Ania ti Kuna ti Biblia Maipapan iti Panangyalison iti Dara?
Sungbat ti Biblia
Kuna ti Biblia a saantayo a mangipauneg iti dara. Gapuna, saantayo nga awaten ti puro a dara wenno dagiti kangrunaan a pasetna iti aniaman a pamay-an, maipaay man dayta kas taraon wenno mayalison. Usigenyo dagiti sumaganad a teksto:
Genesis 9:4. Kalpasan ti Layus, impalubos ti Dios a mangan ni Noe ken ti pamiliana iti karne ngem imbilinna a saanda a kanen ti dara dayta. Imbaga ti Dios ken ni Noe: “Ti laeng lasag agraman ti kararuana—ti darana—dikay kanen.” Manipud idin, agaplikaren daytoy a bilin iti amin a tattao yantangay kaputotannatayo amin ni Noe.
Levitico 17:14. “Dikay kanen ti dara ti aniaman a kita ti lasag, agsipud ta ti kararua ti tunggal kita ti lasag isu ti darana. Asinoman a mangan iti dayta magessatto.” Matmatan ti Dios a ti kararua, wenno biag, ket adda iti dara ken kukuana dayta. Nupay naited laeng daytoy a bilin iti nasion ti Israel, ipakitana no kasano kainget ti panangmatmat ti Dios iti linteg maibusor iti pannangan iti dara.
Aramid 15:20. ‘Umadayoka iti dara.’ Imbilin ti Dios kadagiti Kristiano ti isu met laeng a bilin nga intedna ken ni Noe. Ipakita ti historia a saan a nangan dagiti nagkauna a Kristiano iti puro a dara ken saanda nga inusar dayta kas agas.
Apay nga imbilin ti Dios a liklikantayo ti dara?
Napaneknekan iti tay-ak ti medisina a makadangran iti salun-at ti panangyalison iti dara. Ngem ti nangnangruna a makagapu ket, imbilin ti Dios a liklikantayo ti dara gapu ta sagrado kenkuana ti ireprepresentar ti dara.—Levitico 17:11; Colosas 1:20.