Salsaludsod Dagiti Agbasbasa
Ania ti kaipapanan ti salaysay a nairekord iti Exodo 4:24-26, ken siasino ti nagpeggad ti biagna?
Kastoy ti napasamak idi agturong ni Moises idiay Egipto a kaduana ni baketna a Zipora ken dagiti annakna a da Gerson ken Eliezer: “Naaramid iti dalan idiay disso a pagdagusan nga isu nasabet ni Jehova ket sinapsapulna ti pamay-an a panangpapatay kenkuana. Kamaudiananna nangala ni Zipora iti maysa a pamulinawen ket gineppasna ti makinsango a kudil ti anakna ket insagidna dayta kadagiti sakana ket kinunana: ‘Agsipud ta maysaka a nobio iti dara kaniak.’ Gapu itoy isu binaybay-anna. Iti dayta a tiempo kinunana: ‘Maysa a nobio iti dara,’ gapu iti pannakakugit.” (Exodo 4:20, 24-26) Nupay saan a nalawag daytoy a teksto ken saan a masierto ti kaipapananna, mangted ti Kasuratan iti sumagmamano a panangilawlawag kadagitoy a bersikulo.
Saan nga espesipiko nga ibaga ti salaysay no siasino ti nagpeggad ti biagna. Ngem rasonable a panunoten a saan a ni Moises ti agpegpeggad yantangay kaaw-awatna ti bilin ti Dios nga iruarna dagiti Israelita manipud iti Egipto. (Exodo 3:10) Kasla imposible nga iti panangitungpal ni Moises iti nakaibaonanna, pagpeggaden ti anghel ti Dios ti biagna. No kasta, ti maysa kadagiti annakna ti agpegpeggad. Kinuna ti linteg a nasaksakbay a naited ken ni Abraham: “Ti di nakugit a lalaki a saanto a makugit ti lasag ti makinsango a kudilna, dayta a mismo a kararua masapul a magessat kadagiti kailianna. Rinakrakna ti tulagko.” (Genesis 17:14) Agparang a naliwayan a kinugit ni Moises ti anakna a lalaki, isu a nagpeggad ti biag ti ubing iti ima ti anghel ni Jehova.
Makinsaka ti nasagid idi gineppas ni Zipora ti makinsango a kudil ti anakna tapno mailinteg dagiti bambanag? Saka dayta ti anghel ni Jehova nga addaan iti pannakabalin a mangpapatay iti saan a nakugit nga anakna. Nainkalintegan ngarud nga insagid ni Zipora ti makinsango a kudil ti anakna iti saka ti anghel, nga indatagna kenkuana kas pammaneknek nga inalagadna ti tulag.
Karkarna ti inyebkas ni Zipora a “maysaka a nobio iti dara kaniak.” Ania ti ipamatmat daytoy maipapan ken ni Zipora? Babaen ti panangannurotna kadagiti kalikagum ti tulag ti pannakakugit, binigbig ni Zipora nga isu ket adda iti naitulag a relasion ken ni Jehova. Ti tulag ti Linteg a naaramid kadagiti Israelita ipakitana nga iti sidong ti naitulag a relasion, maibilang ni Jehova kas asawa a lalaki ket ti sabali a dasig kas asawa a babai. (Jeremias 31:32) Gapuna, iti panangawagna ken ni Jehova (babaen ti pannakabagina nga anghel) kas ‘maysa a nobio iti dara,’ agparang a bigbigbigen ni Zipora ti panagpasakupna kadagiti sagudayen dayta a tulag. Arigna nga inawatna ti akem ti maysa nga asawa a babai iti naitulag a relasion, ket ni Jehova a Dios ti asawa a lalaki. Aniaman kadagita, gapu iti naganat a panagtulnogna iti kalikagum ti Dios, saan a nauyos ti biag ti anakna.