BENE-JAACAN
[Annak ni Jaacan].
Maysa kadagiti nagsardengan dagiti Israelita iti panagdaliasatda iti let-ang. (Nu 33:31, 32) Agparang a ti Jaacan isu ti Akan iti Genesis 36:27 ken 1 Cronicas 1:42 (“Jaacan” ti mabasa iti Masoretiko a teksto). Sigun iti salaysay ti libro ti Numeros, “nagluas [dagiti Israelita] manipud Moserot ket nagpakarsoda idiay Bene-jaacan. Kalpasan dayta nagluasda manipud Bene-jaacan ket nagpakarsoda idiay Hor-hagidgad.”
Iti Deuteronomio 10:6 natukoy ti Beerot Bene-jaacan mainaig iti “Mosera” (pangmaymaysa a porma ti Moserot), a mabalin a mangipasimudaag a ti Beerot Bene-jaacan (kaipapananna “Dagiti Bubon ti Annak ni Jaacan”) isu met laeng ti ayan ti Bene-jaacan. Nupay kasta, baliktad ti direksion ti panagdaliasat ti Israel iti salaysay a nailanad iti Deuteronomio no idilig iti salaysay ti Numeros, a ti Deuteronomio kunaenna a “nagluas ti annak ti Israel manipud Beerot Bene-jaacan nga agturong iti Mosera.” Gapu iti adu a tawen a nabusbos idiay let-ang, posible unay a dagiti Israelita namindua a limmasatda iti daytoy a rehion. Maitunos dayta iti kunaen ti The Pentateuch and Haftorahs maipapan iti daytoy a teksto: “Kastoy ti posible a pannakailawlawagna, kalpasan ti agpaabagatan a panagdaliasat dagiti Israelita nga agturong iti daga ti Edom kinasapulan a giddato nga agbueltada iti amianan.” (Inurnos ni J. Hertz, London, 1972) Mabalin a kinasapulan a magnada manen iti sumagmamano a disso a nagnaanda ken agsublida iti sumagmamano kadagiti lugar a limmasatanda, nga iti daytoy a gundaway nagsublida iti naggapuanda a direksion. Mapaliiw a ti rekord ti Deuteronomio (10:6) tukoyenna ti ipapatay ni Aaron kalpasan unay ti panangtukoyna iti panagsardeng idiay Mosera, idinto ta ti salaysay ti Numeros (33:31-39) deskribirenna dagiti panagdaliasat dagiti Israelita agingga idiay Ezion-geber ken kalpasanna iti amianan a laud ti Cades, sakbay nga isalaysayna ti banag maipapan iti ipapatay ni Aaron. Gapu iti daytoy, agraman ti nasaklaw a naunday a tawtawen, pudno unay a posible a nagsublida iti sumagmamano a dalan a nagnaandan, no kasta ti napasamak.
Maikunkuna a ti Bene-jaacan (Beerot Bene-jaacan) ket isu ti maysa a disso a sumagmamano laeng a milia iti amianan ti Cades-barnea.—Kitaenyo ti BEEROT BENE-JAACAN.