AIN

[Ubbog; Burayok].

Daytoy a sao literal a kaipapananna ti “mata,” ngem naaramat met a tumukoy iti maysa a burayok wenno ubbog a naiduma iti bubon wenno tangke nga aramid ti tao, a dagiti naud-udi a nadakamat a gubuayan ti danum natukoy kadagiti Hebreo a termino a beʼerʹ ken bohr. (Ge 49:22; De 8:7; kitaenyo ti BUBON; PAGURNONGAN TI DANUM.) Masansan a naisurat nga “En-” no mausar kadagiti napagtipon a sao, kas ti En-rimmon, En-gedi, En-gannim.

1. Maysa a lugar a dinakamat ni Jehova ken Moises idi intudingna ti makindaya a beddeng ti Israel. (Nu 34:11) Iti daytoy a teksto, ti nadakamat a “Ribla” nga adda “iti daya ti Ain” nabatad a saan a tumukoy iti Ribla iti daga ti Hamat nga amiananen pay ti Damasco, yantangay ti Ain nadakamat mainaig iti Baybay Kinneret (Galilea). Masarakan daytoy iti amianan dayta a baybay, ngem saan a masigurado ti eksakto nga ayanna.

2. Maysa kadagiti kaabagatanan a siudad a naituding iti tribu ni Juda (Jos 15:32) idi damo, ngem idi agangay naituding iti tribu ni Simeon. Napasamak dayta idi a ti bingay ni Simeon naala manipud iti nakalawlawa a teritoria ti Juda. (Jos 19:1, 7, 9; 1Cr 4:24, 32) Ti Ain ket asideg iti siudad ti Rimmon, ket agparang nga idi napagnaedan manen kalpasan ti pannakaidestiero idiay Babilonia, napagtipon ti nagnagan dagita a dua a lugar a napagbalin nga En-rimmon. (Ne 11:29) Gapuna, adda dagiti mangibaga nga isu ti Khirbet Umm er-Ramamin (Horvat Remalya), nga adda iti agarup 15 km (9 mi) iti amianan ti Beer-seba.​—Kitaenyo ti RIMMON Num. 2.

3. Iti Josue 21:16, nailista ti Ain kas maysa kadagiti siudad a naited kadagiti Levita. No daytoy a teksto maidilig iti Josue 15:42; 19:7 ken 1 Cronicas 6:59, makita a ti siudad a natukoy ditoy ket maawagan Asan iti dadduma a teksto.​—Kitaenyo ti ASAN.