AGAG

Ti nagan wenno titulo a nayaplikar iti nasursurok ngem maysa nga ari dagiti Amalekita.

1. Iti maikatlo a naimpadtuan a sao ni Balaam, impadtona a ti ari ti Israel “nangatngatonto ngem ni Agag, ken maipangatonto ti pagarianna.” (Nu 24:7) Naisawang dagitoy a sasao idi agarup 1473 K.K.P., ket awanen ti simmaruno pay a panangtukoy ken Agag agingga iti panagturay ni Ari Saul (1117-1078 K.K.P.). Gapu itoy, kunaen ti sumagmamano nga eskolar a ti “Agag” ket titulo nga inaramat ti ar-ari dagiti Amalekita nga umasping iti titulo a Faraon nga inaramat ti ar-ari ti Egipto. Mabalin met a maysa laeng daytoy a maulit-ulit a pannakausar ti maysa a personal a nagan. Aniaman kadagita ti umiso, ti panangtukoy ni Balaam ken Agag ipasimudaagna a mannakabalin ti pagarianna iti daydi a tiempo.​—Nu 24:20; kitaenyo ti AMALEK, DAGITI AMALEKITA.

2. Ti ari ti Amalek nga inabak ni Ari Saul kas kaitungpalan ti bilin ni Jehova. (Ex 17:14; De 25:17-19; 1Sm 15:1-7) Nupay kasta, ni Saul saanna a pinapatay ni Agag ken pinalubosanna dagiti umili a mangala iti sumagmamano kadagiti samsam, ket nagbanag daytoy iti panangisawang ni Samuel iti panangilaksid ti Dios ken Saul kas ari. (1Sm 15:8-29) Kalpasanna, ni Agag ket pinapatay ni Samuel a kinunana kenkuana: “No kasano a ti kampilanmo inulilana dagiti babbai iti annak, iti kasta a wagas agbalinto ti inam a kangrunaan a naulila iti annak iti tengnga dagiti babbai.”​—1Sm 15:32, 33; idiligyo ti Uk 1:5-7.