HAVOT-JAIR

[Purpurok a Tolda ni Jair].

Purpurok nga adda iti teritoria ni Manases iti daya ti Jordan. Yantangay no dadduma ti “Galaad” ket tumukoy met iti intero a daga ti Israel iti daya ti Jordan (Jos 22:9), mabalin a daytoy ti makagapu no apay a ti Havot-jair ket madakdakamat nga adda daytoy idiay Galaad (Nu 32:40, 41), nupay ti dadduma a teksto ipakitada a ti purpurok ket adda idiay Basan.​—De 3:14; Jos 13:29, 30.

Ni Jair (kaputotan ni Juda babaen ken Hezron, ngem naibilang met a kaputotan ni Manases), a kapanawenan ni Moises, ti naikuna a nangkautibo kadagitoy a ‘purok a tolda,’ nabatad a 23 ti bilangda, ken nangpanagan kadagita iti Havot-jair, nga impasurotna iti naganna. (Nu 32:39-41; De 3:14; 1Cr 2:3, 21-23; kitaenyo ti JAIR Num. 1.) Tawtawen kalpasanna, ti 30 a siudad a kukua ti 30 nga annak ni Ukom Jair ket pagaammo kas Havot-jair. Daytoy a panangilawlawag ket matmatan ti dadduma a kritiko a maisupadi iti nagtaudan ti nagan a Havot-jair. Nupay kasta, saan a dakamaten ti salaysay ti Uk-ukom a ti nagan a Havot-jair ket damo a naaramat iti daytoy naud-udi a tawtawen. Ipasimudaagna laeng nga idi tiempo a pannakaisurat ti salaysay, maar-aramat pay laeng daytoy a nagan ken tumukoy kadagitoy 30 a siudad.​—Uk 10:3, 4.

Bayat ti panagturay ni Solomon, dagiti purok a tolda ni Jair ket nairaman iti maysa kadagiti distrito a naipaaywan iti maysa a diputado. (1Ar 4:7, 13) Ti 60 a siudad a nadakamat iti 1 Ar-ari 4:13 ken iti dadduma pay a teksto (Jos 13:30; 1Cr 2:23) ket nasarikedkedan a siudad ti rehion ti Argob idiay Basan kadagidi a tiempo ken mabalin a saan a karaman kadagitoy ti nakaad-adu nga ili iti away. (Idiligyo ti De 3:4, 5.) Sabali dagiti “purok a tolda” ni Jair ken ti 60 a siudad, ngem di sigurado daytoy.

Iti di masinunuo a tiempo iti pakasaritaan ti Israel, ti Havot-jair ket kinautibo ti Gesur ken Siria.​—1Cr 2:23.