Ti Ulbod a Relihion ti Agakem a Balangkantis
1. Kasano ti panangmatmat dagiti adu iti panagbalangkantis?
DADDUMA awaganda dayta ti kadadaananen a propesion—ti pampam, balangkantis wenno makikamkamalala a babai. Kas gagangayen a maus-usar, amin dagitoy a sasao maymaysa ti kaipapananda, a tuktukoyenda ti maysa nga imoral a babai nga ilakona ti bagina tapno usaren dagiti lallaki. Ngem, adda idi tiempo a daytoy ket maysa a madaydayaw a pannakaayab!
2, 3. Kasano a maisupadi ti paset dagiti papadi a babbai iti kadaanan a Babilonia iti linteg ni Jehova iti Israel maipapan iti panagbalangkantis ti lalaki ken babai?
2 Iti panagsaritana maipapan ti kinapadi iti kadaanan a Babilonia, ni Propesor S. H. Hooke, maysa nga autoridad iti arkeolohia ti Biblia, kinunana: “Ti kinapadi ket saan a maipaay laeng kadagiti lallaki, no di ket dagiti babbai kamengda met dagiti dadakkel a templo. Maibilang a dayaw ti agbalin a kameng iti orden dagiti papadi a babbai, ket makangngegtayo kadagiti sumagmamano nga ar-ari a nangidedikar kadagiti annakda a babbai iti pannakaayab iti kinapadi. . . . Ti kapapatgan a trabahoda isu ti panagserbi kas sagrado a balangkantis iti dadakkel a panapanawen a pipiesta. . . . Ti templo ni Ishtar [ti diosa iti kinabunga ken iti gubat], gagangayen, nga addaan iti nagdakkel a kameng dagita a babbai.”
3 Daytoy ket maisupadi unay iti panagdayaw ti nasion ti Israel ken ni Jehova a Dios. Nalawag ti panangibaga ti Linteg: “Awanto ti agbalangkantis iti templo kadagiti annak a babbai ti Israel, wenno awanto ti manangubet kadagiti annak a lallaki ti Israel [agaramid ti homoseksualidad] iti templo. Dikanto mangyeg ti tangdan ti maysa a balangkantis wenno tangdan ti maysa nga aso iti balay ni Jehova a Diosmo a maipaay iti kari, ta dagitoy a dua isuda ti kinarimon ken Jehova a Diosmo.” (Deuteronomio 23:17, 18) Gapuna, ti bayad ti maysa a balangkantis ket saan a maawat a kas kontribusion iti santuario ti Dios. Uray pay ti panagbalangkantis nga awan ti aniaman a relihiuso a kaipapananna ket nakababain. Nabilin dagti Israelitas: “Dika tulawan ti anakmo a babai nga aramiden a balangkantis, di la ket ta ti daga matnag iti binabalangkantis ket ti daga mapnuan iti kinadakes.” Ti linteg a maibusor iti panagbalangkantis ken homoseksualidad, a nadeskribir a “makarimon a banag,” ket proteksion a maipaay iti nasion, agpadpada iti naespirituan ken iti pisikal.—Levitico 19:29; 20:13.
Dakdakes Pay ti Naespirituan a Panagbalangkantis
4. Ania ti kadadaksan a porma iti panagbalangkantis?
4 Manipud iti panangmatmat ti Dios, nupay kasta, adda dakdakes pay a porma iti panagbalangkantis—ti naespirituan a panagbalangkantis, wenno panagakem nga agdaydayaw iti pudno a Dios ngem aktual a mangipapaay iti panagdayaw ken panangipateg kadagiti dadduma a didios. Ti kadaanan a Jerusalem nakarkaro pay ti panagbalangkantisna. Isut’ nangited kadagiti sagsagut kadagiti nasnasion a nakikamalala kenkuana iti naespirituan, isu a nangmulit iti pudno a panagdayaw.—Ezequiel 16:34.
5, 6. Siasino dagiti mangar-aramid iti naespirituan a panagbalangkantis iti daytoy maika-20 a siglo, a mangiturong kadagiti ania a salsaludsod?
5 Uray iti daytoy maika-20 a siglo, ti naespirituan a panagbalangkantis ket gagangayen iti relihiuso a sistema ti lubong. Ti Kakristianuan isu ti kalalatakan a paset dayta a sistema—maysa a sistema nga awagan ti Biblia a “Babilonia a Dakkel, ti ina dagiti balangkantis ken dagiti nakarimrimon ditoy daga.”—Apocalipsis 17:5.
6 Ngem ania ti kamaudianan a pagtungpalan ti Babilonia a Dakkel? Ken kasano nga apektarannakayo ken dagiti inay-ayatyo dayta a kamaudianan a pagtungpalan? No dakes ti panangukom ti dios kadagiti balangkantis iti kadaanan nga Israel, anianto ti aramidenna iti moderno a naespirituan a panagbalangkantis? Dagiti sumaganad nga artikulo sukimatenda dagidiay a salsaludsod ken dagiti mainaig kadagita.