FEATURE
Kadaanan nga Egipto
GAPU iti maulit-ulit a pannakilangen ti Israel iti Egipto, nailanad iti Biblia ti adu a detalye maipapan iti dayta a pagilian. Naitan-ok ti mismo a nagan ni Jehova iti nakaskasdaaw a pamay-an babaen kadagiti paspasamak idiay Egipto.
MAPA: Kadaanan nga Egipto
Adu a didios ti napagdaydayawan iti daga ti Egipto. Adda an-animal a namatmatan kas didios; naibilang a sagrado ti dadduma nga animal maipaay iti sumagmamano a didios ti Egipto. Saan ngarud a pakasdaawan a kinuna ni Moises a no agidaton ti Israel iti an-animal a sakripisio ken Jehova idiay Egipto, agresulta daytoy iti panangranggas kadakuada dagiti Egipcio. (Ex 8:26) Kasta met, matarusantayo no apay a nagusar ti Israel iti sinukog nga estatua ti kigaw a baka maipaay iti imbilangda a “piesta ken Jehova” idi a ti puspusoda nagsubli iti Egipto bayat ti kaaddada idiay let-ang.—Ex 32:1-5.
Ti sabali pay a nalatak a paset ti panagdaydayaw dagiti Egipcio isu ti panamatida iti kaadda ti sabali a biag kalpasan ti ipapatay. Nalawag daytoy iti kaugalianda a panangembalsamar iti natay ken iti panagbangon kadagiti dadakkel a tanem a pangpadayaw kadagiti minatayda.
Nupay “nasursuruan [ni Moises] . . . iti isuamin a kinasirib dagiti taga Egipto,” dagiti inlanadna a bilin maipapan iti panagdaydayaw ken Jehova ket saan a pulos natulawan kadagiti patpatien dagiti Egipcio. (Ara 7:22) Ti insuratna ket saan a nagtaud iti tao no di ket impaltiing ti Dios.
Estatua a mangirepresentar ken Amenhotep III nga agtayag iti gistay 18 m (60 pie) iti asideg ti Thebes. Awan duadua a nairanta ti kakasta nga estatua tapno mapagamanga dagiti umili iti kasta unay
Dakkel a batonlagip a mangibinsabinsa iti panagibangon ni Tutankhamen; ngem idi agangay binaliwan ni Ari Horemheb ti kitikit tapno isu a mismo ti mapadayawan iti dayta a gapuanan. Ti kasta a di kinamapagtalkan ket gagangay kadagiti rekord ti kadaanan nga Egipto
Tinallo a dios a mangipakita nga adda ni Ramses II iti nagbaetan ti dios a ni Amon ken ti diosa a ni Mut. Naibilang ni Faraon kas dios, ti sibibiag a Horus
Ni Faraon Taharqa nga agkurkurno iti sanguanan ni Horus, patienna nga isu ti inkarnasion dayta a didiosen. Nalatak idi dagiti animal iti relihion dagiti Egipcio
Nagdadakkel nga ad-adigi ti templo idiay Luxor
Kalsada nga addaan kadagiti sphinx nga agturong iti templo ni Amon-Ra idiay Luxor
Maysa a paset ti “Libro Dagiti Natay,” a naikadua iti maysa a napreserba a bangkay; naglaon dayta kadagiti naisurat nga orasion a nairanta a baliksen ti pimmusayen kas salaknib ken mangibagnos kenkuana iti pannakaukom nga agturong iti sabali a biag
Ti diosa-langit a ni Nut a napalikmutan kadagiti simbolo ti zodiak. Ti astrolohia a nagtaud idiay Babilonia ket nagbalin a paset ti relihion dagiti Egipcio
Nagpannuray ti Egipto iti akikid a nadam-eg a ginget nga adda iti igid ti Karayan Nilo. Iti buya iti likudan, makita ti dagus a panagbaliw ti kasasaad, manipud disso nga addaan mulmula sa nagbalin a desierto
Maysa a faraon a nakalugan iti karuahena. Dagitoy a kita ti karuahe ket alikamen ti militaria ti Egipto ken nailako pay iti sabali a nasnasion
Kadagiti pader ti templo ni Amon-Ra idiay Karnak, inlanad ni Seti I dagiti namilitariaan a panagballigina; naipakita a nakemmeg dagiti kautibo babaen iti buokda. Kas mainanama, dagiti panagballigi ket sipapasindayag a nailanad kadagiti monumento ti Egipto