Foca nga Agbiag iti Nabara a Danum?

MASANSAN a mailadawan dagiti foca iti nayelo, napudaw a nalalawa a danum ti Arctic wenno Antarctic. Ngem ammoyo kadin a mabalin nga agbiag dagiti foca iti kalalainganna a klima, nga agbilagda iti kadaratan kadagiti saan a maas-asak a playa?

Am-ammuenyo ti foca a monk iti Mediteraneo. Iti kaatiddogna a 3.5 metro, daytoy a foca nga agbiag iti nabara a danum addaan iti ababa, napuskol a dutdot a nangisit dagiti burikna, napudaw ti tian ken barukongna. Dagitoy a naisalsalumina a kolor, nga umasping iti abito ti dadduma nga orden ti relihion, nalabit ilawlawagna ti naganna.

Sumagmamano a sasao iti Biblia dakamatenda ti lalat a naawagan taʹchash (iti Hebreo), a nangabbong iti tabernakulo ken dagiti alikamen iti santuario. (Exodo 25:5; 26:14; Numeros 4:8) Isingasing dagiti dadduma nga eksperto a ti taʹchash tuktukoyenna ti lalat ti foca. Dayta kadi ti lalat ti foca a monk iti Mediteraneo? Ti kaadda daytoy nga ayup kadagiti danum ti Mediteraneo patalgedanna daytoy a pagarup.

Ilawlawag dagiti sarsarita idi ugma ti naisangsangayan a pannakabalin ti foca a monk. Patien ti dadduma a ti lalatna, maisiasina ti kimat ken malapdanna ti uraro nga agtinnag kadagiti natalonen a kataltalonan. Naipatakder man wenno naipaidda, dagiti dutdot ti lalat ti foca makuna nga ipamatmatda ti pangrugian wenno yaadani ti panagpatingga ti bagyo a napakuyogan ti kimat ken gurruod.

Gapu iti maipagarup a pannakabalinna, dandani pinukawen dagiti awanan asi a mangnganup ti foca a monk. Nupay kasta, iti nabiit pay, daytat’ nakita iti baybay nga adda iti aglawlaw ti makindaya a tengnga ti Sardinia. No maipasdeken ti panagtunos ti ayup ken ti tao idiay baro a lubong ti Dios, awan duadua nga agindegton ti foca a monk iti Mediteraneo kadagiti natalinaay ken natalna a playa, a sadiay mabalinnanton ti agbilag iti init a din butbutngen dagiti naagum a tattao.​—Isaias 11:6-9.

[Picture Credit Line iti panid 31]

Panos Dendrinos/HSSPMS