PANNAKAREGREG TI SIKOG
Ti panangikkat iti mabukbukel a sikog sakbay a makapagbiag a bukbukodna. Iti gagangay a pannakaaramat ti pannakaregreg ti sikog ken ti naalisan, adda nagdumaan dagitoy ta ti pannakaregreg ti sikog ket inggagara ken pinilit a panangikkat iti linaon ti masikog nga aanakan, idinto ta ti maalisan ket di inggagara ken di maliklikan a pannakaikkat ti sikog. Saan a pinagduma ti Biblia ti pannakaregreg ti sikog ken ti alis; inaramatna dagitoy a termino iti nalawlawa ken mapagsinsinnukat a kaipapanan. Ti Hebreo a sha·khalʹ, kaipapananna ti “maregreg ti sikog” (Ex 23:26), ket naipatarus met a “maulila” (De 32:25), “maulila iti annak” (Le 26:22), “maalisan” (Os 9:14), ken “agbalin nga awanan bunga” (Mal 3:11). Ti Hebreo a sao a yoh·tseʼthʹ, a naipatarus a “pannakaregreg ti sikog” iti Salmo 144:14, ket nagtaud iti sao a kaipapananna ti “rummuar.” (Idiligyo ti Ge 27:30.) Dagiti termino nga “alis” ken “maysa a nayanak a kurang ti aldawna” (Sal 58:8; Ec 6:3) ket pakaipatarusan ti Hebreo a sao a neʹphel a nagtaud iti ramut a sao a na·phalʹ, kaipapananna ti “matnag.”
Ti di maliklikan a pannakaregreg ti sikog wenno pannakaalis ket mabalin a gapu iti aksidente, makaakar a sakit, mental wenno pisikal a pannakaburibor wenno panagdanag, wenno gapu iti nainkasigudan a kinakapuy ti kameng ti bagi ti ina. Makapapatay ti dandanum iti asideg ti Jerico, a nakaigapuan dagiti pannakaalis, agingga idi pinaimbag ti mammadto ni Jehova a ni Eliseo dagita a dandanum.—2Ar 2:19-22.
Nakaro a krimen iti imatang ti Dios ti inggagara a panangiregreg iti sikog wenno panangipamuspusan a maalisan babaen iti artipisial a pamay-an, babaen iti droga, wenno babaen iti medikal nga operasion, tapno laeng saan a maipasngay ti di matarigagayan nga ubing. Sagrado ti biag kas napateg a sagut manipud iti Dios. Gapuna, ti linteg ti Dios nga intedna ken Moises sinalaknibanna ti biag ti di pay naipasngay nga ubing saan laeng a maibusor iti kriminal a panangiregreg iti sikog, ta no adda lallaki a nagkinnabil ket nadangranda ti maysa a masikog a babai a nakaigapuan ti ipapatay ti babai wenno ti ubing, “ngarud masapul nga itdem ti kararua iti kararua.” (Ex 21:22-25) Siempre, sakbay a maipataw dayta a pannusa, tingitingen pay nga umuna dagiti ukom no ania dagiti kasasaad ken no naigagara dayta. (Idiligyo ti Nu 35:22-24, 31.) Ngem iti panangipaganetget ni Dr. J. Glenn iti kinaserioso ti aniaman nga inggagara a pananggandat a mangdangran, kunana: “Ti makapagbiagen a sikog iti aanakan ket maysa nga indibidual a tao, ket ngarud ti panangdadael iti dayta, maysa a panangsalungasing iti maikanem a bilin.”—The Bible and Modern Medicine, 1963, p. 176.
No iti umiso a panangmatmat, ti bunga ti aanakan ket pamendision ni Jehova. (Le 26:9; Sal 127:3) Ngarud, idi inkari ti Dios a pagrang-ayenna ti Israel, impasiguradona ti naballigi a panagsikog ken panagipasngay iti annak, a kunkunana: “Awanto iti dagam uray ti maysa a babai a maregreg ti sikogna wenno uray ti maysa a lupes a babai.” (Ex 23:26) Iti sabali a bangir, kas impasimudaag ti kararag ti nalinteg, ti pammaneknek iti di pananganamong ti Dios kadagiti kabusorna ket isu dagiti maalisan nga aanakan ken ti panagbalinda a kasla alis a saan a pulos makakita iti init.—Sal 58:8; Os 9:14.
Idi agsagsagaba ni Job, pinanunotna a nasaysayaat koma no isu nagbalin laengen a “nailemmeng nga alis.” “Apay a saanak a natay manipud iti aanakan?” inyikkis daytoy agtutuok a tao. (Job 3:11-16) Uray met ni Solomon inrasonna a ti naikkat a sikog a kurang ti aldawna ket nasaysayaat ngem iti tao nga agbiag iti napaut a tiempo ngem saanna a pulos matagiragsak ti biag.—Ec 6:3.
Ti makaakar a pannakaregreg ti sikog (contagious abortion), maysa a sakit a makagapu iti panaganak a kurang ti bulanna, ket mabalin a mapasamak iti an-animal a kas iti baka, kabalio, karnero, ken kalding. Ti aksidente a pannakaregreg ti sikog gapu iti kinaliway wenno gapu iti sakit dagiti taraken nga animal ket mapaspasamaken idi kaaldawan da patriarka Jacob ken Job.—Ge 31:38; Job 21:10.