Lua ti Nakaparsuaan
NAKASAPSAPA pay iti bigat, sa nalamiis ken natalna ti angin. Rumimat ti tunggal bulong ken ruot iti linnaaw, nga agraniagda iti damo a silnag ti aldaw. Ket agparang a kasla naglua dagiti mula gapu iti rag-o a mangkablaaw iti isisingising ti init. Di ngarud pakasdaawan nga inabbukay ti linnaaw ti rikna dagiti dumadaniw—ken dagiti retratista.
Nupay kasta, ti linnaaw saanna laeng a bang-aran ti natauan nga espiritu. Daytoy a pasamak iti atmospera, a gagangayen iti intero a planeta malaksid kadagiti lugar iti pole, ket maysa nga abbungot ti makaited-biag nga agneb. Dinisenio ni Jehova a Dios ti atmospera nga inton lumamiisen dayta bayat ti rabii iti sidong ti dadduma a kasasaad, makagteng dayta iti temperatura a maawagan dew point (panagbalin ti sengngaw a linnaaw). Daytoy ti temperatura a saanen a matengngel ti angin ti agnebna ket idepositona dayta kadagiti rabaw a nalamlamiis ngem ti angin iti aglawlaw. Babaen kadagiti bulongda, naammuan a dagiti mawaw a mula agsependa ti linnaaw a katupag ti kadagsenda, a kaaduan kadagitoy ti iruarda kadagiti ramutda tapno maurnong iti daga.
Kadagiti lugar [a nakaisuratan] ti Biblia, a sadiay adda atiddog a kalgaw, nalabit ti linnaaw ti pudno a kakaisuna a gubuayan ti danum agpaay kadagiti mula. Isu nga idiay Biblia, masansan a mainaig ti linnaaw iti panagbunga dagiti mula—ket ti kurang a linnaaw, iti bisin.
Ti linnaaw mabalin met nga adda nangnangruna a personal a kaipapananna. Iti pammakada a kantana iti ili ti Dios, nagsurat ni Moises: “Ti pannursurok agtedtedto kas tudo, ti palawagko agtinnagto kas ti linnaaw, kas arimukamok iti rabaw ti ruot ken kas arbis iti rabaw ti nateng.” (Deuteronomio 32:2) Inyebkas ni Moises dagiti makaited-biag a sasao a kas linnaaw. Yantangay isu ti kapakumbabaan iti isuamin a lallaki, pudno nga isut’ gagangay a naemma ken nakonsiderasion met iti panagsasaona. (Numeros 12:3) Kas iti linnaaw wenno arimukamok, mangtaripato dagiti sasaona a di mangipaay iti pannakadangran.
Inton sumaganad a panunotenyo ti makaay-ayo a kinapintas ti linnaaw ti agsapa—ti lua a mismo ti nakaparsuaan—nalabit tarigagayanyo a mennamennaen ti nakaskasdaaw a kinasirib ti Namarsua iti linnaaw.