Agrag-okayo iti Namnama ti Pagarian!
MAYSA daydi a naragsak nga okasion a nagtataripnongan ti 5,784 a tattao idi Marso 10, 2001, kadagiti tallo nga agaassideg a patakder iti New York State nga inusar ti dakkel a pamilia ti Bethel. Ti okasion isu ti panaggraduar ti maika-110 a klase ti eskuelaan ti Gilead a para misionero.
Ni Carey Barber, a kameng ti Bagi a Manarawidwid dagiti Saksi ni Jehova, ti nangabrasa iti isuamin ken nanglukat iti programa, a kinunana: “Maragsakantayo a makaammo a 110 a klase dagiti estudiante ti Gilead ti nasanayen kas misionero ken naibaonen kadagiti teritoria iti intero a globo.”
No Kasano nga Agtalinaed a Naragsak
Kalpasan ti panglukat a palawag ni Kabsat Barber, impalawag ni Don Adams iti tallaong, a nakairamanan dagiti 48 nga aggraduar nga estudiante, ti tema a “Ti Bendision ni Jehova Pabaknangennatayo.” Imbasarna ti palawagna iti Proverbio 10:22. Impalagipna iti tallaong a saranayen ken bendisionan ni Jehova dagiti adipenna no iyun-unada iti biagda dagiti interes ti Pagarian. Pinaregtana dagiti estudiante nga awatenda dagiti baro nga annongenda buyogen ti isu met laeng a situtulok nga espiritu nga imparangarang ni apostol Pablo idi naawis nga ‘umallatiw iti Macedonia ket tumulong.’ (Aramid 16:9) Nupay addada pakarigatan a sarangten, ti kinatulok ni Pablo a mangasaba sadinoman a pakaibaonanna ket nagresulta iti adu a naragsak a bendision.
Naturpos dagiti aggraduar ti lima a bulan a panangadal iti Biblia ken pannakasanay kas panagsagana iti panagmisionero. Kaskasdi, ni Daniel Sydlik, a kameng ti Bagi a Manarawidwid dagiti Saksi ni Jehova, pinaregtana ida nga agtultuloy nga agadal. Iti palawagna a natemaan iti “Agbalinkayo a Pudno nga Ad-adalan,” kinunana: “Ti panagbalin nga adalan kaipapananna ti patinayon a panagtulnog iti sasao ni Jesus. Iramanna ti kinatuloktayo a kanayon nga agimdeng iti sasaona, iti mensahena, ken iti sursurona.” Impaganetgetna a dagiti adalan ni Kristo saanda a makapagdesision no dida pay naimdengan ti timek ti Apoda; ti sirib ti Dios ket naisinggalut iti biag ni Kristo. (Colosas 2:3) Awan kadatayo ti makaibaga nga ammotayon amin a banag maipapan ken Jesus no namnaminsan laeng a nangngegtayo ti sasaona, isu a pinaregta ni Kabsat Sydlik dagiti naggraduar nga itultuloyda nga adalen, iyaplikar, ken isuro ti Nakristianuan a kinapudno, nga agresulta iti pannakawayawaya.—Juan 8:31, 32.
Tapno makapagtalinaed a naragsak iti panagserbi iti Dios, masapul a ti maysa ket situtulok nga awatenna ti disiplina ken pannakailinteg. Insaludsod ti instruktor ti Gilead a ni Lawrence Bowen: “Ilintegnakayo Kadi Dagiti Bekkelyo?” Impakitana nga iti Biblia, ti piguratibo a bekkel ket nainaig iti kaunggan a pampanunot ken emosion ti maysa a tao. Agserbida a mangilinteg iti maysa a tao no la ket ta ti balakad ti Sao ti Dios immukuok iti kaunggan nga aspeto ti personalidad dayta a tao. (Salmo 16:7; Jeremias 17:10) Ti matalek a kurso ti maysa a tao mabalin a maay-ayona unay ni Jehova. Kalpasan a binasana ti Proverbio 23:15, 16, insaludsod ti nagpalawag: “Ilintegnakayo kadi dagiti bekkelyo?” Innayonna: “Ikararagtayo nga aramidenda dayta, ket iti kasta maparagsakyonto unay ni Jehova. Matukayyonto ti kaunggan ti riknana. Wen, maparagsakyonto dagiti bekkel ni Jehova no sisusungdo nga agtalinaedkayo kadagiti teritoriayo.”
Ti maudi a palawag iti daytoy a paset ti programa ket impaay ni Mark Noumair, a nagserbi kas misionero idiay Kenya sakbay a nagbalin nga instruktor ti Gilead. Ti palawagna a napauluan “Nasaysayaat ti Panangkita Babaen Kadagiti Mata” intampokna ti kinapateg ti panangkultibar iti pannakapnek. Maitunos iti Eclesiastes 6:9, inrekomenda ni Kabsat Noumair: “Aklonenyo ti kinapudno. Isu dayta ti ‘panangkita babaen kadagiti mata.’ Imbes nga ar-arapaapenyo a kayatyo nga aramiden ti maysa a banag ngem saan a dayta ti ar-aramidenyo, ipangpangrunayo koma nga aramiden ti kasayaatan iti agdama a kasasaadyo. Ti panagbiag iti lubong ti arapaap, kaadda iti di nainkalintegan nga inanamaen, wenno panangpampanunot kadagiti negatibo a kasasaad ti teritoriayo pagbalinennakayo laeng a saan a mapnek ken saan a kontento.” Wen, sadinoman ti ayantayo wenno aniaman dagiti kasasaadtayo, ti panangpatanor iti nadiosan a pannakapnek kadagiti bukodtay a kasasaad parnuayenna ti naragsak nga espiritu iti panagserbi iti Naindaklan a Namarsuatayo.
Dagiti Naragsak a Kapadasan iti Panagserbi iti Pagarian ken Idiay Gilead
Kalpasan ti kasta a praktikal a balakad manipud kadagidiay a diskurso, linagip dagiti estudiante ti sumagmamano a kapadasan a tinagiragsakda bayat ti pannakiramanda iti ministerio iti publiko kabayatan ti lima a bulan a kursoda. Iti panangidaulo ni Wallace Liverance, registrar ti Eskuelaan ti Gilead, imbaga dagiti naggraduar no kasanoda nga inrekomenda ti bagbagida kas ministro ti Dios. (2 Corinto 4:2) Naallukoyda ti inted-Dios a konsiensia ti sumagmamano a tattao. Impakita dagiti kapadasan dagiti estudiante no kasano a nairugi dagiti panagadal iti Biblia kadagiti napasnek nga indibidual a naam-ammoda iti lansangan, iti binalaybalay a ministerio, ken iti dadduma pay a wagas. Kadagiti sabali a gundaway, kinuna dagiti interesado a tattao a ti kinapudno ket adda kadagiti naibatay iti Biblia a publikasion ti organisasion ni Jehova. Maysa a bumalay ti naginteres unay iti maysa a bersikulo ti Biblia. Isu ket makipagad-adalen iti Biblia kadagiti Saksi ni Jehova.
Simmaganad, ininterbiu ni Joel Adams dagiti naggraduar iti Gilead manipud kadagiti immun-una a klase. Ti temana ket “Dikay Sumardeng nga Agadal, Dikay Sumardeng nga Agserbi ken Jehova.” Dagidiay a nainterbiu nangipaayda iti naintiempuan a balakad kadagiti kabbaro a misionero. Iti pananglagipna kadagidi aldawna kas kameng ti maika-26 a klase ti Gilead, kinuna ni Harry Johnson: “Naisuro kadakami a ni Jehova ket kankanayon nga idalanna ti ilina ken itultuloyna nga idalan. Dayta a panagtalek ti nagserbi a pammaregta iti panaglabas dagiti tawen.” Ni William Nonkes, a kameng ti maika-53 a klase ti Gilead, imbalakadna kadagiti naggraduar: “Kangrunaan iti amin, laglagipenyo dagiti prinsipio ti Biblia, ket iyaplikaryo dagita iti amin a pangngeddeng nga aramidenyo iti biag itan ken iti agnanayon. Kas resultana, makapagtalinaedkayto iti teritoriayo, ket ipaayto kadakayo ni Jehova ti nabaknang a pamendisionna.”
“Napabileg Tapno Itungpal ti Pagayatan ni Jehova” ti tema a pinili ni Richard Rian iti pasetna iti programa. Ti maysa kadagidiay ininterbiuna isu ni John Kurtz, naggraduar iti maika-30 a klase, a nagserbi kas misionero idiay España iti nasurok nga 41 a tawen. Idi napagsaludsodan maipapan iti kurikulum ti Gilead, kinuna ni Kabsat Kurtz: “Ti Biblia ti kangrunaan a libro a maaramat. Ket addaantayo kadagiti katulongan iti panagadal iti Biblia tapno maawatantayo ti Biblia. Dagitoy ket mabalin nga usaren ti isuamin. Awan ti sekreto nga impormasion a maipapaay iti Gilead. Diak mamingga a mangipaganetget iti dayta agsipud ta ti impormasion a maipapaay iti Gilead ket mabalin a magun-odantay amin.”
Ni Kabsat Gerrit Lösch, kameng ti Bagi a Manarawidwid dagiti Saksi ni Jehova, inngudona ti naespirituan a programa babaen ti panangipalawagna ti tema nga “Iti Sidong Dagiti Payak ni Jehova.” Inlawlawagna no kasano a ti pannalaknib ken pannaranay ti Dios kadagiti matalek nga adipenna ket nayilustrar iti Biblia babaen kadagiti payak ti agila. (Deuteronomio 32:11, 12; Salmo 91:4) Ti adulto nga agila no dadduma iyukradna dagiti payakna iti adu nga oras tapno masalaknibanna dagiti annakna. Addada pay tiempo nga uray la isallukob ti ina nga agila dagiti payakna kadagiti annakna tapno salaknibanna ida iti nalamiis nga angin. Iti umasping a pamay-an ken maitunos iti panggepna, saranayen ni Jehova dagiti matalek nga adipenna, nangruna no masuot ti espiritualidadda. Saan nga ipalubos ni Jehova a masulisog dagiti adipenna iti labes ti kabaelanda nga itured ngem aramidenna ti dalan a pagruaran tapno maibturanda dayta. (1 Corinto 10:13) Kas pangleppas, kinuna ni Kabsat Lösch: “Tapno kanayontayo a masalakniban iti naespirituan, masapul nga agtalinaedtayo iti sirok dagiti payak ni Jehova. Kayat a sawen daytoy a masapul a ditay patanoren ti espiritu ti panagwaywayas. Kanayontay koma nga agtalinaed a nadekket ken ni Jehova ken iti kas ina nga organisasionna, a ditay isinsina ti bagbagitayo manipud iti panangiwanwan ken naayat a balakadda.”
Ti tserman binasana dagiti telegrama ken kablaaw manipud kadagiti gagayyem iti aglikmut ti globo. Simmaruno ti pannakayawat dagiti diploma. Idi naipasdek ti Eskuelaan ti Gilead, ti panggep ket kaadda laeng ti limitado a bilang dagiti klase iti uneg ti lima a tawen. Ngem pinagtalinaed ni Jehova a Dios a silulukat ti eskuelaan iti 58 a tawen. Kas iti kinuna ni Kabsat Barber iti panglukat a palawagna: “Anian a pudpudno a nakaskasdaaw a rekord ti nagapuanan dagiti naggraduar iti Gilead sipud pay nairugi idi 1943! Ti nagtitipon a panagreggetda ket nagresulta iti pannakainayon ti literal a ginasut a ribu a naemma a tattao ditoy daga iti nadayag nga organisasion ni Jehova.” Wen, daytoy nga eskuelaan dagiti agmisionero natulonganna dagiti minilion nga agrag-o iti namnama ti Pagarian.
[Kahon iti panid 24]
ESTADISTIKA TI KLASE
Bilang dagiti pagilian a nairepresentar: 8
Bilang dagiti pagilian a pakaibaonanda: 18
Bilang dagiti estudiante: 48
Promedio nga edad: 34
Promedio a tawen iti kinapudno: 18
Promedio a tawen iti amin-tiempo a ministerio: 13
[Ladawan iti panid 25]
Ti Maika-110 a Nagturpos a Klase ti Watchtower Bible School of Gilead
Iti listaan ditoy baba, nanumeruan dagiti intar manipud sango nga agpalikud, ken nailista dagiti nagan manipud kannigid nga agpakannawan iti kada intar.
(1) Vacek, E.; Madelin, L.; Evans, G.; Watanabe, K. (2) Trafford, P.; Turfa, J.; Wilson, P.; Williams, R.; Weber, A. (3) Johnson, T.; Hanau, K.; Mourlhou, F.; Charpentier, F.; Peckham, R.; Androsoff, P. (4) Seegers, T.; Seegers, D.; Bailey, P.; Bailey, M.; Madelin, K.; Lippold, E.; Lippold, T. (5) Evans, N.; Gold, R.; Bollmann, I.; Vacek, R.; Oundjian, J.; Wilson, N. (6) Turfa, J.; Zuidema, L.; Zuidema, R.; Bengtsson, C.; Bengtsson, J.; Galano, M.; Galano, L. (7) Peckham, T.; Mourlhou, J.; Charpentier, C.; Gold, M.; Bollmann, R.; Oundjian, F. (8) Weber, R.; Johnson, B.; Hanau, D.; Watanabe, Y.; Williams, R.; Trafford, G.; Androsoff, T.