BAAL TI PEOR

Ti mismo a Baal a nagdaydayawan dagiti Moabita ken Midianita idiay Bantay Peor. (Nu 25:1, 3, 6) Naisingasing a ni Baal ti Peor mabalin nga iti kinapudnona isu ni Kemos, gapu ta ni Kemos ti kangrunaan a dios dagiti Moabita. (Nu 21:29) Kas kadawyan iti panagdaydayaw ken Baal, dagiti nalulok unay a ritual ket mabalin a nainaig met iti panagdaydayaw ken Baal ti Peor. Bayat ti panagpakarso dagiti Israelita idiay Sittim iti nangato a tantanap ti Moab, nagargarida nga agaramid iti imoralidad ken idolatria gapu kadagiti babbai a managdaydayaw daytoy a dios.​—Nu 25:1-18; De 4:3; Sal 106:28; Os 9:10; Apo 2:14.

Ti panagbasol ti Israel mainaig ken Baal ti Peor nagbanag iti panangipagteng ni Jehova iti makapapatay a saplit a nanggudas iti rinibu nga Israelita. Tumaud ti saludsod no mano dagidiay aktual a natay iti dayta a saplit yantangay agparang nga aggidiat ti Numeros 25:9 ken 1 Corinto 10:8. Nalawag a 23,000 ti direkta a natay gapu iti saplit, idinto ta 1,000 a “pannakaulo” wenno dadaulo ti pinapatay ti uk-ukom ti Israel ken kalpasanna imbitinda dagita, iti imatang ti publiko.​—Nu 25:4, 5; kitaenyo ti BAAL Num. 4.