ASER
[Naragsak; Kinaragsak].
1. Ti maikawalo nga anak ni Jacob ken ti inaudi kadagiti dua nga annakna ken Zilpa, ti adipen a babai ni Lea. (Ge 35:26) Ngarud ni laeng Gad ti kabsat ni Aser iti ama ken ina. Ti uppat nga annak a lallaki ni Aser ken ti maysa nga anakna a babai ket nailista iti 1 Cronicas 7:30, nupay saan a nainaganan ti asawana. Saan unay a pagaammo ni Aser kadagiti 12 nga annak ni Jacob. Nupay kasta, iti padto ni amana idi matmatayen, naikari ken Aser ti maysa a biag a nabendisionan iti naruay ken agkakaimas a taraon (Ge 49:20), ket ti pakasaritaan dagiti kaputotanna ipamatmatna ti kaitungpalan daytoy a padto.
2. Agaplikar met daytoy a nagan iti tribu a nagtaud ken Aser. Makatawen kalpasan ti Ipapanaw manipud Egipto, dagiti adulto a lallaki a putot ti tribu ket nagdagup iti 41,500 (Nu 1:41) ket, agarup 39 a tawen kalpasanna, immadu agingga iti 53,400, a namagbalin iti dayta kas tribu a maikalima a kaaduan iti populasion. (Nu 26:47) Iti pakarso ti Israel, nagsaad ti Aser iti amianan ti tabernakulo, a kaduana dagiti tribu ti Dan ken Neftali.—Nu 2:25-30.
Sakbay ti iseserrek iti Canaan, ti naimpadtuan a pamendision ni Moises impakaunana manen ti nabaknang a bingay ti Aser. Iti piguratibo a pamay-an, ti tribu ‘isawsawna ti sakana iti lana.’ (De 33:24, 25; idiligyo ti Job 29:6.) Ti bingayda a teritoria saklawenna dagiti tanap iti igid ti baybay ti Mediteraneo manipud baba ti ili ti Dor, iti abagatan ti Bantay Carmelo, nga agpangato agingga iti makin-amianan a beddeng ti Palestina idiay Sidon. (Jos 17:7-11; 19:24-31) Ramanenna ti sumagmamano kadagiti kadam-egan a daga iti intero nga Israel, a dagiti kayo nga olibo sadiay mangipaayda iti nawadwad a lana, ket ti dadduma a prutas agpaayda kas agkakaimas a taraon a maikari a maidiaya iti naarian a lamisaan. (Ge 49:20; De 33:24) Dagiti teritoria ti Zabulon ken Neftali adda iti makindaya a beddeng ti Aser, idinto ta ti Manases ket adda iti abagatan ken ti Isacar adda iti abagatan a daya.
Nainaganan ti Aser iti Josue 17:7 kas adda iti beddeng ti tribu ti Manases. Nadakamat met ti Aser iti daytoy met laeng a salaysay iti bersikulo 10, a sadiay nalawag a tumukoy iti teritoria ti tribu ti Aser.