LEKSION 52
Apay a Masapul nga Ikabilangantayo ti Panagbadbado ken Itsuratayo?
Nagduduma ti kayattayo no maipapan iti panagbadbado ken itsuratayo. No surotentayo dagiti prinsipio ti Biblia, saantay laeng a mapili ti kayattayo a bado no di ket maparagsaktayo pay ni Jehova. Kitaentayo ti dadduma kadagita a prinsipio.
1. Ania ti makatulong kadatayo nga agdesision no ania ti ibadotayo ken no ania ti itsuratayo?
Masapul nga agpilitayo iti “maitutop a bado, buyogen ti kinaemma ken kinasimbeng ti panunot,” ken kanayon koma nga agbalintayo a nadalus tapno maipakitatayo nga ‘agdaydayawtayo iti Dios.’ (1 Timoteo 2:9, 10) Kitaem dagitoy nga uppat a prinsipio: (1) Masapul a “maitutop” ti badotayo. Mabalin a nadlawmo kadagiti gimong nga agduduma ti panagbadbado dagiti kakabsat. Ngem kanayon nga ipakita ti panagbadbado ken panagbubuoktayo a resrespetuentayo ni Jehova a Dios. (2) Ti panagbado “buyogen ti kinaemma” kayatna a sawen a saantayo koma nga agbado iti makagargari wenno mangriing iti seksual a tarigagay, wenno mangala iti adu nga atension. (3) Maipakitatayo a ‘nasimbeng ti panunottayo’ no saantayo a suroten ti amin nga uso a panagbadbado ken itsura. (4) Kanayon koma nga ipakita ti itsuratayo nga ‘agdaydayawtayo iti Dios’ tapno nalawag a mailasin ti dadduma nga agserserbitayo iti pudno a Dios.—1 Corinto 10:31.
2. Apay a masapul nga ikonsiderartayo dagiti kakabsat no agpilitayo iti badotayo?
Agpayso a datayo ti agpili no ania ti ibadotayo, ngem masapul a panunotentayo ti mabalin nga epekto dayta iti dadduma. Ikagumaantayo a saan a maitibkol ti dadduma, no di ket ‘panunotentayo koma ti pagimbagan ti kaarrubatayo tapno mapabileg.’—Basaen ti Roma 15:1, 2.
3. Kasano a mabalin nga aginteres ti dadduma iti kinapudno no nasayaat ti panagbadbadotayo?
Kanayon nga ikagkagumaantayo a maitutop ken nasayaat ti panagbadbadotayo. Ngem ad-adda koma a panunotentayo ti ibadotayo no mapantayo makigimong wenno mangasaba. Saantay a kayat a ti atension dagiti tattao ket maiturong iti itsuratayo imbes nga iti nagpateg a mensahetayo. Kayattayo a makatulong ti panagbadbado ken itsuratayo tapno awaten ti dadduma ti kinapudno ken ‘maarkosantayo ti pannursuro ti Dios, a Manangisalakan kadatayo.’—Tito 2:10.
AMMUEM TI AD-ADU PAY
Kitaem no kasanotayo a masigurado a ti panagbadbado ken itsuratayo ipakitana a Kristianotayo.
Ti panagbadbado ken itsuratayo ipakitana no resrespetuentayo dagiti tattao nga addaan iti autoridad. Uray no makitkita ni Jehova ti adda iti pusotayo, ipakita latta koma ti panagbadbado ken itsuratayo a resrespetuentayo isuna
4. Maipakitatayo a resrespetuentayo ni Jehova no nasayaat ti panagbadbado ken itsuratayo
Ania ti kapatgan a rason a kayattayo a nasayaat ti panagbadbado ken itsuratayo? Basaen ti Salmo 47:2, sa pagsaritaan dagitoy a saludsod:
Gapu ta awittayo ti nagan ni Jehova, ania koma ti epekto dayta iti panagpilitayo iti pagbadotayo?
Panagkunam, talaga kadi a napateg a panunotentayo ti itsuratayo no mapantayo makigimong ken mangasaba? Apay, wenno apay a saan?
5. Ti makatulong kadatayo nga agpili no ania ti pagbado ken itsuratayo
Nangina man wenno nalaka ti badotayo, masapul a nadalus dayta ken maibagay iti situasion wenno okasion. Basaen ti 1 Corinto 10:24 ken 1 Timoteo 2:9, 10. Kalpasanna, pagsaritaan no apay a ditay agbado iti . . .
narugit wenno saan a desente.
nakipet, nakiting, wenno makagargari.
Nupay saanen a sursuroten dagiti Kristiano ti Mosaiko a Linteg, adda maadaltayo iti dayta maipapan iti pampanunot ni Jehova. Basaen ti Deuteronomio 22:5, sa pagsaritaan dagitoy a saludsod:
Apay a masapul a liklikan dagiti lallaki ti panagbadbado ken itsura a pangbabai? Kasta met, apay a masapul a liklikan dagiti babbai ti panagbadbado ken itsura a panglalaki?
Basaen ti 1 Corinto 10:32, 33 ken 1 Juan 2:15, 16, sa pagsaritaan dagitoy a saludsod:
Apay a masapul a panunotentayo no ti panagbadbado ken itsuratayo ket makaitibkol kadagiti tattao iti lugartayo wenno kadagiti kakabsat?
Ania a panagbadbado ken itsura dagiti tattao ti uso iti lugaryo?
Panagkunam, maitutop kadi dayta iti maysa a Kristiano? Apay?
No maipapan iti itsura ken panagbadbadotayo, adu ti mabalintayo a pagpilian a mangparagsak latta ken Jehova
KUNA TI DADDUMA: “Awan bibiang ti dadduma no ania ti kayatko nga ibado.”
Panagkunam, husto kadi dayta? Apay?
SUMARIO
No nasayaat ti pilpilientayo a bado ken itsuratayo, maipakitatayo a resrespetuentayo ni Jehova ken ti dadduma.
Rebiu
Apay a napateg ken Jehova ti pilpilientayo a bado ken itsura?
Ania dagiti makatulong kadatayo nga agdesision maipapan iti panagbadbado ken itsuratayo?
Kasano a ti panagbadbado ken itsuratayo apektaranna ti panangkita ti dadduma iti pudno a panagdaydayaw?
AGDISKOBREKA PAY
Kitaem no ania ti ipakita ti panagbadbadom maipapan kenka.
Ammuem no apay a nasayaat nga agpanunotka nga umuna sakbayka nga agpa-tattoo.
“Ania ti Kuna ti Biblia Maipapan iti Tattoo?” (Artikulo iti website)
Kitaem ti dadduma pay a prinsipio a makatulong kadatayo nga agdesision.
“Pakaidayawan Kadi ti Dios ti Panagbadbadom?” (Ti Pagwanawanan, Septiembre 2016)
Kasano a nasursuro ti maysa a babai a mayat a mangparagsak iti Dios nga awaten ti personal a desision ti dadduma maipapan iti panagbadbado ken itsura?
“Pakaitibkolak Idi ti Panagkawkawes ken Panaglanglanga” (Agriingkayo!, Disiembre 22, 2003)