Ti kaakaba ti rabaw daytoy nakaam-amak a nauneg a ginget ket 3 km (2 mi) ken addaan kauneg a gistay 520 m (1,700 pie), ket sumagmamano laeng a pagdalanan ti lumasat idi iti daytoy (Isa 16:2), ngarud nagbalin a nabatad a nainkasigudan a beddeng. Idi tiempo ti panagparmek dagiti Israelita, daytoy a ginget ti namagsina kadagiti Amoreo iti amianan ken kadagiti Moabita iti abagatan (Nu 21:13), ngem ti mensahe ni Jefte kadagiti Ammonita ipakitana a ti makin-amianan a deppaar ket sigud nga inturayan dagiti Ammonita ken sinakup dagiti Amoreo sakbay pay ti idadateng ti Israel. (Uk 11:12-27) Tinaraigid ti Israel dagiti beddeng ti teritoria ti Moab ket nakadanonda iti Arnon, nalabit kadagiti makinngato a gubuayan ti danum dayta. Idi dimmarup ni Sihon nga ari dagiti Amoreo, nagballigi ti Israel ket tinagikuana ti daga a mangsaklaw iti Arnon agingga iti Jaboc. (Nu 21:21-24; De 2:24-36; kitaenyo ti JABOC, NAAPRES A GINGET TI.) Daytoy damo a naparmek a daga ket nagbalin a teritoria dagiti tribu da Ruben ken Gad idi agangay.​—De 3:16; Jos 12:1, 2; 13:8, 9, 15-28.