Al-aldaw kas “kadagiti Aldaw ni Noe”

“Ket napno ti daga ti kinaranggas . . . adtoy ti dakes, ta amin a lasag pinadakesda ti dalanda iti rabaw ti daga.”​—GENESIS 6:11, 12.

1, 2. (a) Kadagiti ania a kita ti kinaranggas ti pakidangadangan dagiti Saksi ni Jehova itatta? (b) Kadagiti ania a kasasaad a maliwliwa ti ili ti Dios babaen iti namnama ti panagungar?

KINARANGGAS! Kas idi aldaw ni Noe, kasta met itatta, ti kinaranggas nagbalinen a gagangay a pagsasao iti sangakabbalayan. Uray pay dagidiay makipagpagna iti pudno a Dios, kas ken ni Noe, ket saanda a mailaklaksid iti kinaranggas. Daytoy ti naiyawag a sipipigsa iti atension ti lubong idi, idi Hulio 21 idi napan a tawen, maysa a Kingdom Hall dagiti Saksi ni Jehova idiay Sydney, Australia, ti dinadadael ti maysa a bomba kabayatan ti maysa a palawag publiko iti Biblia maipapan ti kinasungdo iti Dios ken ti pamilia. Maysa a Saksi ti natay. Nasurok a 40 ti naospital. Amin dagitoy nakaungardan, numan pay dadduma ti addaan kadagiti dadakkel a piglat kas resulta daytoy a kriminal a kinadamsak. Nagkomento ti maysa a tiktik ti polisia: “Addada 110 a tattao idiay uneg ket maysa laeng a milagro a saan met a 110 dagiti natay.”

² Iti dadduma a paspaset ti daga​—kas idiay Umamianan nga Ireland, Lebanon, ken El Salvador​—iwarwaragawag dagiti Saksi ni Jehova ti “naimbag a damag” iti agtultuloy a kasasaad ti kinaranggas. Addada sumagmamano a napappapatayen, bayat a dadduma ti makipaspaset iti ministerio. Kadagiti adu a dagdaga dagiti “di napakpakadaan a pasamak,” kas kadagiti aksidente ti luglugan, ti nangkettel met kadagiti napapateg a biag, a kadagita nga okasion ti ili ni Jehova naliwliwada babaen iti namnama iti panagungar.​—Eclesiastes 9:11; 1 Tesalonica 4:13, 14.

3. (a) Aniat’ mapasamak iti dadduma iti ili ni Jehova, kas ipamatmat ti nabiit pay a paspasamak ken ti Lucas 21:16? (b) Aniat’ adda a pammasiguro kadatayo a pannalaknib ti Dios inton “dakkel a rigat”?

³ Idiay Mexico iti nabiit pay, 23 amin dagiti Saksi ken gagayyemda ti nairaman kadagiti nasurok a 5,000 a natay gapu iti makapapatay a ginggined. Idiay Puerto Rico, pito a dadduma pay ti naibilang kadagiti 300 a nakapukaw ti biagda iti laylayus ken panagtebbag ti bantay. Kaipapanan kadi daytoy a di nasalakniban ni Jehova ti dadduma kadagiti ad-adipenna? Nikaanoman. Saantayo a libre kadagiti disgrasia ken didigra. Ket no maipapan kadagiti pannakaidadanes, pinakpakaunaan ni Jesus dagiti adalanna, a kunkunana: “Addanto papatayenda kadakayo.” Ginasut kadagiti kakabsattayo ti natnatay kadagiti naranggas nga im-ima ni Nazi a Hitler. Laglagipento amin ni Jehova dagita iti panagungar. Nupay kasta, inton ti naipadto a “dakkel a rigat” saknapanna ti daga, ipakitanto ni Jehova a maispalna dagidiay umawag iti naganna, kas ti inaramidna idi kaaldawan ni Noe.​—Lucas 21:16-19; Mateo 24:14, 21, 22, 37-39; Isaias 26:20, 21; Joel 2:32; Roma 10:13.

4. Kasanot’ pannakaidilig dagiti agdama a kasasaad kadagidiay naisalaysay idiay Genesis 6:11, 12?

⁴ Nanipud pay 1914 ti kinaranggas ti nanglapunosen iti intero a globo. Sangagasut a milion a tattao ti napappapatayen kadagiti gubgubat ken gulo iti daytoy a siglo. Ti sangatauan nasapliten kadagiti high-jacking iti tangatang ken iti baybay, dagiti panangbomba ti terorista, ti reprep a panangpapatay, dagiti gurang-gura kadagiti nagduduma a rasa ti agpegpeggad babaen iti panagadu dagiti nuklear nga armas. Pudno unay a dagitoyen dagiti “panawen a napeggad” a dagiti nasion “agdanagda, a dida ammo ti ruaranda.” (2 Timoteo 3:1-5, 13; Lucas 21:25) Nupay kasta, agbibiag itatta ti ili ni Jehova iti tengnga ti maysa a saplit a mangidatag iti dakdakkel unay a peggad ngem ti kinaranggas, numan pay daytat’ masansan a mainaig iti kinaranggas. Dayta ket agsubli iti nasurok a 4,300 a tawtawen idi kaaldawan ni Noe. Ania dayta?

Ti Pammati ni Noe iti Tengnga ti Kinadakes

5, 6. (a) Kasanot’ panangituloy ni Satanas iti panangmulitna iti sangatauan? (b) Kadagiti ania a pamay-an a ni Noe ken ti pamiliana nagtakderda kas saan a paset dayta a lubong?

⁵ Manipud iti iyaalsa idiay Eden nga agtultuloy, nagpagungganen ni Satanas a Diablo a “mangal-allilaw iti intero a mapagnaedan a daga.” (Apocalipsis 12:9) Imbilin ni Jehova iti lalaki ken babai nga usarenda a sidadayaw ti inted-Dios a seksual a pannakabalinda iti uneg ti urnos ti panagassawa, tapno “punuenda ti daga” iti kakikitada. (Genesis 1:28; Hebreo 13:4) Ngem minulitan ti Diablo ti sangatauan iti di gagangay a sekso. Kasano? Dagiti espiritu nga annak ti Dios ti kimmappon ken Satanas iti iyaalsa. Dagitoy ti nagbalin a “demonio,” a ni Satanas ti “agturayda.” (Lucas 11:15) Ket ania idi ti mangbukel iti ar-aramid dagiti demonio? Bimmabada ditoy daga, ket naglasagda, ket nakikabbalayda kadagiti napipintas nga annak a babbai dagiti tattao. Ti imbungana ti nakaam-amak!

⁶ Ngarud napataud dagiti mistiso nga annak, dagiti nainlasagan a higante a kagudua a demonio, kagudua a tao. Dagitoy idi dagiti Nefilim, dagiti manangpapatay a “Manangituang” iti sangatauan, kas ipakita dagiti rekord: “Ket nadadael ti daga iti imatang ti pudno a Dios ket ti daga napno ti kinaranggas. Gapuna nakita ti Dios ti daga ket, adtoy! dayta ti nadadael, agsipud ta amin a lasag dinadaelda dagiti ar-aramida iti daga.” Nagsaknap unay ti kinaranggas ken seksual a kinadakes ta ken Noe laeng a mabalin a maikuna: “Pinaneknekanna ti bagina a nadalus iti kaputotanna. Ni Noe nakipagna iti pudno a Dios.” Ti asawana, dagiti annakna a lallaki, ken dagiti assawada​—isuda laeng iti intero a sangatauan​—ti nangipakita iti pammati ken nadiosan a panagbuteng. Nalawag, ti pamilia ni Noe saan a namulitan iti seksual a kinadakes idi kaaldawanna.​—Genesis 6:4, 9-12, Ref. Bi. footnote.

7. Kas naidemonstra idi aldaw ni Noe, kasanot’ panangukom ni Jehova iti dakes ken ti nalinteg? (Idiligyo iti Mateo 25:40, 45, 46.)

⁷ Dinadael ni Jehova dayta naranggas, agmauyong iti sekso, nademonioan a lubong. Babaen ti panangiyegna iti dakkel a Layus, inyanodna ti isuamin a dakes. Dagiti mistiso a Nefilim ken ti narugitan a sangatauan naiyayusda amin iti pannakalipat, bayat a dagiti nademonioan a dati nga annak ti Dios nagtalawda a nagsubli iti lugar dagiti espiritu​—tapno urayenda ti panangdusa ti Dios kadakuada. Ngem addada met nakalasat! Ni Noe ken ti pamiliana naispalda. Ket apay? Gapu iti pammatida, a pinaneknekan iti ar-aramidda iti panangibangonda iti daong ken iti panangikaskasaba iti kinalinteg iti dayta nakondenar a lubong.​—2 Pedro 2:4, 5.

Dakay a Moderno, Agannadkayo!

8. Kadagiti ania a bambanag a ti aldaw ni Noe iladawanna ti kaaldawantayo?

⁸ Ti kaaldawan ni Noe inladawanna ti kaaldawantayo. Kasanotay nga ammo daytoy? Bueno, impadto ni Jesus ti umas-asping a panawen ti kinaranggas, kinadakes, ken kinaawan ayat kas paset “ti pagilasinan” nga agngangabittayon iti “dakkel a rigat a nanipud idi punganay ti lubong agingga ita awan pay ti kasta a napasamak, ket awanto metten ti uray kaano.” Kinunana pay, “Ket ti maipapan iti dayta nga aldaw ken oras awan ti makaammo, . . . no di laeng ti Ama.” Kalpasanna innayonna: “Ket kas kadagiti al-aldaw ni Noe, kastanto met ti kaadda ti Anak ti tao. Ta kas kadagiti aldaw a kasanguanan ti layus, addada a mangmangan ken umin-inum, mangas-asawa ken makias-asawa, agingga ti aldaw nga iseserrek ni Noe iti daong; ket dida naawatan agingga ti iyaay ti layus, ket inyayusna ida amin, kastanto ti kaadda toy Anak ti tao.”​—Mateo 24:3-21, 36-39.

9. Kasanotay a maliklikan ti nagtungpalan dagidiay ‘di nakaawat’?

⁹ Wen, “ket dida naawatan.” Ngem di kasapulan nga agbalinkay a kas kadakuada. Mabalinyo ti makapaglisi inton maiparangarang ni Apo Jesus manipud langit, a mangibanag ti ibabales ti Dios babaen ti panangdadaelna iti agnanayonen “kadagidiay saan a mangammo iti Dios ken di agtulnog iti naimbag a damag ni Apotayo a Jesus.” (2 Tesalonica 1:7, 8) Di kasapulan nga agbalinkayo kas kadagiti tattao a ti kangrunaan nga interesda iti biag ket isu ti panangay-ayo iti bagida, a sursurotenda dagiti natatan-ok a karera wenno material a kinabaknang, a di pulos pampanunoten ti Dios. Pudno unay, “ti diosda isu ti tianda.”​—Filipos 3:19.

“Guraenyo ti Dakes”

10, 11. (a) Tapno magun-odan ti anamong ti Dios, ania dagiti bisio a masapul a liklikan? (b) Ania a kabal ti masapul nga isuottayo, ken apay?

¹⁰ Kadagiti maudi nga al-aldaw, ti biag dagiti adu unay a tattao ti agrikrikos iti sekso, nga adda man wenno awanan ti gunggona iti panagasawa. Ket para kadagiti adu kadagidiay naasawaanen, ti diborsio wenno panangwaswas iti panagasawa ti nagbalin a gagangayen. Babaen iti dida panangikankano kadagiti nalawag a pammakdaar dagiti adalan ni Jesus, adu kadagiti adda iti Kakristianuan ti naigamer iti homoseksualidad. Dadduma kadagitoyen “inawatdan kadagiti bagbagida met laeng ti maikari a gunggona” iti langa ti AIDS ken dadduma pay a saksakit a maiyakar babaen iti sekso. Nupay kasta, adda ti namnama ti pannakaisalakan uray pay kadagiti kakasta a tattao. Laglagipenyo, nagsao a paborable ni Jesus maipapan kadagiti balangkantis a nangdalusen kadagiti bagbagida ket namatida kenkuana, a maisupadi kadagiti natangsit, awan panagbabawina a narelihiusuan a papangulo idi kaaldawanna.​—Roma 1:26, 27; 2 Pedro 2:9, 10; Judas 5, 7; Mateo 21:31, 32.

¹¹ Asinoman iti ili ni Jehova a namantsaan, wenno nasulisog a makiraman iti, imoral nga ar-aramid ti masapul nga agriingdan ket isuotda ti naan-anay a kabal nga impaay ti Dios! (Efeso 6:11-18) Pudno unay a dagitoyen dagiti al-aldaw a “kas kadagiti aldaw ni Noe.” Dayta “leon a ngumerngernger,” ti Diablo, ken dagiti nagdakes a demonioda ti awan sardengda a mangiputputong ken mangsilsilo kadagiti ad-adipen ti Dios. Masapul nga agtakdertayo a kontra dagidiay a kabkabusor, a natibker iti pammati.​—1 Pedro 5:8, 9.

12. Apay a nasken ti panangsurot iti balakad iti Salmo 97:10?

¹² Makapakellaat ta, uray pay dadduma a nalalatak iti organisasion ni Jehova ti natnag kadagiti imoral nga ar-aramid, agraman homoseksualidad, panagsisinnukat ti asawa, ken ti panangabuso kadagiti ubbing. Naammuan pay met a, bayat iti napalabas a tawen, 36,638 nga indibidual ti nailaksid manipud kongregasion Kristiano, a ti kadakkelan a bilang kadakuada ti nagaramid ti imoralidad. Masapul a mapagtalinaed a nadalus ti organisasion ni Jehova! (1 Corinto 5:9-13) Panawen itan a maipaay kadagiti panglakayen ti kongregasion, dagiti ministerial nga ad-adipen, ken kinapudnona amin a kakabsat a lallaki ken babbai a liklikan dagiti aniaman a kasasaad a mangiturong iti imoralidad. Ti kinasungdo kadagiti pagalagadan ni Jehova masupapakan, kas kunaen ti Salmo 97:10: “O dakayo nga agay-ayat ken Jehova, guraenyo ti dakes. Isu salaknibanna dagiti kararua dagiti sasantona; isalakanna ida iti ima dagiti nadangkes.”

13. Ania a nasin-aw a pammagbaga ti inted da apostol Pablo ken Pedro?

¹³ Iti kamaudianan, ti “dakkel a rigat” ti mangdalusto kadagiti amin a “makarimon iti kinarugitda.” Anian ti pannakaseknantayo koma a manggura, wen, masimron, ken mangliklik kadagiti nailubongan a kinadakes! Masapul nga “umadayo[tayo] manipud pannakikamalala”! (Apocalipsis 21:8; 1 Corinto 6:9, 10, 18) Ni apostol Pedro, kalpasan ti panangpakdaarna a maibusor kadagiti apostata nga agimulmula iti panagduadua ken maipapan iti kinapudno ti “aldaw ni Jehova,” binagbagaannatayo “iti nasantuan a panagbiag ken ar-aramid ti nadiosan a debosion.” Ket innayonna pay: “Ngem kas maiyannurot iti karina ur-urayentayo dagiti babbaro a langlangit ken ti maysa a daga a baro, isuda a pagtaengan ti kinalinteg. Gapuna, ay-ayaten, yantangay ur-urayenyo dagitoy a banag, agawaanyo tapno masarakankay koma a sitatalna, nga awan ti tulaw ket awan ti pakapilawanyo iti sanguananna.” Ngarud anian a rag-o a magun-odan ti “baro a daga,” a sadiay ti Dios ‘pagbalinennanto a baro amin a bambanag’ ken nadalus!​—2 Pedro 3:3-7, 10-14; Apocalipsis 21:1, 4, 5.

Ipangagyo Pay dagiti Dadduma a ‘Pammakdaar a Pangarigan’

14. Apay a ti panangdalus ti Layus ket temporario laeng?

¹⁴ Kalpasan a dinalusan ti dakkel a Layus ti daga iti amin a nademonioan ken natauan a kinarugit, inulit ni Jehova ti bilin nga immuna a naited ken Adan, babaen ti panagkunana ken Noe ken kadagiti annakna a lallaki: “Agbungakayo ket agadukayo ket punnuenyo ti daga.” (Genesis 9:1) Iti makailadawan a pamay-an inaramidda daytoy, babaen kadagiti 70 a “pampamilia”​—maysa a piguratibo a naan-anay a bilang​—ti nailista idiay Genesis kapitulo 10. Ngem ti sangatauan ti kaskasdi a nagsagaba pay kadagiti epekto ti basol a natawid ken Adan. Ket kaawatan a ti impluensia manen dagiti demonio ti nangiturong kadagiti tattao a mailumlom iti seksual a kinadakes.

15. Aniat’ maadaltayo manipud panangdusa ti Dios iti Sodoma?

¹⁵ Idi agangay, ti “gayyem” ni Jehova, a ni Abraham, ken ni Lot a kaanakan ni Abraham immakarda idiay disso ti Canaan. Pinili ni Lot ti mapan idiay distrito ti Jordan, nga “umasping iti minuyongan ni Jehova.” Ngem kasta kadi dayta maipapan iti moral? Adayo iti dayta! Ti siudad ti Sodoma, a nagnaedan ni Lot, ken iti kabangibangna a Gomorra ket naigamerda unay iti homoseksualidad. Awan pay uray sangapulo a nalinteg a tattao a masarakan sadiay. Gapu iti daytoy a rason, inyeg ni Jehova kadagidiay a siudad “ti dusa ti apuy nga agnanayon.” Nikaanoman dagidiay a nagdakes a siudad saandanton a maisubli! Insitar ni Jesus ti panangdusa ti Dios iti Sodoma, agraman iti napasamak “idi kaaldawan ni Noe,” iti panangipaganetgetna iti pannakasapul ti intay koma panagannad!​—Genesis 13:10; 18:32; Judas 7; Lucas 17:26-30.

16. Ania nga ar-aramid dagiti demonio ti mangikalikagum iti pannakidangadangtayo a sititibker a maipaay iti pammati?

¹⁶ Dikay koma agkamkamali! Ni Satanas ken dagiti demoniona kaskasdi nga agdakdakiwasda! Nupay no naigarangugongdan iti makailadawan nga “abut ti napuskol a kinasipnget” ken nalapdandan iti panangalada kadagiti nainlasagan a bagbagi, dagidiay nagdakes nga espiritu agpagungganda latta a mangrugit iti sangatauan, ken nangnangruna kadagiti ad-adipen ni Jehova. (2 Pedro 2:4-6) Awan duadua dagiti demonio ti nangimpluensia ken Canaan a mangaramid iti imoral nga aramidna ken ni Noe nga apongna. (Genesis 9:22-25) Sigurado nga isuda ti nagimula kadagiti panangbalballikog a nagbalin a ‘gagangay iti daga ti Canaan,’ ta iti kamaudiananna impusayna dagiti agtataeng kenkuana. (Levitico 18:3-25) Kasta met, dagiti demonio ti nangirakurak kadagiti di gagangay nga ar-aramid ti sekso a nangsaplit kadagiti adu nga il-ili itatta. Iti pannakidangadang a maipaay iti pammati, masapul a lapdantayo ti aniaman nga iraraut babaen kadagitoy natnagen nga anghel a mangpilpilit kadagiti tattao a ‘mangiyawat kadagiti bagbagida iti pannakiabig ken sumurot iti naisingayan a pannakausar ti lasag.’​—Judas 3, 6, 7.

Agbangon a Maipaay iti Pannakaispal

17. Kas ken Noe ken ti pamiliana, kasanotay a maipakita dagiti bagbagitayo a saan a paset iti lubong?

¹⁷ Gapu iti kinainget dagiti panawentayo, kasanotay a masarakan ti dalan ti pakaisalakanan? Bueno, kasanot’ pannakalasat ni Noe ken ti pamiliana? “Gapu iti pammati ni Noe . . . binabalawna ti lubong.” (Hebreo 11:7) Kasta met itatta, dagiti Saksi ni Jehova ket “saanda a paset” ti dakes a lubong. Kasta met, indemonstratayo ti pammatitayo babaen ti panangidedikartayo iti biagtayo ken Jehova ken nabautisarantayo iti danum tapno agbalin nga ad-adalan ni Jesu-Kristo.​—Juan 17:14, 16; Mateo 28:19.

18. Ania ti iladladawan ti panangibangon iti daong?

¹⁸ Mainayon pay, makipaspasettayo iti trabaho ni Jehova a maipaay iti daytoy nga aldaw, ti naespirituan a trabaho a panagbangon nga iturturong ti Dakdakkel a Noe, ni Jesu-Kristo. Kas maysa a lugar iti kinatalged ken pannakailasat, inrepresentar ti daong ti naespirituan a paraiso nga ibangbangon ni Jehova kadagiti managdaydayawna nanipud pay 1919. Isu dayta ti kasasaad ti naisublin a natalna a pannakirelasion ti Dios. Isu dayta ti urnos ti Dios a maipaay a pakaispalan ti makailadawan a pamilia ti Dakdakkel a Noe a lumasat iti “dakkel a rigat.”​—Mateo 24:21; 1 Corinto 3:9, 11; 2 Corinto 12:3, 4; Apocalipsis 7:13, 14.

19. Ni Noe, dagiti kameng ti pamiliana ken ti aramidda iladawanna ti ania?

¹⁹ “Ngem ni Noe nasarakanna ti parabur kadagiti mata ni Jehova.” Anian a nagsayaat ti panangiladawanna ken ni Jesu-Kristo, a nakipagna a sipapakumbaba iti Dios ditoy daga, nga awan ti inar-aramidna iti kabukbukodanna a nakem! (Genesis 6:8; Mateo 17:1, 5; Juan 8:28) Agpadpada a manangaskasabada iti kinalinteg​—maysa a nagsayaat nga ulidan nga agpaay kadagiti amin a saksi ni Jehova. Ket makasigurotayo a ti asawa ni Noe, a mangiladladawan kadagiti natda pay a napulotan ditoy daga itatta, ti maysa met a modelo ti kinamanagpasakop. (2 Pedro 2:5; Lucas 4:14-19; Efeso 5:21-24) No pampanunotentayo no kasano ti kinadakkel ti trabaho a panangibangon ti daong a maipaay a pakaisalakanan idi, mabalintayo a panunoten no kasano ti kinaragsak ni lakayen a Noe iti kaadda dagiti katulonganna a tallo a napipigsa nga annakna a lallaki ken dagiti assawada! Apagpag-isu ti panangiladawan dagitoy kadagiti agdama a “dakkel a bunggoy” a mangibakbaklay met iti kadakkelan a paset ti trabaho ti naespirituan a panagbangon bayat dagiti maudin a panagbilang nga agpabpababa nga agturong iti manangiladawan a Layus.​—Apocalipsis 7:9, 15.

20, 21. (a) Ania a nalawag a panginanamaan ti agur-uray kadagiti managdaydayaw ken Jehova iti nadalusanen a daga? (b) Ania a kinaragsak ti mabalin a mapasaran uray pay itan?

²⁰ Inton madalusanen daytoy a daga. a sisasagana a mapagbalinto manen a literal a paraiso, dagidiay inladawan dagiti annak ni Noe ken dagiti mamanugangna maaddaandanto ti panawen nga agipasngay kadagiti annak iti kinalinteg. Kalpasanna ti milagro ti panagungar ti mangan-anayton iti panangpunno ti daga kadagiti tattao. Amin a mangawat iti pribilehio nga agbalin a “dagiti sabsabali a karnero” ni Jesus ti naisublinton iti kinanaan-anay, ket inton mailasatda iti maudi a pannakasuot kalpasan nga inyawat ni Kristo ti Pagarian ken ni Amana, dagitoy mapagbalindanto a nalintegen a maipaay iti biag nga agnanayon.​—Juan 5:28, 29; 10:16; 1 Corinto 15:24-26; Salmo 37:29; Apocalipsis 20:7, 8.

²¹ Anian a ragsak ti agur-uray kadagiti matalek a managdaydayaw ken ni Jehova! Ngem dakdakkel pay a ragsak ti masarakan uray itan babaen iti amin-puso a pannakiraman iti panangibangon ti moderno-aldaw a daong a maipaay a pakaisalakanan. Kasano ti irarang-ay dayta a trabaho? Ti sumaganad a panagadaltayo ti mangipaay iti sungbat.

KASANO TI PANANGSUNGBATYO?

◻ Kasano a dagiti paspasamak sakbay ti Layus makapakdaar kadatayo?

◻ Ania dagiti leksion a maadaltayo manipud Mateo 24:37-39?

◻ Apay a nagpateg ti “pananggura iti dakes”?

◻ Kasano ti pannakipasettayo iti panangibangon iti makailadawan a daong?

[Kahon iti panid 11]

KAS KADAGITI ‘ALDAW NI NOE’​—

“40 porsiento laeng kadagiti mannursuro ti relihion iti kolehio . . . ti mamati nga imoral nga agdenna ti di kasado a lalaki ken baba.”—Saturday Oklahoman & Times, Disiembre 29, 1984

[Kahon iti panid 12]

Adda Kadi Pateg dagiti Prinsipio ti Biblia?

Maysa a padi nga Episcopalian ti nagdengngeg iti panamumpon nga indauluan ti maysa kadagiti Saksi ni Jehova. Kalpasanna, babaen ti panangawis ti padi, dua a ministro manipud Watch Tower Society ti timmabuno iti diskusion a kadua dagiti sumagmamano a klero idiay Brooklyn Heights, Siudad ti Nueva York.

Timmaud ti saludsod maipapan iti homoseksualidad. Pinagbalin a nabatad dagiti Saksi nga iparparit ti Biblia daytoy ket dagiti Saksi ilaksidda dagiti tattao nga agar-aramid ti aniaman a kita ti imoralidad. (Roma 1:24-27; 1 Corinto 6:9, 10; Judas 7) Sinaludsodan dagiti Saksi dagiti klero maipapan iti takderda kadagitoy a bambanag ket inawatda dagitoy sumaganad a sungbat:

Maysa a ministro a Congregational: “Pagarupek nga addaankami iti pagalagadan iti panangekskomunikar wenno panangikkat kadagiti pagalagadan ti iglesiami, ngem ti intero a panagbiagko, diak malagip ti inkam panangusar iti dayta a linteg!”

Ti padi nga Episcopalian: “No aramatenmi dayta a linteg, awanen ti [matda] nga asinoman kadagiti miembromi.”

Maysa a monsignor a Katoliko: “No aramatenmi dayta a linteg, awanen ti [matda] kadagiti papadimi.”

Numan pay dagiti komento dagitoy a klero ket kasla panaglablabes a panangiladawan kadagiti bambanag, maragsakan dagiti Saksi ni Jehova maipapan iti mismo a kinatibkerda iti panangsalimetmet iti kinadalus ti kongregasion. Dagitoy “saanda a paset iti lubong.”​—Juan 15:19.

[Kahon iti panid 13]

KAS KADAGITI ‘ALDAW NI NOE’​—

“Maysa nga eskuelaan publiko idiay Siudad ti Nueva York a para kadagiti estudiante ti high school a homoseksual ti naglukat idiay Manhattan.” Kuna ti mannursurona: “Tarigagayanmi ti maysa a lugar a sadiay dagiti ubbing a gay ken lesbian ket saanda a mariribukan kadagiti di nataengan a tin-edyer.”​—The New York Times, Hunio 6, 1985

[Kahon iti panid 14]

KAS KADAGITI ‘ALDAW NI NOE’​—

“Dagiti kamkameng ti Riverside Church inanamonganda idi kalman ti maysa a pagalagadan a manganamong iti kinabakla a mangawat iti homoseksual a relasion kas paset ti pannakaawat iti Nakristianuan a panagbiag ti pamilia.”​—New York Post, Hunio 3, 1985