EBER

[nagtaud iti sao a kaipapananna ti “labsan (ballasiwen)”; wenno, “ballasiw [kayatna a sawen, sabali a bangir]”].

Malaksid iti pannakaaramatna kas personal a nagan ti lima a nadumaduma a lallaki iti Biblia, nausar met ti “Eber” iti Numeros 24:24 a mangipasimudaag iti puli a Hebreo wenno tumukoy iti maysa a rehion. Ti Griego a Septuagint, ti Syriac a Peshitta, ken ti Latin a Vulgate ipatarusda ditoy ti “Eber” kas “dagiti Hebreo.” Nupay kasta, ti “Eber” iti daytoy a kaso mabalin a tukoyenna ti daga wenno tattao iti ‘ballasiw’ ti Eufrates (malaksid iti Asiria, a nadakamat iti isu met laeng a bersikulo). Iti Hebreo, ti sasao maipaay iti “labes ti Karayan” (Heb., ʽeʹver han·na·harʹ) ket no dadduma maus-usar a pangtukoy iti rehion iti laud ti Eufrates. (Ne 2:7, 9; 3:7) Iti 1 Ar-ari 4:24, ti isu met laeng a Hebreo a sasao ket naipatarus nga “iti daytoy a deppaar ti Karayan” (NW) wenno “laud ti Eufrates.” (RS) Ti katupagna nga Aramaiko a sasao ket kadawyanna a nausar a pangawag iti rehion ti Siria ken Palestina.​—Esd 4:10, 11, 16, 17, 20; 5:3, 6; 6:6, 13.

1. Maysa nga inapo ni Abraham; ti anak ni Sela ken ama da Peleg ken Joctan ken ti dadduma pay nga annak. “Nabingbingay ti daga” idi kaaldawan ti anakna a ni Peleg, a ti panagbiagna ket linab-awan ni Eber iti agarup 191 a tawen. Mabalin a nainaig daytoy iti panangriribuk ni Jehova iti pagsasao dagidiay mangibangbangon idi iti Babel ken iti torre dayta iti sidong ti panangiwanwan ni Nimrod.​—Ge 10:25; 11:14-19, 26.

Dakamaten ti Genesis 10:21 “ni Sem, ti ama dagiti amin nga annak ni Eber [“inapo dagiti amin a Hebreo,” AT, Mo], ti kabsat ti inauna a ni Jafet.” Nabatad a nailista ditoy ni Eber kas asideg ti pannakainaigna ken Sem gapu iti kinapateg nga innaig ti Biblia kadagiti kaputotan ni Eber, nangnangruna manipud ken Abraham nga agpatpatuloy. Gapuna, saan a dagiti Hebreo laeng ti tuktukoyen ti teksto kas kapkaputotan ni Sem, kas nalawag nga ipakita dagiti sumaganad a bersikulo. Agparang a nagnaed idiay Arabia dagiti kaputotan ni Eber babaen ken Joctan, idinto ta dagiti kaputotan babaen ken Peleg nainaigda iti Mesopotamia.

2. Maysa a Gadita nga agnanaed idiay Basan, kaputotan ni Abihail.​—1Cr 5:11, 13, 14.

3. Benjamita a nadakamat kas anak ni Elpaal.​—1Cr 8:12.

4. Maysa a Benjamita a panguluen a nailista kas maysa kadagiti annak ni Sasac.​—1Cr 8:22-25, 28.

5. Maysa a Levita a padi; ti pannakaulo iti sangakabbalayan ni Amoc iti dasig ti amana. Nabatad a ni Eber ket kapanawenan ti nangato a padi a ni Joiaquim, ni Gobernador Nehemias, ken ni Esdras a padi ken eskriba.​—Ne 12:12, 20, 26.