saan a karaman iti panggep ni Jehova nga agbasol ken agrebelde ti tao. Nupay nangato ti saad dagiti kerubin kas espiritu a parsua, awan ti mabasatayo a nagreklamoda gapu ta agparang a nanumo unay dayta nga annongen. Saanda a nauma ken simmuko. Imbes ketdi, intultuloyda nga inaramid ti annongenda agingga a nagpatingga ti trabahoda​—nalabit idi tiempo ti Layus, nasurok a 1,600 a tawen kalpasanna!