PANANGIPUPOK, PANANGIBALUD

Ti panangikulong iti maysa a tao maibatay iti pamay-an wenno autoridad ti linteg.

Ti maysa a pagarigan iti daytoy isu ti napasamak iti Israelita nga Egipcio ti amana idi tinabbaawanna ti nagan ni Jehova bayat ti kaaddana iti pakarso ti Israel. Kalpasan a sinalungasingna ti Linteg, kunaen ti salaysay: “Kalpasanna inyawatda iti pannakaipupok agingga nga adda nalawag a deklarasion kadakuada sigun iti sasao ni Jehova.” (Le 24:10-16, 23) Kas paglintegan iti Israel, saan a napaut ti pannakaipupok dagiti kriminal agsipud ta naikalikagum a dagus a maipakat kadakuada ti hustisia. (Jos 7:20, 22-25) Nupay kasta, iti daytoy a kaso, kasta met iti kaso ti maysa a tao a nangsalungasing iti Sabbath iti Numeros 15:32-36, nauray nga umuna ti pananglawag ni Jehova iti dayta a linteg; ngem apaman a nalawagen ti sasao ni Jehova iti dayta a banag, dagus a naipakat ti sentensia. Umasping iti dayta, naipupok ni Pedro ken ti dadduma pay nga apostol, nupay di nainkalintegan, bayat nga inur-urayda ti pannakausig iti saklang ti Sanhedrin iti simmaganad nga aldaw. (Ara 4:3; 5:17, 18) Dakamaten met ti Kasuratan a di nainkalintegan a naipupok ni Jeremias, saan laeng a naikulong tapno mausig no di ket aktual a naibalud.​—Jer 37:21.

Iti Galacia 3:19-25, nayaplikar iti naespirituan a pamay-an ti termino a ‘nabantayan’ ken “pannakaipupok.” Kinuna ni Pablo a ti Linteg imparangarangna dagiti salungasing ket ti “Kasuratan inyawatna a sangsangkamaysa ti amin a bambanag iti panangipupok ti basol.” Ngem intuloyna: “Nupay kasta, sakbay a dimteng ti pammati, mabambantayantayo idi iti sidong ti linteg, a nayawattayo a sangsangkamaysa iti pannakaipupok, a sikikita iti pammati a naikeddeng a maipanayag.” Impaganetgetna ngarud no kasano a naipupok iti naespirituan ti natural nga Israel, a binantayan wenno inaywanan ti Linteg, agingga a dimteng ti panamati ken Kristo.