LAMEC
1. Ti anak ni Matusael ken kaputotan ni Cain. (Ge 4:17, 18) Nagsinnaknib ti panawen ti panagbiagna ken ti panawen ni Adan. Dua ti naggiddan nga assawa ni Lamec, da Ada ken Zilla, ket isu ti kaunaan a poligamista iti rekord ti Biblia. (Ge 4:19) Naaddaan ni Lamec iti dua nga annak babaen ken Ada—ni Jabal, “ti namunganay kadagidiay agnaed kadagiti tolda ken addaan dinguen,” ken ni Jubal, “ti namunganay kadagidiay amin nga agar-aramat iti arpa ken pito.” (Ge 4:20, 21) Babaen ken Zilla, imputotna ni Tubal-Cain, “ti mammanday iti tunggal kita ti rimienta a gambang ken landok,” ken ti maysa nga anak a babai nga agnagan Naama.—Ge 4:22.
Iti daniw a pinutar ni Lamec maipaay iti assawana (Ge 4:23, 24), nayanninaw ti naranggas nga espiritu iti daydi a panawen. Kastoy ti sagudayen ti daniw ni Lamec: “Denggenyo ti timekko, dakayo nga assawa ni Lamec; umimdengkayo iti sasaok: Pinapatayko ti maysa a tao gapu iti panangsugatna kaniak, wen, ti maysa nga agtutubo a lalaki gapu iti panangdanogna kaniak. No mamimpito a maibalesan ni Cain, ngarud ni Lamec mamimpitopulo ken pito.” Nalawag nga idatdatag ni Lamec ti maysa a kaso a panangidepensana iti bagina, nga imbagana a di inggagara ti naaramidanna a panangpatay, saan a kas ken Cain. Kinuna ni Lamec a gapu iti panangidepensana iti bagina, napapatayna ti tao a nangkabil ken nangsugat kenkuana. No kasta, ti daniwna ket panagpakaasi a saan koma a dangran ti asinoman nga agtarigagay a mangbales kenkuana iti pannakapapatayna iti nangdarup kenkuana.
Agparang nga awan kaputotan ni Cain, agraman dagiti putot ni Lamec, ti nakalasat idi Layus.
2. Maysa a kaputotan ni Set; anak ni Matusalem ken ama ni Noe. (Ge 5:25, 28, 29; 1Cr 1:1-4) Nagsinnaknib met dagiti panawen ti panagbiag daytoy a Lamec ken ni Adan. Adda pammati ni Lamec iti Dios, ket kalpasan a pinanagananna ti anakna iti Noe (nalabit kaipapananna ti “Inana; Liwliwa”), inyebkasna dagiti sasao a: “Daytoy ket mangyegto kadatayo iti liwliwa manipud iti aramidtayo ken manipud iti rigat dagiti imatayo nga ibunga ti daga nga inlunod ni Jehova.” (Ge 5:29) Natungpal dagitoy a sasao idi naikkat ti lunod iti daga bayat ti panagbiag ni Noe. (Ge 8:21) Adda pay dadduma a lallaki ken babbai nga annak ni Lamec. Nagbiag iti 777 a tawen, a natay agarup lima a tawen sakbay ti Layus. (Ge 5:30, 31) Nailanad ti naganna iti listaan ti kapuonan ni Jesu-Kristo idiay Lucas 3:36.