TINAPAY TI PAMARANG
Sangapulo ket dua a tinapay a naikabil iti maysa a lamisaan iti Nasantuan a benneg ti tabernakulo wenno templo ken masukatan kadagiti kabbaro tunggal Sabbath. (Ex 35:13; 39:36; 1Ar 7:48; 2Cr 13:11; Ne 10:32, 33) Ti literal a Hebreo nga awag iti tinapay ti pamarang ket “tinapay ti rupa.” No dadduma, ti sao maipaay iti “rupa” kaipapananna ti “sanguanan” (2Ar 13:23), ket ngarud ti tinapay ti pamarang adda iti sango ti rupa ni Jehova kas patinayon a daton iti sanguananna. (Ex 25:30, Rbi8 ftn) Ti tinapay ti pamarang natukoy met kas “tinapay nga agtutuon” (2Cr 2:4), “dagiti tinapay ti panangidiaya” (Mr 2:26), ken “dagiti tinapay” laeng (Heb 9:2).
Dagiti Cohatita ti makinrebbeng nga agluto iti tinapay ti pamarang “iti tinunggal sabbath,” ken isuda met ti mangidaliasat iti dayta no mayakar idi ti tabernakulo. (Nu 4:7; 1Cr 9:32) Dua nga omer (0.2 efa; katupag ti 4.4 L wenno 4 a namaga a qt) a nasayaat nga arina ti naaramat a pangaramid iti tunggal maysa kadagiti 12 a nagtimbukel a tinapay, ken awan ti naaramat a lebadura sigun ken Josephus. (Jewish Antiquities, III, 142 [vi, 6]) Kada Sabbath, maikkat idi dagiti daan a tinapay manipud lamisaan ti tinapay ti pamarang nga adda iti amiananen ti Nasantuan (Ex 26:35) ken masuktan iti 12 a kabbaro a tinapay. Mapagtutuon dagiti tinapay iti dua a salansan a sagnenem a katuon wenno tinapay ti tunggal salansan. Maikkan iti puro nga olibano ti tunggal salansan. Sigun iti nabayagen a patpatien dagiti Judio, ti olibano naikabil kadagiti nabalitokan a pagkargaan ket saan a direkta a naikabil kadagiti tinapay. Naikuna a ti olibano mapuoran iti altar no maikkat ti tinapay ti pamarang iti Sabbath.—Le 24:5-8.
Yantangay dagiti daan a tinapay makalawas nga addada iti Nasantuan iti sanguanan ni Jehova, naibilangda a kasasantuan a banag ket kanen idi dagiti Aaroniko a papadi iti maysa a nasantuan a disso, nabatad a maysa a disso iti paraangan ti santuario. (Le 24:9) Maymaysa laeng ti nailanad a pasamak iti pakasaritaan iti Biblia a dagiti daan a tinapay ket inusar dagiti saan nga Aaronita. Idi a ni David itartarayanna ni Saul, nagkiddaw ken Ahimelec a nangato a padi iti tinapay maipaay kenkuana ken kadagiti lallakina. Gapu ta awanan ni Ahimelec iti “gagangay a tinapay,” inikkanna ni David iti sumagmamano a tinapay ti pamarang a nagikkatan. Ngem inaramid laeng daytoy ti nangato a padi kalpasan a nasiguradona a ni David ken dagiti lallakina ket nadalus iti seremonial a pamay-an yantangay namati a madama nga itungtungpal ni David ti maysa a mision maipaay iti ari. (1Sm 21:1-6) Tinukoy ni Jesu-Kristo daytoy a pasamak idi sinupiat dagiti Fariseo ti panagruros dagiti adalanna kadagiti dawa ti binukel iti Sabbath.—Mt 12:3-7; Lu 6:1-4.